സൗദി അറേബ്യയില്‍ ഇന്നുമുതല്‍ പൊതു മാപ്പ് പ്രാബല്യത്തില്‍ വരും. പതിനായിരക്കണക്കിന് ഇന്ത്യക്കാര്‍ പൊതുമാപ്പ് പ്രയോജനപ്പെടുത്തി നാട്ടിലേക്ക് മടങ്ങും. പൊതുമാപ്പുമായി ബന്ധപ്പെട്ട് സൗദി പാസ്‌പോര്‍ട്ട് വിഭാഗവും ഇന്ത്യന്‍ എംബസിയും എല്ലാം ഒരുക്കങ്ങള്‍ പൂര്‍ത്തിയാക്കി കഴിഞ്ഞു. നിയമലംഘിതര്‍ ഇല്ലാത്ത രാജ്യം എന്ന ക്യാമ്പയിന്റെ ഭാഗമായാണ് ഇത്തവണ സൗദി പൊതുമാപ്പ് പ്രഖ്യാപിച്ചിരിക്കുന്നത്. ഇന്നുമുതല്‍ മൂന്നുമാസം നീണ്ടു നില്‍ക്കുന്ന പൊതുമാപ്പില്‍ താമസ,തൊഴില്‍ നിയമങ്ങള്‍ ലംഘിച്ചു കഴിയുന്ന വിദേശികള്‍ക്ക് ശിക്ഷ കൂടാതെ നാട്ടില്‍ തിരിച്ചു പോകാന്‍ സാധിക്കും. നാട്ടിലേക്ക് മടങ്ങുന്ന ഇന്ത്യക്കാരെ സഹായിക്കാന്‍ ഇന്ത്യന്‍ എംബസിയും കോണ്‍സുലേറ്റും സൗദിയ്ല്‍ വ്യാപകമായി സഹായ ഓഫീസുകള്‍ തുറന്നിട്ടുണ്ട്. പാസ്‌പോര്‍ട്ടില്ലങ്കില്‍ ഈ ഓഫീസുകള്‍ വഴി താത്കാലിക യാത്രാ പാസ് വിതരകണം ചെയ്യും. ഇവ ഇരുപത്തിനാല് മണിക്കൂറും തുറന്നു പ്രവര്‍ത്തിക്കും. വിവിധ സംഘടനകള്‍ക്ക് കീഴിലും ഹെല്‍പ് ഡെസ്‌കുകള്‍ പ്രവര്‍ത്തിക്കുന്നുണ്ട്. പൊതുമാപ്പ് ലഭിച്ചവര്‍ താത്കാലിക യാത്രാ പാസുമായോ പാസ്‌പോര്‍ട്ടുമായോ സൗദി പാസ്‌പോര്‍ട്ട് വിഭാഗത്തെ സമീപിച്ചാല്‍ എക്‌സിറ്റ് പാസ് ലഭിക്കുന്നതാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
