പകൽ സമയത്ത് ഉറക്കം വരാറുണ്ടോ?​

പകൽ സമയത്ത് ഇടയ്ക്കിടെ നിങ്ങൾക്ക് ഉറക്കം വരാറുണ്ടോ?​ ശരീരത്തിലെ ഊർജ്ജ നിലയിൽ ഗണ്യമായ കുറവ് സംഭവിക്കുമ്പോഴാണ് പകലുറക്കം തോന്നുന്നത്. ഹൈപ്പർസോമ്നിയ എന്നാണ് ഈ അവസ്ഥയെ പറയുന്നത്.

രാത്രിയിൽ ആവശ്യത്തിന് ഉറക്കം ലഭിച്ചാലും ഹൈപ്പർസോമ്നിയ വരാനുള്ള സാദ്ധ്യതയുണ്ട്. ദിവസം മുഴുവൻ ഉണർന്നിരിക്കാൻ 5 ടിപ്സ് നോക്കിയാലോ

കഫീൻ ഉപഭോഗം

കാപ്പി, ചായ, സോഡ പോലുള്ള പാനീയങ്ങൾ ഉണർന്നിരിക്കാൻ സഹായിക്കും. എന്നാൽ, അമിതമാകരുത്, ഇത് രാത്രി ഉറക്കത്തെ ബാധിക്കും. അതിനാൽ വൈകുന്നേരങ്ങളിൽ കഫീൻ കഴിക്കുന്നത് ഒഴിവാക്കാം.

ആരോഗ്യകരമായ ലഘുഭക്ഷണം

തൈര്, നട്സ്, നിലക്കടല വെണ്ണ, ധാന്യങ്ങൾ എന്നിവ പോലുള്ള നാരുകളും പ്രോട്ടീനും അടങ്ങിയ ലഘുഭക്ഷണങ്ങൾ ഇടയ്ക്ക് കഴിക്കുന്നത് ശരീരത്തിന് ഊർജ്ജം നൽകും.

ഉറക്കത്തിനുള്ള സമയക്രമം

പകൽ ഉറക്കം ഒഴിവാക്കുന്നതിനായി, നിങ്ങളുടെ ദിനചര്യ മെച്ചപ്പെടുത്തേണ്ടത് അത്യാവശ്യമാണ്. എല്ലാ ദിവസവും ഒരേ സമയം ഉറങ്ങാനും ഉണരാനും പരിശീലിക്കുന്നത് മികച്ച ഉറക്കം കിട്ടുന്നതിന് സഹായിക്കും.

ചെറിയ മയക്കം

പകൽ സമയത്ത് ഏകദേശം 10-20 മിനിട്ട് ചെറുതായൊന്ന് മയങ്ങുന്നത് ഉണർവ് വർദ്ധിപ്പിക്കാൻ സഹായിക്കും. എന്നാൽ കൂടുതൽ നേരം ഉറങ്ങുന്നത് രാത്രിയിലെ ഉറക്കത്തെ തടസ്സപ്പെടുത്തും.

ശാരീരിക പ്രവർത്തനങ്ങൾ

ജിമ്മിൽ കഠിനമായ വ്യായാമങ്ങൾ ചെയ്യുന്നില്ലെങ്കിൽ, 15 മിനിറ്റ് നടക്കുകയോ യോഗ പരിശീലിക്കുകയോ ചെയ്യുക, ഇത് അലസത കുറയ്ക്കാൻ സഹായിക്കും.