മോസ്ക്കോ: ജയത്തോടെ പ്രീ ക്വാര്ട്ടര് ഉറപ്പിക്കാന് ഒരുങ്ങിയിറങ്ങിയ മെക്സിക്കോ ദക്ഷിണ കൊറിയക്കെതിരേ രണ്ട് ഗോളിന് മുന്നില്. സൂപ്പര് താരം ജാവിയര് ഹെര്ണാണ്ടസാണ് 66ാം മിനുട്ടില് മെക്സിക്കോയുടെ ലീഡുയര്ത്തിയത്. നേരത്തെ ആദ്യ പകുതിയില് പിരിയുമ്പോള് ഒരു ഗോളിന് മുന്നിലായിരുന്നു മെക്സിക്കോ. 26ാം മിനുട്ടില് ലഭിച്ച പെനാല്റ്റി വലയിലെത്തിച്ചാണ് മെക്സിക്കോ അക്കൗണ്ട് തുറന്നത്. കിക്കെടുത്ത കാര്ലോസ് വേല ഒരു പഴുതും അനുവദിക്കാതെ പന്ത് വലയിലാക്കി. ആദ്യ മത്സരത്തില് ലോക ചാംപ്യന്മാരായ ജര്മനിയെ അട്ടിമറിച്ച് വിജയിച്ച മെക്സിക്കോയ്ക്ക് ഈ മത്സരത്തിലും വിജയം സ്വന്തമായാല് പ്രീ ക്വാര്ട്ടര് ഉറപ്പിക്കാം.
തുടക്കം മുതല് ആക്രമിച്ച് കളിച്ച മെക്സിക്കോ ഗോളെന്നുറച്ച അവസരങ്ങള് സൃഷ്ടിക്കുന്നതില് വിജയിച്ചു. മറുഭാഗത്ത് ദക്ഷിണ കൊറിയ മത്സരത്തിന്റെ താളത്തിലേക്ക് പതിയെയാണ് എത്തിയത്. മികച്ച ഒന്നുരണ്ട് മുന്നേറ്റങ്ങള് സൃഷ്ടിച്ച് മെക്സിക്കോയെ വിറപ്പിക്കാനും അവര്ക്ക് സാധിച്ചു. 39ാം മിനുട്ടില് കൊറിയ മികച്ചൊരു കൗണ്ടര് അറ്റാക്കിലൂടെ വല ചലിപ്പിക്കാന് ശ്രമിച്ചെങ്കിലും ഗോള് കീപ്പര് ഗില്ലേര്മോ ഒചോവ രക്ഷകനായി. ആദ്യ പകുതിയുടെ അവസാന ഘട്ടങ്ങളില് കൊറിയ ഗോളവസരങ്ങള് ഒരുക്കിയെങ്കിലും ഫിനിഷിങിലെ പോരായ്മ തിരിച്ചടിയായി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ