മുംബൈയ്: മുംബൈയില്‍ അമ്മയെ മകന്‍ അടിച്ച് കൊന്നു. വസായില്‍ താമസിക്കുന്ന മലയാളി വീട്ടമ്മയാണ് മരിച്ചത്. സംഭവത്തെ തുടര്‍ന്ന് മകന്‍ അമിതിനെ(24) പൊലീസ് അറസ്റ്റ് ചെയ്തു. മദ്യപിച്ചെത്തിയ യുവാവ് അമ്മ ലതാ നായരെ (64) ചുമരില്‍ തല ഇടിപ്പിച്ച് കൊല്ലുകയായിരുന്നു.
അമിത് അടക്കം നാല് മക്കളാണ് ലതയ്ക്കുള്ളത്. മൂന്ന് പെണ്‍മക്കള്‍ വിവാഹിതരാണ്. ഏറ്റവും ഇളയവനായ അമിത് തൊഴിലൊന്നും ഇല്ലാത്തതിനാല്‍ ലതയ്‌ക്കൊപ്പമാണ് കഴിഞ്ഞുവന്നത്. മദ്യപിച്ചെത്തി അമിത് ലതയോട് വഴക്കിടുക പതിവായിരുന്നു. സംഭവം ദിവസം പുലര്‍ച്ചെ ഒരു മണിയോടെ വീട്ടിലെത്തിയ അമിത് കാളിംഗ് ബെല്‍ അടിച്ചു. എന്നാല്‍ ലത വാതില്‍ തുറന്നില്ല. അമിത് ബഹളമുണ്ടാക്കാന്‍ തുടങ്ങിയതോടെ അയല്‍ക്കാര്‍ക്ക് ശല്യമുണ്ടാകാതിരിക്കാന്‍ ലത വാതില്‍ തുറന്നു.
വീടിനകത്തേക്ക് കയറിയ അമിത് വാതില്‍ തുറക്കാത്തതിനെ ചൊല്ലി ലതയുമായി വഴക്കിട്ടു. തുടര്‍ന്ന് അമിത് ലതയുടെ തല പിടിച്ച് ചുമരില്‍ ശക്തിയായി ഇടിക്കുകയായിരുന്നു. തലയ്ക്ക് മാരകമായ ക്ഷതമേറ്റ ലത ബോധരഹിതയായി. അടുത്ത ദിവസം പുലര്‍ച്ചെ 5.30ന് വിവരം അമിത് സഹോദരിമാരെ അറിയിച്ചു. അവരാണ് വിവരം പൊലീസിനെ അറിയിച്ചത്. പൊലീസെത്തി അമിത്തിനെ കസ്റ്റഡിയില്‍ എടുത്തു. അമിത് കുറ്റം സമ്മതിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
