ഇന്ത്യന്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ തന്റെ ആരാധകരോട് പെരുമാറുന്നത് എങ്ങനെയാണ്. ഉത്തരം തേടി എവിടെയും പോകേണ്ട. അദ്ദേഹത്തിന്റെ ഫെയ്‌സ്ബുക്കില്‍ പേജില്‍ തന്നെ ഇക്കാര്യം വ്യക്തമായി കാണാം.
കാറില്‍ പോകുകയായിരുന്ന സച്ചിന്‍ ടെണ്ടുല്‍ക്കറെ ബൈക്കോടിക്കുന്ന രണ്ട് ആരാധകന്‍മാര്‍ കണ്ടപ്പോള്‍ വലിയ താരമല്ലേ ഒരു സെല്‍ഫിയെടുത്തേക്കാമെന്ന് വിചാരിച്ചു. ഹെല്‍മറ്റ് ധരിക്കാതെയാണ് ബൈക്ക് ഓടിക്കുന്നതെന്ന് ശ്രദ്ധയില്‍പ്പെട്ട തന്റെ ആരാധകരുടെ കാര്യത്തില്‍ വലിയ ആശങ്കയുള്ള സച്ചിന്‍ ടെണ്ടുല്‍ക്കര്‍ സെല്‍ഫിക്കൊപ്പം രണ്ട് ഉപദേശവും കൊടുത്തു. ഇനി ബൈക്ക് ഓടിക്കുമ്പോള്‍ ഹെല്‍മറ്റ് ധരിക്കണമെന്നാണ് ഈ രണ്ട് ആരാധകരോടും സച്ചിന്‍ ഉപദേശിച്ചത്.
സച്ചിന്റെ ഈ ആരാധക സ്‌നേഹം കണ്ടു ഫെയ്‌സ്ബുക്ക് പേജില്‍ ചറപറ ലൈക്കും കമന്റും ഷെയറും വന്നിട്ടുണ്ടെന്നാണ് റിപ്പോര്‍ട്ടുകള്‍. ഇത്രയും വലിയ താരമായിട്ടു പോലും ഇങ്ങനെയുള്ള കാര്യങ്ങളില്‍ അദ്ദേഹത്തിന് ആശങ്കയുണ്ടല്ലോ എന്ന് വരെ കമന്റുകളുണ്ട്. ഈ വീഡിയോ പങ്കുവെച്ച ശേഷം ലോകത്തിന് മൊത്തമായിട്ടും സച്ചിന്റെ വക ഉപദേശമുണ്ട്. ഹെല്‍മറ്റില്ലാതെ ആരും ഇരുചക്രവാഹനം ഓടിക്കരുതെന്ന് പറഞ്ഞാണ് വീഡിയോ സച്ചിന്‍ പോസ്റ്റ് ചെയ്തിരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
