തിരുവനന്തപുരം : കെഎസ്ആര്ടിസി ബസുകളില് യാത്രക്കാര് നിന്ന് യാത്ര ചെയ്യുന്നത് വിലക്കിയ ഹൈക്കോടതി ഉത്തരവിനെതിരെ റിവ്യൂ ഹര്ജി നല്കുമെന്ന് ഗതാഗതമന്ത്രി എ കെ ശശീന്ദ്രന്. യാത്രക്കാരുടെ പ്രയാസങ്ങള് പരിഹരിക്കാന് സര്ക്കാര് ശ്രമിക്കുമെന്നും മന്ത്രി വ്യക്തമാക്കി.
കെഎസ്ആര്ടിസി സൂപ്പര് ഫാസ്റ്റ്, എക്സ്പ്രസ് ബസുകളില് യാത്രക്കാരെ നിര്ത്തി കൊണ്ടുപോവുന്നത് വിലക്കികൊണ്ടാണ് ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ചിന്റെ ഉത്തരവ്. ഉയര്ന്ന ചാര്ജ് നല്കി യാത്ര ചെയ്യുന്നവര്ക്ക് ഇരുന്നു യാത്ര ചെയ്യാനുള്ള അവകാശമുണ്ടെന്ന് ചൂണ്ടിക്കാട്ടിയാണ് ഹൈക്കോടതി ഉത്തരവ്.
മോട്ടോര് വാഹന ചട്ടത്തിലെ വകുപ്പുകള് അനുസരിച്ച് സൂപ്പര് ഫാസ്റ്റും എക്സ്പ്രസും ഉള്പ്പെടെയുള്ള ലക്ഷ്വറി ബസുകളില് യാത്രക്കാരെ നിര്ത്തി യാത്ര ചെയ്യിക്കാനാവില്ലെന്നു ചൂണ്ടിക്കാട്ടി സമര്പ്പിക്കപ്പെട്ട ഹര്ജിയിലാണ് ഹൈക്കോടതിയുടെ ഉത്തരവ്. മോട്ടോര്വാഹന ചട്ടം കര്ശനമായി കെഎസ്ആര്ടിസി പാലിക്കണമെന്ന് ഉത്തരവില് നിര്ദേശിച്ചിട്ടുണ്ട്. കെഎസ്ആര്ടിസിക്ക് വന് നഷ്ടമുണ്ടാക്കുന്നതാണ് കോടതി വിധിയെന്ന് ചൂണ്ടിക്കാണിക്കപ്പെടുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ