എത്ര സുന്ദരമാണ് മന്ദാനയുടെ ഷോട്ടുകള്‍, ലേഡി സൂപ്പര്‍ സ്റ്റാറിനെ വാഴ്ത്തി ക്രിക്കറ്റ് ലോകം

അതിവേഗ അര്‍ധശതകവുമായി ഒരിക്കല്‍ കൂടി ക്രിക്കറ്റ് പ്രേമികളുടെ മനസ് കീഴടക്കി ഇന്ത്യയുടെ ലേഡി സൂപ്പര്‍സ്റ്റാര്‍
എത്ര സുന്ദരമാണ് മന്ദാനയുടെ ഷോട്ടുകള്‍, ലേഡി സൂപ്പര്‍ സ്റ്റാറിനെ വാഴ്ത്തി ക്രിക്കറ്റ് ലോകം

ടോണ്ടന്‍: ആറ് ഓവറായി വെട്ടിച്ചുരുക്കിയിരുന്നു കളി. പക്ഷേ മന്ദാനയുടെ ബാറ്റിനെ ആ സമ്മര്‍ദ്ദം പിടികൂടിയതേയില്ല. അതിവേഗ അര്‍ധശതകവുമായി ഒരിക്കല്‍ കൂടി ക്രിക്കറ്റ് പ്രേമികളുടെ മനസ് കീഴടക്കി ഇന്ത്യയുടെ ലേഡി സൂപ്പര്‍സ്റ്റാര്‍. 

18 പന്തില്‍ മന്ഥാന അര്‍ധ ശതകത്തിലേക്ക് എത്തിയപ്പോള്‍ ഇത്രയും ഭംഗിയായി മറ്റ് ഏത് വനിതാ താരം അതിര്‍ത്തിക്ക് മുകളിലൂടെ പന്ത് പായിക്കും എന്നായിരുന്നു ആരാധകരുടെ ചോദ്യം. കെഐഎ സൂപ്പര്‍ ലീഗിലായിരുന്നു മന്ഥാനയുടെ വെടിക്കെട്ട്. 

ലീഗില്‍ കളിക്കുന്ന ഏക ഇന്ത്യന്‍ താരമാണ് മന്ദാന. ലഫ്ബറോ ലൈറ്റ്‌നിങ്ങിനെതിരെ വെസ്റ്റേണ്‍ സ്റ്റോമിന് വേണ്ടിയായിരുന്നു മന്ഥാന തകര്‍ത്തടിച്ചത്. മഴമൂലം ആറ് ഓവറായി മത്സരം വെട്ടിച്ചുരിക്കിയപ്പോള്‍ വെസ്‌റ്റേണ്‍ സ്റ്റോം മന്ദാനയുടെ ഇന്നിങ്‌സ് ബലത്തില്‍ 85 റണ്‍സ് എടുത്തു. 

അഞ്ച് ബൗണ്ടറിയും നാല് സിക്‌സുമാണ് മന്ഥാനയുടെ ബാറ്റില്‍ നിന്നും വിരിഞ്ഞത്. മറുപടി ബാറ്റിങ്ങിന് ഇറങ്ങിയ ലഫ്ബറോ ലൈറ്റ്‌നിങ്ങിന് 18 റണ്‍സ് അകലെ പരാജയം സമ്മതിക്കേണ്ടി വന്നു. 21 പന്തില്‍ 46 റണ്‍സ് എടുത്ത കീവീസ് താരം സോഫി ഡിവൈന്റെ റെക്കോര്‍ഡാണ് മന്ദാന കടപുഴക്കിയെറിഞ്ഞത്. 

2015ല്‍ ഇന്ത്യക്കെതിരെയായിരുന്നു സോഫിയുടെ വെടിക്കെട്ട്. പക്ഷേ അന്ന് സോഫിയുടെ ഇന്നിങ്‌സിന് ന്യൂസിലാന്‍ഡ് ടീമിനെ ജയത്തിലേക്ക് എത്തിക്കാനായില്ല. കെഎസ്എല്ലില്‍ ഒരു സീസണില്‍ ഏറ്റവും കൂടുതല്‍ സിക്‌സ് നേടുന്ന താരമെന്ന റെക്കോര്‍ഡും വെറും മൂന്ന് ഇന്നിങ്‌സുകള്‍ കൊണ്ട മന്ദാന തന്റെ പേരിലാക്കി. 

ഒന്‍പത് സിക്‌സ് വീതം നേടി സ്റ്റെഫാനി, റേച്ചല്‍ പ്രീസ്റ്റ് എന്നിവരുടെ റെക്കോര്‍ഡാണ് മന്ഥാന നിഷ്പ്രയാസം തകര്‍ത്തത്. ഈ വര്‍ഷം തന്നെ ഇത് മൂന്നാം തവണയാണ് മന്ദാനയുടെ ബാറ്റില്‍ നിന്നും അതിവേഗ സെഞ്ചുറി പിറക്കുന്നത്. ഓസീസിനെതിരെ 30 പന്തിലും, ഇംഗ്ലണ്ടിനെതിരെ 25 പന്തിലും മന്ദാന അര്‍ധശതകം പിന്നിട്ടിരുന്നു.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com