മാണിയുമായി വേദി പങ്കിടാനില്ല, വിഎസ് മാണി പങ്കെടുക്കുന്ന സെമിനാറില്‍ നിന്നും പിന്മാറി
തൃശൂര്‍: സിപിഎം സംസ്ഥാന സമ്മേളനത്തിന്റെ അനുബന്ധമായി നടക്കുന്ന കെ.എം.മാണി പങ്കെടുക്കുന്ന സെമിനാറില്‍ നിന്നും വി.എസ്.അച്യുതാനന്ദന്‍ പിന്മാറി. മാണി പങ്കെടുക്കുന്ന സെമിനാറിന്റെ അധ്യക്ഷ സ്ഥാനത്ത് നിന്നും മാറിയ വിഎസ് മറ്റൊരു സെമിനാറിന്റെ അധ്യക്ഷ പദവി ഏറ്റെടുത്തു.
കെ.എം.മാണിയെ ഇടതു മുന്നണിയിലേക്ക് എടുക്കുന്ന കാര്യം സിപിഎം സംസ്ഥാന സമ്മേളനത്തില്‍ ആലോചിക്കരുതെന്ന് ചൂണ്ടിക്കാട്ടി വിഎസ് സിപിഎം ജനറല്‍ സെക്രട്ടറി സീതാറാം യെച്ചൂരിക്ക് കത്ത് നല്‍കിയിരുന്നു. ഇതിന് പിന്നാലെയാണ് മാണി പങ്കെടുക്കുന്ന സെമിനാറില്‍ നിന്നുമുള്ള പിന്മാറ്റം.
കേരളം, ഇന്നലെ, ഇന്ന്, നാളെ എന്ന വിഷയത്തിലെ സെമിനാറിലാണ് കെ.എം.മാണിയും, കേരള കോണ്‍ഗ്രസിന്റെ വരവിനെ എതിര്‍ക്കുന്ന സിപിഐ സംസ്ഥാന സെക്രട്ടറി കാനം രാജേന്ദ്രനും പങ്കെടുക്കുന്നത്. ഇതിലാദ്യം വിതരണം ചെയ്ത കാര്യപരിപാടിയില്‍ അധ്യക്ഷ സ്ഥാനത്ത് വിഎസിന്റെ പേരായിരുന്നു നല്‍കിയിരുന്നത്. എന്നാല്‍ വ്യാഴാഴ്ച ഉദ്ഘാടന പരിപാടിക്കിടെ വിതരണം ചെയ്ത കാര്യപരിപാടിയുടെ നോട്ടീസില്‍ വിഎസിന്റെ പേരില്ല. ശനിയാഴ്ച നടക്കുന്ന നവലിബറല്‍ നയങ്ങളുടെ കാല്‍ നൂറ്റാണ്ട് എന്ന സെമിനാറില്‍ വിഎസിന്റെ പേര് ഉള്‍പ്പെടുത്തിയിട്ടുമുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
