ചെങ്ങന്നൂര്‍: കെ.എം മാണി വെറുക്കപ്പെട്ട രാഷ്ട്രീയത്തിന്റെ പ്രതീകമാണെന്ന നിലപാടില്‍ നിന്ന് മലക്കം മറിഞ്ഞ് സിപിഐ ദേശീയ നിര്‍വാഹക സമിതി അംഗം ബിനോയ് വിശ്വം. ചെങ്ങന്നൂരില്‍ എല്ലാവരുടേയും വോട്ട് സ്വീകരിക്കുമെന്നും അദ്ദേഹം പറഞ്ഞു. എല്ലാവോട്ടും സ്വീകരിക്കണമെന്ന കാര്യത്തില്‍ എല്‍ഡിഎഫില്‍ ഭിന്നാഭിപ്രായമില്ലെന്നും അദ്ദേഹം പറഞ്ഞു. നേരത്തെ ചെങ്ങന്നൂരില്‍ കെ.എം മാണിയുടെ വോട്ട് വേണ്ടെന്ന് പറഞ്ഞ സിപിഐ സംസ്ഥാന സെക്രട്ടറി കാനം രാജേന്ദ്രനും നിലപാട് മയപ്പെടുത്തിയിരുന്നു. ആരുടേയും വോട്ട് വേണ്ടെന്ന് പറഞ്ഞിട്ടില്ലെന്ന് അദ്ദേഹം പറഞ്ഞിരുന്നു.
കെ.എം മാണി വെറുക്കപ്പെട്ട രാഷ്ട്രീയത്തിന്റെ പ്രതീകമാണ് എന്നായിരുന്നു സിപിഐ പാര്‍ട്ടി കോണ്‍ഗ്രസ് വേദിയില്‍ ബിനോയ് വിശ്വത്തിന്റെ പ്രസ്താവന. മാണിയുടെ വോട്ടു വേണ്ടെന്നു ഘടകകക്ഷി പ്രഖ്യാപിക്കേണ്ടെന്നു കോടിയേരി പറഞ്ഞതിനെക്കുറിച്ചുള്ള ചോദ്യത്തിന് മറുപടിയായാണ് അദ്ദേഹം ഇത് പറഞ്ഞത്. എല്‍ഡിഎഫിന്റെ ഭാഗമായി മാണി മാറുന്നത് അംഗീകരിക്കാന്‍ കഴിയില്ല. അത് ഇടതുമുന്നണിയുടെ പ്രതിച്ഛായ തകര്‍ക്കുമെന്നും അദ്ദേഹം പറഞ്ഞിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
