ന്യൂഡല്ഹി: തോമസ് ചാണ്ടി വിഷയത്തില് എല്ഡിഎഫ് സര്ക്കാരിന്റെ അന്തസ്സ് കാക്കണമെന്ന് സിപിഐ ജനറല് സെക്രട്ടറി സുധാകര് റെഡ്ഢി. സിപിഐയുടെ നിലപാട് നേരത്തെ വ്യക്തമാക്കിയതാണെന്നും റെഡ്ഢി പറഞ്ഞു. നിയമോപദേശത്തിന്റെ അടിസ്ഥാനത്തില് തീരുമാനമെടുക്കേണ്ടത് മുഖ്യമന്ത്രിയാണെന്നും അഭിമാനം സംരക്ഷിക്കുന്ന തീരുമാനമെടുക്കുമെന്ന് കരുതുന്നുവെന്നും അദ്ദേഹം വ്യക്തമാക്കി.
നേരത്തെ തോമസ് ചാണ്ടി കായല് കയ്യേറിയെന്ന ആലപ്പുഴ ജില്ലാ കളക്ടറുടെ റിപ്പോര്ട്ട് പുറത്തുവന്നതിന് പിന്നാലെ തോമസ് ചാണ്ടി രാജിവെക്കണം എന്നാവശ്യപ്പെട്ട് സുധാകര് റെഡ്ഢി രംഗത്തെത്തിയിരുന്നു. സുധാകര് റെഡ്ഢിയാണ് ഒന്നാമത്തെ അഴിമതിക്കാരന് എന്നായിരുന്നു തോമസ് ചാണ്ടിയുടെ പ്രതികരണം. തുടര്ന്ന് സിപിഐ സംസ്ഥാന ഘടകം ചാണ്ടിയുടെ രാജി ആവശ്യം കൂടുതല് ശക്തമാക്കുകയും എഐവൈഎഫ് ചാണ്ടിയുടെ കോലം കത്തിക്കുകയും ചെയ്തിരുന്നു.
കഴിഞ്ഞ ദിവസം ചേര്ന്ന സിപിഐ സംസ്ഥാന എക്സിക്യൂട്ടീവ് തോമസ് ചാണ്ടിയുടെ രാജി അല്ലാതെ മറ്റ് വഴികളില്ലെന്നും ചാണ്ടി അധികാരത്തില് തുടരുന്ന ഓരോ നിമിഷവും മുന്നണി നാറുമെന്നും പറഞ്ഞിരുന്നു. രാജി ആവശ്യപ്പെടണമെന്ന് സിപിഐ സിപിഎമ്മിനോട് ആവശ്യപ്പെടുകയും ചെയ്തിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ