നവരാത്രി ആഘോഷങ്ങളില്‍ പങ്കെടുത്തതിന് ദളിത് യുവാവിനെ തല്ലിക്കൊന്നു

ഇരുപത്തിയൊന്നു വയസ്സുള്ള ജയേഷ് സോളങ്കിയെയാണ് പട്ടേല്‍ സമുദായാഗംങ്ങള്‍ തല്ലിക്കൊന്നത്.
നവരാത്രി ആഘോഷങ്ങളില്‍ പങ്കെടുത്തതിന് ദളിത് യുവാവിനെ തല്ലിക്കൊന്നു

അഹമ്മദാബാദ്: ഗുജറാത്തില്‍ നവരാത്രി ആഘോഷങ്ങളുടെ ഭാഗമായി നടന്ന ഗര്‍ബ ആഘോഷത്തില്‍ പങ്കെടുത്ത ദളിത് യുവാവിനെ മേല്‍ജാതിക്കാര്‍ തല്ലിക്കൊന്നു. ഇരുപത്തിയൊന്നു വയസ്സുള്ള ജയേഷ് സോളങ്കിയെയാണ് പട്ടേല്‍ സമുദായാഗംങ്ങള്‍ തല്ലിക്കൊന്നത്. ഗുജറാത്തിലെ ആനന്ദ് ജില്ലയില്‍ ഞായറാഴ്ച പുലര്‍ച്ചെ നാലുമണിക്കായിരുന്നു സംഭവം നടന്നത്. 

ജയേഷും സുഹൃത്തുക്കളും ഭദ്രാനിയ ഗ്രാമത്തിലെ ക്ഷേത്രത്തിനടുത്ത് ഇരിക്കുകയായിരുന്നു. പുലര്‍ച്ചെ നാലുമണിയോടെ ഇവരുടെ അടുത്തെത്തിയ പട്ടേല്‍ സമുദായത്തില്‍ പെട്ട ഒരാള്‍ ഇവരെ ജാതിപ്പേര് പറഞ്ഞ് ആക്ഷേപിച്ചു. തുടര്‍ന്ന് താഴ്ന്ന ജാതിക്കാരായ ഇവര്‍ക്ക് ഗര്‍ഭനൃത്തം കാണാന്‍ അവകാശമില്ലെന്നു പറഞ്ഞ് കൂട്ടുകാരെ വിളിച്ചുവരുത്തി ഇവരെ ആക്രമിക്കുകയായിരുന്നു. 

ഇതിലൊരാള്‍ ജയേഷ് സോളങ്കിയുടെ തല ചുമരില്‍ ഇടിപ്പിച്ചതിനെ തുടര്‍ന്ന് മാരകമായി പരിക്കേറ്റ ഇയാളെ അടുത്തുള്ള ആശുപത്രിയിലെത്തിച്ചെങ്കിലും മരണം സംഭവിച്ചു. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്. പ്രതികളെ ഉടനെ പിടികൂടുമെന്നും പൊലീസ് ഉദ്യോഗസ്ഥര്‍ അറിയിച്ചു.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com