തിരുവനന്തപുരം: വീട്ടമ്മയെ പീഢിപ്പിച്ച കേസില്‍ റിമാന്‍ഡില്‍ കഴിയുന്ന എം വിന്‍സെന്റ് എംഎല്‍എയുടെ ജാമ്യാപേക്ഷയില്‍ ഓഗസ്റ്റ് ഏഴിന് വിധി പറയും. ജില്ലാ സെഷന്‍സ് കോടതിയിലാണ് കേസ്. കീഴ്‌ക്കോടതി ജാമ്യാപേക്ഷ തള്ളിയതിനെ തുടര്‍ന്നാണ് വിന്‍സെന്റ് സെഷന്‍സ് കോടതിയെ സമീപിച്ചത്.
എന്നാല്‍ വിന്‍സെന്റിന് ജാമ്യം നല്‍കുന്നത് പ്രോസിക്യൂഷന്‍ ശക്തമായി എതിര്‍ത്തിട്ടുണ്ട്. ജാമ്യം ലഭിക്കുന്നത് കേസന്വേഷണത്തെ ബാധിക്കുമെന്നും ക്രമസമാധാന പ്രശ്‌നങ്ങള്‍ ഉണ്ടാകാന്‍ സാധ്യതയുണ്ടെന്നുമായിരുന്നു പ്രോസിക്യൂഷന്റെ വാദം.
തന്നെ വീട്ടില്‍ കയറി പീഡിപ്പിച്ചെന്നും ഭീഷണിപ്പെടുത്തിയെന്നും കാട്ടിയായിരുന്നു വീട്ടമ്മ എംഎല്‍എയ്‌ക്കെതിരെ പരാതി നല്‍കിയത്. വീട്ടമ്മയുടെ പരാതിയെ തുടര്‍ന്ന് ജൂലൈ 22ന് വിന്‍സെന്റിനെ പോലീസ് അറസ്റ്റ് ചെയ്തു. ജൂലൈ 26 ന് നെയ്യാറ്റിന്‍കര മജിസ്‌ട്രേറ്റ് കോടതി വിന്‍സെന്റിന്റെ ജാമ്യാപേക്ഷ തള്ളി. തുടര്‍ന്നാണ് സെഷന്‍സ് കോടതിയെ സമീപിച്ചത്. കൊല്ലം സിറ്റി പൊലീസ് കമ്മീഷണര്‍ അജിതാ ബീഗമാണ് ഈ കേസന്വേഷിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
