വെറും വയറ്റിലല്ല, ​ഗ്രീൻ ടീ കുടിക്കുമ്പോൾ ഈ 7 അബദ്ധങ്ങൾ ഒഴിവാക്കാം

​​​ഗ്രീൻ ടീയുടെ ​ആരോ​ഗ്യ ​ഗുണങ്ങൾ കേട്ട് അവയെ ഡയറ്റിൽ ഉൾപ്പെടുത്തിയ നിരവധി ആളുകളുണ്ട്. എന്നാൽ എത്ര കുടിച്ചിട്ടും ഉദ്ദേശിച്ച ഫലം കിട്ടിയില്ലെന്ന നിരാശയിൽ ​ഗ്രീൻ ടീ കുടിക്കുന്ന ശീലം പാടെ ഉപേക്ഷിച്ചവരുമുണ്ട്. എന്നാൽ നിങ്ങൾ ​ഗ്രീൻ ടീ ഉപയോ​ഗിച്ചിരുന്നത് ശരിയായ രീതിയിൽ തന്നെയാണോ? ​ഗ്രീൻ ടീ കുടിക്കുമ്പോൾ ഈ 7 അബദ്ധങ്ങൾ ഒഴിവാക്കാം.

വെറും വയറ്റിൽ ​ഗ്രീൻ ടീ

​മിക്കയാളുകളും ​ഗ്രീൻ ടീ കുടിച്ചു കൊണ്ടാണ് ദിവസം ആരംഭിക്കുന്നത്. എന്നാൽ ഇത് ആരോ​ഗ്യകരമല്ല. ​ഗ്രീൻ ടീയിൽ ടാനിനുകൾ അടങ്ങിയിട്ടുണ്ട്. ഇത് വയറ്റിൽ അസിഡിറ്റി വർധിപ്പിക്കും. ഇത് വയറ്റിൽ അസ്വസ്ഥത, ഓക്കാനം എന്നിവയിലേക്ക് നയിച്ചേക്കാം. ദഹന പ്രശ്നങ്ങൾ ഒഴിവാക്കുന്നതിന് ഭക്ഷണം കഴിച്ച ശേഷം ​ഗ്രീൻ ടി കുടിക്കുന്നതാണ് നല്ലത്.

അമിതമാകരുത്

​ഗ്രീൻ ടീയ്ക്ക് നിരവധി ആരോ​ഗ്യ​ഗുണങ്ങളുണ്ട്. എന്നാൽ അമിതമായാൽ ഒന്നും ആരോ​ഗ്യത്തിന് നല്ലതല്ല. അമിതമായി ​ഗ്രീൻ ടീ കുടിക്കുന്നത് ഉറക്കമില്ലായ്മ, ഉത്കണ്ഠ, ദഹന പ്രശ്നങ്ങൾ എന്നിവയ്ക്ക് കാരണമാകാം.

രാത്രി ​ഗ്രീൻ ടീ

​ഗ്രീൻ ടീയിലും കഫീൻ അടങ്ങിയിട്ടുണ്ട്. ഇത് രാത്രി കുടിക്കുന്നത് ഉറക്കചക്രത്തെ തടസപ്പെടുത്താം. അതിനാൽ ഉറങ്ങുന്നതിന് തൊട്ടു മുൻപുള്ള മണിക്കൂറുകളിൽ ​ഗ്രീൻ ടീ കുടിക്കുന്നത് ഒഴിവാക്കാം.

ഭക്ഷണത്തിന് പിന്നാലെ

ഭക്ഷണത്തിന് തൊട്ടു പിന്നാലെയും ​ഗ്രീൻ ടീ കുടിക്കരുത്. ഇത് ഭക്ഷണത്തിൽ നിന്നുള്ള ഇരുമ്പ് ആ​ഗിരണം തടസപ്പെടുത്തും. ഇത് കാലക്രമേണ വിളർച്ചയ്ക്ക് കാരണമാകാം. ഭക്ഷണം കഴിച്ചതിന് കുറഞ്ഞത് ഒരു മണിക്കൂറെങ്കിലും കാത്തിരുന്ന ശേഷം ​ഗ്രീൻ ടീ കുടിക്കാം.

ഗ്രീൻ ടീ തിളപ്പിക്കരുത്

​ഗ്രീൻ ടീ തിളപ്പിക്കുന്നത് അവയുടെ ​ഗുണങ്ങളെ നശിപ്പിക്കാനും കയ്പ്പു രുചിക്കും കാരണമാകുന്നു. വെള്ളം തിളപ്പിച്ച് ശേഷം താപനില 80 മുതൽ 85 വരെ ഡി​ഗ്രി സെൽഷ്യസിലേക്ക് താഴ്ത്തിയ ശേഷം ട്രീൻ ടീ ഉണ്ടാക്കാം.

മരുന്നുകൾ കഴിക്കുന്നുണ്ടെങ്കിൽ

രക്തം കട്ടി കുറയ്ക്കുന്ന മരുന്നുകൾ, ആന്റിഡിപ്രസന്റുകൾ, രക്തസമ്മർദ മരുന്നുകൾ എന്നിവയുൾപ്പെടുയുള്ള ചില മരുന്നുകളോട് ​ഗ്രീൻ ടീ പ്രതികരിച്ചേക്കാം. അത്തരം മരുന്നുകൾ കഴുക്കുന്നവർ ​ഗ്രീൻ ടീ ഒഴിവാക്കുന്നതാണ് നല്ലത്.

ടീ ബാ​ഗുകൾ

​ഗ്രീൻ ടീ ബാ​ഗുകൾ ഒന്നിൽ കൂടുതൽ തവണ ഉപയോ​ഗിക്കരുത്. ഉപയോ​ഗിച്ച ടീ ബാ​ഗുകൾ വീണ്ടും ഉപയോ​ഗിക്കുമ്പോൾ അവയുടെ സ്വദും ​ഗുണങ്ങളും നഷ്ടപ്പെടാൻ കാരണമാകുന്നു.