വൈപ്പിൻ: കൊച്ചിൻ ഷിപ്പ്യാർഡും യുവജന സംഘടനയായ റൈസ് അപ്പ് ഫോറവും കൈകോർത്ത് എൻ്റെ കടൽ പദ്ധതിയുടെ രണ്ടാം ഘട്ടം കൊച്ചി ഫാൽക്കൺ ബീച്ചിൽ കേരളപിറവി ദിനമായ നവംബർ ഒന്നിന് രാവിലെ 7 മണിക്ക് നടത്തി. കേരളത്തിൻ്റെ കടൽതീരങ്ങൾ നവീകരിക്കുന്നതിന്റെയും സംരക്ഷിക്കുന്നതിൻ്റെയും ഭാഗമായി രൂപീകരിച്ച "എൻ്റെ കടൽ" പദ്ധതിയുടെ രണ്ടാം ഘട്ടം ഫലകം അനാച്ഛാദനം ചെയ്ത് കൊച്ചിൻ ഷിപ്പ്യാർഡ് സി എസ് ആർ ഹെഡ് സമ്പത്ത് കുമാർ ഉദ്ഘാടന കർമ്മം നിർവഹിച്ചു.

റൈസ് അപ്പ് ഫോറം എക്സിക്യൂട്ടീവ് അംഗം ആഷിഖ് മഹീൻ അദ്ധ്യക്ഷത വഹിച്ച പരിപാടിയിൽ പഞ്ചായത്ത് മെമ്പർ സ്വാതിഷ് സ്വാഗത പ്രസംഗം നടത്തുകയും റൈസ് അപ്പ് ഫോറം ബോർഡ് അംഗം സനൽ സുഹാസും കൊച്ചിൻ ഷിപ്പ്യാർഡ് സി എസ് ആർ മാനേജർ യൂസഫും ചേർന്ന വിദ്യാർത്ഥികൾക്ക് സർട്ടിഫിക്കറ്റ് വിതരണം നടത്തുകയും ചെയ്തു.

കൊച്ചി ഫാൽക്കൺ ബീച്ചിൽ ബെഞ്ചുകളും ഫിഷ് മോഡൽ വേസ്റ്റ്ബിനുകളും സന്ദർശകരെ ആകർഷിക്കുന്ന തരത്തിലുള്ള ഫോട്ടോപ്രമുകളും കുട്ടികൾക്കായുള്ള പ്ലേ ഏരിയ അടക്കം ഉള്ള സംവിധാനങ്ങളും സ്ഥാപിച്ചു. ഒപ്പം കടൽ തീരങ്ങൾ സംരക്ഷിക്കുന്നതിൻ്റെ ഭാഗമായി നടത്തിയ ബീച്ച് ക്ലീൻ അപ്പ് ഡ്രൈവ് മണിക്കൂറുകൾ നീണ്ടു. കൂടാതെ സെൻ്റ്. ആൽബെർട്ട് എൻ എസ് എസ് ടീമിൻ്റെയും, സെൻ്റ്.സെബാസ്റ്റ്യൻ യു. പി സ്കൂൾ വിദ്യാർത്ഥികളുടെയും കലാപരിപാടികൾ എൻ്റെ കടൽ പദ്ധതിക്ക് മോടികൂട്ടി.