ആലപ്പുഴ : ആലപ്പുഴ ജില്ലയിലെ മണ്ണഞ്ചേരിയില്‍ കിണര്‍ വൃത്തിയാക്കാന്‍ ഇറങ്ങിയ രണ്ടു പേര്‍ ശ്വാസംമുട്ടി മരിച്ചു. പൊന്നാട് അമ്പലക്കടവില്‍ കിണറ്റിനകത്ത് ഇറങ്ങിയ രണ്ട് തൊഴിലാളികളാണ് വിഷവാതകം ശ്വസിച്ച് മരിച്ചത്. മുഹമ്മ സ്വദേശി അമല്‍, കണിച്ചുകുളങ്ങര സ്വദേശി ഗിരീഷ് എന്നിവരാണ് മരിച്ചത്. ഇവരെ രക്ഷപ്പെടുത്താന്‍ കിണറ്റിലിറങ്ങിയ മൂന്നു പേര്‍ക്ക് പരിക്കേറ്റു.
അമ്പലക്കടവില്‍ ഹമീദ് എന്ന വ്യക്തിയുടെ ഉടമസ്ഥതയിലുള്ള പൊന്നാടന്‍ ലൈം ഇന്‍ഡസ്ട്രിയുടെ വളപ്പിലെ കിണറ്റിലാണ് അപകടമുണ്ടായത്. കിണര്‍ വൃത്തിയാക്കി, കുഴല്‍ക്കിണറിനുള്ള പൈപ്പ് താഴ്ത്തിയ ഉടനെ വെള്ളം പുറത്തേക്കു വരികയായിരുന്നു. ഒപ്പം ദുര്‍ഗന്ധം നിറഞ്ഞ വാതകവും പുറത്തേക്കു വന്നു.
ഇതേത്തുടര്‍ന്ന് ശ്വാസം മുട്ടിയാണ് രണ്ടുപേരും മരിച്ചത്. ഇവരെ രക്ഷിക്കാന്‍ കിണറ്റിലേക്കിറങ്ങിയ രണ്ടു പേരെ നാട്ടുകാര്‍ രക്ഷപ്പെടുത്തി. മൃതദേഹങ്ങള്‍ ആലപ്പുഴ മെഡിക്കല്‍ കോളേജ്, ജില്ലാ ആശുപത്രി എന്നിവിടങ്ങളിലേക്ക് മാറ്റി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
