വരാനിരിക്കുന്നത് കൊടും വേനല്‍; പഴങ്ങള്‍ വാങ്ങുമ്പോള്‍ കരുതല്‍ വേണം, കൃത്രിമമായി പഴുപ്പിച്ചവയെ തിരിച്ചറിയാം

വേനല്‍ക്കാലമാണ് വരുന്നത്. കഠിനമായ ചൂടിനെ ചെറുക്കാന്‍ പഴങ്ങള്‍ തന്നെയാണ് നല്ലത്. എന്നാല്‍ വിവിധ പ്രദേശങ്ങളില്‍ നിന്ന് കയറ്റി അയക്കുന്ന പഴങ്ങള്‍ പലപ്പോഴും കൃത്രിമമായി പഴിപ്പിച്ചവയാകാം. അത് ആരോഗ്യത്തിന് പല തരത്തിലുള്ള പ്രശ്നങ്ങള്‍ ഉണ്ടാക്കാം.

രാസവസ്തുക്കള്‍ കൊണ്ട് പഴുപ്പിച്ചവയെ തിരിച്ചറിയാം

സ്വാഭാവികമായി പഴുത്ത പഴങ്ങളുടെ പുറംഭാഗം ഒരേ നിറത്തിലാണ് കാണപ്പെടുക. എന്നാല്‍ കൃത്രിമമായി പഴുപ്പിച്ചവയുടെ പുറംഭാഗം പച്ചയും മഞ്ഞയും ഇടകലര്‍ന്ന നിറമായിരിക്കും.

പാടുകളും ചതവുകളും ഉള്ളവയോ മെഴുകിന്‍റെ കോട്ടിങ് ഉള്ളവയോ വാങ്ങുന്നത് പരമാവധി ഒഴിവാക്കാം. കൂടാതെ കൃത്രിമമായി പഴുത്തവ അമിതമായി സോഫ്റ്റായി കാണപ്പെടും.

കൃത്രിമമായി പഴുപ്പിച്ച മാമ്പഴം എങ്ങനെ തിരിച്ചറിയാം

മാമ്പഴം വാങ്ങിയ ശേഷം ഒരു ബക്കറ്റില്‍ വെള്ളമെടുത്ത് അതിലേക്ക് ഇടുക. കൃത്രിമമായി പഴുപ്പിച്ച മാങ്ങ പൊങ്ങിക്കിടക്കുകയും സ്വാഭാവികമായി പഴുത്തതാണെങ്കില്‍ അത് വെള്ളത്തില്‍ താഴ്ന്നുപോവുകയും ചെയ്യും. മാമ്പഴം കഴുകാനായി വെള്ളത്തിലിട്ട് വയ്ക്കുകയാണെങ്കില്‍ അതില്‍ ഒരു സ്പൂണ്‍ ബേക്കിങ് സോഡ കൂടി ചേര്‍ക്കുക. കഴുകി എടുത്തതിന് ശേഷം പഴത്തിന് നിറം മാറുകയാണെങ്കില്‍ അവയില്‍ രാസവസ്തുക്കള്‍ ഉപയോഗിച്ചിട്ടുണ്ട്.

ഫ്രൂട്സ് സാലഡ് ആരോഗ്യകരമാണ്, എന്നാല്‍ പഴങ്ങള്‍ തിരഞ്ഞെടുക്കുമ്പോള്‍ ഈ കോംമ്പോ ഒഴിവാക്കാം

കൃത്രിമമായി പഴുപ്പിച്ച ഏത്തക്ക എങ്ങനെ തിരിച്ചറിയാം

പ്രകൃതിദത്തമായി പഴുത്ത ഏത്തപ്പഴത്തിന് കറുപ്പ് അല്ലെങ്കില്‍ തവിട്ട് നിറമുള്ള തണ്ടുകളായിരിക്കും ഉണ്ടാവുക. എന്നാല്‍ കൃത്രിമമായി പഴുപ്പിച്ചെടുത്തതിന് പച്ച നിറമുള്ള തണ്ടുകള്‍ ഉണ്ടായിരിക്കും.പഴത്തിന്റെ ചിലഭാഗങ്ങള്‍ കട്ടിയായും കുറച്ചുഭാഗം മൃദുവായും കാണപ്പെടുകയാണെങ്കില്‍ അങ്ങനെയുള്ളവ വാങ്ങരുത്.