ചര്‍മ്മസംരക്ഷണത്തിന് ഏറ്റവും മികച്ചതെന്ന വിവരണവുമായി നൂറുകണക്കിന് ഉത്പന്നങ്ങളാണ് വിപണിയില്‍ ലഭ്യമാകുന്നത്. ചര്‍മ്മം മിനുക്കാന്‍ ഇവയിലൊന്ന് തിരഞ്ഞെടുക്കുന്നതിന് മുന്‍പ് ചില കാര്യങ്ങള്‍ ശ്രദ്ധിക്കണമെന്നാണ് വിദഗ്ധരുടെ നിര്‍ദ്ദേശം. ഉത്പന്നത്തിന്റെ പേരു കണ്ട് നല്ലതാകാം എന്ന നിഗമനത്തില്‍ എത്തുന്നതിന് പകരം അവയില്‍ എന്തെല്ലാമാണ് അടങ്ങിയിരിക്കുന്നതെന്ന് കൃത്യമായി പരിശോധിക്കണമെന്നാണ് ഇവര്‍ നിര്‍ദ്ദേശിക്കുന്നത്.
വിപണിയില്‍ ലഭ്യമായ മിക്ക ഉത്പന്നങ്ങളിലും രാസവസ്തുക്കള്‍ അടങ്ങിയിട്ടുള്ളവയാകാം. കൃത്രിമ സുഗന്ധമുള്ള ഉത്പന്നങ്ങളില്‍ രാസവസ്തുക്കളുടെ അളവ് കൂടുതലായിരിക്കുമെന്നാണ് വിദഗ്ധര്‍ പറയുന്നത്. ഇത്തരം ഉത്പന്നങ്ങള്‍ ചര്‍മ്മത്തെ സംരക്ഷിക്കുന്നതിനുപകരം വിപരീതഫലമായിരിക്കും സമ്മാനിക്കുകയെന്നാണ് ഇവരുടെ മുന്നറിയിപ്പ്.
കൃത്രിമ നിറം ചേര്‍ത്തവയും ചര്‍മ്മത്തിന് ഹാനീകരമാണ്. ഇത്തരം ഉത്പന്നങ്ങള്‍ ശീലമാക്കിയാല്‍ അവ പലതരം അലര്‍ജികള്‍ക്കും കാരണമാകുമെന്നാണ് ഡോക്ടര്‍മാര്‍ പറയുന്നത്.
പാരബീന്‍സ് അടങ്ങിയിട്ടുള്ള ഉത്പന്നങ്ങളും ഒഴിവാക്കണമെന്നാണ് നിര്‍ദ്ദേശം. ഇവ പല സൗന്ദര്യവര്‍ദ്ധക വസ്തുക്കളിലും സ്ഥിരം കണ്ടുവരുന്നതാണെങ്കിലും ഇവയുടെ ഉപയോഗം ചര്‍മ്മത്തിന് നന്നല്ലെന്നാണ് പഠനങ്ങള്‍ തെളിയിച്ചിട്ടുള്ളത്. പാരബീന്‍ അടങ്ങിയിട്ടില്ലാത്ത ഉത്പന്നങ്ങള്‍ കണ്ടെത്താന്‍ കഴിഞ്ഞാല്‍ അതാണ് ഉത്തമം. തുടര്‍ച്ചയായി പാരബീന്‍ അടങ്ങിയ ഉത്പന്നങ്ങള്‍ ഉപയോഗിക്കുന്നത് ക്യാന്‍സര്‍ അടക്കമുള്ള രോഗങ്ങള്‍ക്ക് കാരണമാകുമെന്നും പറയപ്പെടുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
