തിരുവനന്തപുരം: നിപ്പാ രണ്ടാം ഘട്ടം സംബന്ധിച്ച് സംസ്ഥാനത്ത് ഭയപ്പെടേണ്ട സാഹചര്യമില്ലെന്ന് ആരോഗ്യമന്ത്രി കെ. കെ. ശൈലജ. മുഖ്യമന്ത്രിയുടെ അധ്യക്ഷതയില് ചേര്ന്ന അവലോകന യോഗത്തില് വീഡിയോ കോണ്ഫറന്സിങ് വഴി പ്രതികരിക്കുകയായിരുന്നു അരോഗ്യമന്ത്രി.ജൂണ് പകുതിയോടെ ആശങ്കകള്ക്ക് വിരാമമാകുമെന്നും യോഗം വിലയിരുത്തി.
ജൂണ് 30 വരെ നിരീക്ഷണം തുടരുമെന്ന് മന്ത്രി കെ. കെ ശൈലജ മാധ്യമങ്ങളോട് പറഞ്ഞു. വളരെയധികം ശ്രദ്ധിക്കേണ്ട സമയമാണ് ജൂണ് 30 വരെയുള്ള കാലഘട്ടം. ഇതിനിടെ ചെറിയ വീഴ്ചപോലും സംഭവിക്കാതിരിക്കാനാണ് ശ്രദ്ധിക്കുന്നത്. ഭയപ്പെടേണ്ട സാഹചര്യം സംസ്ഥാനത്തില്ലെന്നും മന്ത്രി പറഞ്ഞു.
അതിനിടെ, നിപ്പ വൈറസ് ബാധ സംശയിച്ച് നിരീക്ഷണത്തില് കഴിയുന്നവര്ക്ക് ഭക്ഷ്യധാന്യ കിറ്റുകള് അടക്കമുള്ളവ വിതരണം ചെയ്യാന് മുഖ്യമന്ത്രിയുടെ അധ്യക്ഷതയില് ചേര്ന്ന അവലോകന യോഗത്തില് തീരുമാനമായി. നിരീക്ഷണത്തില് കഴിയുന്നവര് വീടുകളില്തന്നെ കഴിയേണ്ടിവരുന്ന സാഹചര്യത്തിലാണ്. ഭക്ഷ്യധാന്യ കിറ്റുകള് വിതരണം ചെയ്യുന്നത് സംബന്ധിച്ച നിര്ദ്ദേശം കോഴിക്കോട്, മലപ്പുറം ജില്ലാ കളക്ടര്മാര്ക്ക് നല്കും. തിങ്കളാഴ്ച ചേരുന്ന സര്വകക്ഷി യോഗത്തിന് മുന്നോടിയായാണ് തിരുവനന്തപുരത്ത് മുഖ്യമന്ത്രിയുടെ അധ്യക്ഷതയില് അവലോകന യോഗം ചേര്ന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ