ഡയറ്റിനോട് മല്ലിടാതെ തടി കുറയ്ക്കാം, ചില ടിപ്സ്

അമിത ശരീരഭാരം നിരവധി അസുഖങ്ങള്‍ക്കുള്ള കോണിപ്പടിയാണ്. അനാരോഗ്യകരമായ ഭക്ഷണക്രമം, അസലമായ ജീവിത ശൈലി തുടങ്ങിയ ഘടകങ്ങളാണ് പൊണ്ണത്തടിക്കുള്ള പ്രധന ഘടകങ്ങള്‍.

വ്യായാമത്തിനൊപ്പം ഭക്ഷണത്തെ ക്രമീകരിക്കുക എന്നതാണ് പൊണ്ണത്തടി കുറയ്ക്കാനുള്ള ആദ്യപടി. എന്നാല്‍ ശരീരഭാരം കുറയ്ക്കുന്നതിനുള്ള കര്‍ശന ഡയറ്റ് പലരെയും പെട്ടെന്ന് ആ ദൗത്യത്തില്‍ നിന്ന് പിന്തിരിപ്പിക്കാന്‍ കാരണമാകും.

ഡയറ്റിങ് ഇല്ലാതെയും ശരീരഭാരം കുറയ്ക്കാം എന്ന് പറഞ്ഞാല്‍ വിശ്വസിക്കുമോ? ഭക്ഷണം കഴിക്കുമ്പോള്‍ ഇക്കാര്യങ്ങള്‍ ശീലക്കുന്നത് കര്‍ശനമായ ഡയറ്റ് പിന്തുടരാതെ തന്നെ നിങ്ങളുടെ ശരീരഭാരം നിയന്ത്രിക്കാന്‍ സഹായിക്കും.

ഭക്ഷണം ചവച്ചു കഴിക്കാം

തിടുക്കത്തില്‍ ഭക്ഷണം തീര്‍ക്കുന്ന ശീലം ഒഴിവാക്കാം. ഭക്ഷണം സമയമെടുത്ത് നന്നായി ചവച്ചു കഴിക്കുന്ന ദഹനം മെച്ചപ്പെടുത്തും. മാത്രമല്ല, അമിതമായി ഭക്ഷണം കഴിക്കുന്നതും ഇതിലൂടെ കുറയ്ക്കാന്‍ സാധിക്കും. ദീര്‍ഘനേരം വയറിന് സംതൃപ്തി നല്‍കുന്നതിലൂടെ അമിത വിശപ്പും ഒഴിവാക്കാം.

കുറച്ചു കഴിക്കുക

ഭക്ഷണം കഴിക്കുമ്പോള്‍ അവയുടെ അളവു വളരെ പ്രധാനമാണ്. ഭക്ഷണം കുറഞ്ഞ അളവില്‍ കഴിക്കുന്നത് കലോറിയുടെ എണ്ണം കുറയാനും സഹായിക്കും. ഇത് ശരീരഭാരം കുറയ്ക്കാനും ബ്ലഡ് ലിപിഡ് അളവു ക്രമീകരിക്കാനും സഹായിക്കും.

പ്രോട്ടീന്‍

ബ്രേക്ക്ഫാസ്റ്റിന് പ്രോട്ടീന്‍ സമൃദ്ധമായ ഭക്ഷണം ഉള്‍പ്പെടുത്തുന്നത് വയറിന് ദീര്‍ഘനേരം സംതൃപ്തി നല്‍കാനും അമിത വിശപ്പ് ഒഴിവാക്കാനും സഹായിക്കും. തൈര്, ബദാം, മീന്‍ തുടങ്ങിയ പ്രോട്ടീന്‍ ധാരാളം അടങ്ങിയ ഭക്ഷണം പ്രഭാത ഭക്ഷണത്തില്‍ ഉള്‍പ്പെടുത്താം.

ഫൈബര്‍

നാരുകള്‍ അടങ്ങിയ ഭക്ഷണം ഡയറ്റില്‍ ഉള്‍പ്പെടുത്തുന്നത് പോഷകങ്ങളുടെ ആഗിരണം ഫലപ്രദമാകാന്‍ സഹായിക്കും. കൂടാതെ ദഹനത്തിനും നല്ലതാണ്. ബീന്‍സ്, ഓട്‌സ്, ഫ്ലക്‌സ് വിത്തുകള്‍ പോലുള്ളവ ഭക്ഷണക്രമത്തില്‍ ഉള്‍പ്പെടുത്താം.

വെള്ളം

ശരീരത്തില്‍ ജലാംശം നിലനിര്‍ത്താനും വിഷവസ്തുക്കള്‍ പുറംന്തള്ളാനും അവയവങ്ങളുടെ പ്രവര്‍ത്തനത്തിനും വെള്ളം കുടിക്കേണ്ടത് അനിവാര്യമാണ്. ശരീരഭാരം ആരോഗ്യകരമായി കുറയ്ക്കുന്നതിനും വെള്ളം ഫലപ്രദമാണ്. ധാരാളം വെള്ളം കുടിക്കുന്നത് അമിത വിശപ്പും അമിതമായി ഭക്ഷണം കഴിക്കുന്നതും ഒഴിവാക്കാന്‍ സഹായിക്കും.