കൊച്ചി : വിവാദത്തിന്റെ പശ്ചാത്തലത്തിൽ ഉപ്പും മുളകും പരമ്പരയുടെ സംവിധായകനെ മാറ്റാമെന്ന് ചാനൽ ഉറപ്പു നൽകിയതായി നടി നിഷ സാരംഗ്. ഇതിന്റെ അടിസ്ഥാനത്തിൽ സീരിയലിൽ തുടരും. മറിച്ച് ആ സംവിധായകൻ തന്നെയാണ് വീണ്ടും വരുന്നതെങ്കിൽ, താൻ ആ പരമ്പരയിൽ ഇനി അഭിനയിക്കില്ലെന്നും നിഷ വ്യക്തമാക്കി. ഒരു ഓൺലൈൻ മാധ്യമത്തിനോടാണ് നിഷ നിലപാട് അറിയിച്ചത്.
ഉപ്പും മുളകും സീരിയൽ സംവിധായകൻ ഉണ്ണികൃഷ്ണൻ തന്നോട് മോശമായി പെരുമാറുന്നതായി ആരോപിച്ച് നിഷ സാരംഗ് കഴിഞ്ഞദിവസം രംഗത്തെത്തിയിരുന്നു. കടുത്ത ഭാഷയിൽ പ്രതികരിച്ച തന്നെക്കുറിച്ച് ഇയാൾ അപവാദം പ്രചരിപ്പിച്ചതായും നടി ആരോപിച്ചിരുന്നു. സംഭവം വിവാദമായതോടെ ചാനൽ നടിയുമായി ഒത്തുതീർപ്പ് ചർച്ചയ്ക്ക് വിളിക്കുകയായിരുന്നു.
സംഭവത്തിന്റെ സത്യാവസ്ഥ അറിയാവുന്ന ചിലരുണ്ട്. ഇതെല്ലാം കണ്ട് അനുഭവമുള്ള, പിന്തുണയുമായി വന്ന ചിലരുടെ വാക്ക് പരിഗണിച്ചാണ് ചാനലിന്റെ മീറ്റിങിന് പോയത്. എന്നെ പിരിച്ചു വിട്ടിട്ടില്ല എന്നാണ് ചാനലുകാര്‍ പറയുന്നത്. എന്നാല്‍, സംവിധായകനെ മാറ്റിയതിന് ശേഷമേ ഞാന്‍ സീരിയലില്‍ തുടരൂ. ഇക്കാര്യം അവര്‍ ഉറപ്പ് തന്നിട്ടുണ്ട്. അഥവാ അയാള്‍ തിരിച്ചു വരികയാണെങ്കില്‍ ഞാന്‍ പരമ്പര വിട്ടിട്ട് തിരിച്ചു പോരും. നിഷ സാരംഗ് വ്യക്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
