തിരുവനന്തപുരം: സർക്കാർ വകുപ്പുകളിൽ പുതിയ കാറുകൾ വാങ്ങുന്നതിന് നിയന്ത്രണം ഏർപ്പെടുത്തി ധനവകുപ്പ്. പകരം അഞ്ച് വർഷത്തേക്ക്
വാഹനം വാടകയ്ക്ക് എടുക്കാനാണ് ധനവകുപ്പിന്റെ നിർദേശം. ഇത് സംബന്ധിച്ച ഉത്തരവ് കഴിഞ്ഞദിവസം ധനവകുപ്പ് ഇറക്കി. ചെലവുകുറയ്ക്കൽ നടപടികൾ സംബന്ധിച്ച കഴിഞ്ഞ ബജറ്റിലെ പ്രഖ്യാപനത്തിന്റെ തുടർച്ചയായാണ് ധനവകുപ്പിന്റെ ഉത്തരവ്.
വകുപ്പുതലവന്മാർ, കലക്ടർ, എസ്.പി, ജില്ല ജഡ്ജി എന്നിവരോ അതിന് മുകളിലുള്ള തസ്തികയിലോ ഉള്ള ഒാഫിസർമാർക്ക് മാരുതി സിയാസ്, ഹോണ്ട സിറ്റി, ടാറ്റ നെക്സൺ പോലെ പ്രീമിയം കാറുകൾ വാടകക്കെടുക്കാം. മറ്റെല്ലാ ഒാഫീസുകൾക്കും ഒാഫീസർമാർക്കും മഹീന്ദ്ര ബൊലേറോ, മാരുതി സുസുക്കി സ്വിഫ്റ്റ് ഡിസയർ, ഹോണ്ട അമേസ്, ടാറ്റ ഇൻഡിഗോ പോലെയുള്ള വാഹനങ്ങൾ വാടകക്കെടുക്കാനാണ് അനുമതി.
ബജറ്റ് പ്രഖ്യാപനത്തിന് ശേഷവും സർക്കാർ വകുപ്പുകൾ വിലകൂടിയ കാറുകൾ വ്യാപകമായി വാങ്ങിയിരുന്നു. മന്ത്രിമാർക്കും ചില കോർപറേഷനുകളുടെയും കമീഷന്റെയും മേധാവികൾക്ക് വേണ്ടിയും കാറുകൾ വാങ്ങിക്കൂട്ടി. ചില ഉദ്യോഗസ്ഥർ കാറുകൾ മോടിപിടിപ്പിക്കാൻ ടെൻഡർ വിളിക്കുന്ന സ്ഥിതിപോലും ഉണ്ടായി. ഈ സാഹചര്യത്തിൽ വാഹനചെലവ് കുത്തനെ കുറക്കുകയാണ് ഉത്തരവിലൂടെ സർക്കാർ ലക്ഷ്യമിടുന്നത്. പ്രളയക്കെടുതിയുടെ സാഹചര്യം കൂടി കണക്കിലെടുത്താണ് ധനവകുപ്പിന്റെ ഉത്തരവ്.
വകുപ്പുകളും സ്ഥാപനങ്ങളും വാഹനം വാടകക്കെടുക്കാൻ ധനവകുപ്പിന്റെ അനുമതി വേണമെന്ന് ഉത്തരവിൽ പറയുന്നു. ഡ്രൈവറുടെ തസ്തിക അനുവദിക്കാത്ത ഒാഫിസുകളിലേക്ക് പുതിയ വാഹനം വാങ്ങാൻ പാടില്ല. വാഹനം വേണമെങ്കിൽ ധനവകുപ്പിന്റെ അനുമതി തേടണം. ഡ്രൈവറുടെ തസ്തികയുള്ള വകുപ്പുകളിലും സ്ഥാപനങ്ങളിലും പഴയ വാഹനം ഒഴിവാക്കുകയോ മാറ്റുകയോ ചെയ്യണമെങ്കിലും ധനവകുപ്പിനെ അറിയിക്കണം. പഴയ വാഹനം കണ്ടം ചെയ്താൽ മാത്രമേ പുതിയത് വാങ്ങാൻ പാടുള്ളൂ.
അഞ്ച് വർഷത്തേക്ക് വാടകക്ക് എടുക്കുന്ന വാഹനം വേറെ ഉപയോഗിച്ചിട്ടില്ലാത്തതും മാസവാടക അടിസ്ഥാനത്തിലുമാകണം. കിലോമീറ്റർ നിരക്കിലും മണിക്കൂർ അടിസ്ഥാനത്തിലും വേണം വാടക കണക്കാക്കാൻ. വാഹനം വാടകക്ക് എടുക്കുന്നത് സുതാര്യമായിരിക്കണം. പ്രാദേശിക പത്രങ്ങളിലടക്കം രണ്ടാഴ്ചക്ക് മുമ്പ് അറിയിപ്പ് നൽകണം. വാഹനം ലഭ്യമാക്കുന്നവർ ഡ്രൈവറെ നൽകുകയും ഇന്ധനം, അറ്റകുറ്റപ്പണി എന്നിവ വഹിക്കുകയും വേണം. വാഹനത്തിന് തകരാർ വന്നാൽ അതേ നിലവാരത്തിലുള്ള വാഹനം പകരം നൽകണമെന്നും ധനവകുപ്പ് പുറത്തിറക്കിയ ഉത്തരവിൽ പറയുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ