ചിരിയില്ലാത്ത ഒരു ദിവസം പാഴായ ദിവസമാണ് : ചാർളി ചാപ്ലിൻ

ചാർളി ചാപ്ലിന്റെ ഈ വാക്കുകൾ ഓർമ്മിപ്പിക്കുന്നത് ചിരിക്കും സന്തോഷത്തിനും ജീവിതത്തിലുള്ള സ്ഥാനമാണ്. എത്ര തിരക്കേറിയ ദിവസമായാലും മനസ്സുതുറന്ന് ചിരിക്കാൻ ഒരു നിമിഷമെങ്കിലും ലഭിച്ചാൽ ആ ദിവസം കൂടുതൽ മനോഹരമാകും

പ്രശ്നങ്ങൾ ഇല്ലാത്ത ജീവിതമല്ല സന്തോഷകരമായ ജീവിതം. പ്രശ്നങ്ങൾക്കിടയിലും ചെറിയ സന്തോഷങ്ങൾ കണ്ടെത്താനും ചിരിക്കാനും കഴിയുന്നതാണ് പ്രധാനം.

ഓഫീസിലെ തിരക്കിനും സമ്മർദ്ദത്തിനുമിടയിൽ സുഹൃത്തുക്കളുമായി ചെറിയ തമാശ പങ്കുവെച്ച് ചിരിക്കുന്ന ഒരു നിമിഷം പോലും മാനസിക സമ്മർദ്ദം കുറയ്ക്കാം. ആ ചെറിയ നിമിഷം ദിവസം മുഴുവൻ പോസിറ്റീവായി തുടരാൻ സഹായിച്ചേക്കാം.

ചാപ്ലിന്റെ വാക്കുകൾ ബുദ്ധിമുട്ടുകളെ പരിഹസിക്കുകയോ ചെറുതായി കാണുകയോ അല്ല. മറിച്ച്, ജീവിതത്തിലെ പ്രതിസന്ധികൾക്കിടയിലും പ്രതീക്ഷയും ഹാസ്യബോധവും നഷ്ടപ്പെടുത്തരുതെന്ന സന്ദേശം നൽകുകയാണ്.

ചിരി ശരീരത്തിന്റെയും മനസ്സിന്റെയും ടെൻഷൻ കുറയ്ക്കാൻ സഹായിക്കുന്ന ഒരു സ്വാഭാവിക പ്രതികരണമാണ്. അതുകൊണ്ടുതന്നെ ദിവസത്തിൽ സന്തോഷകരമായ കാര്യങ്ങൾക്കായി കുറച്ച് സമയം മാറ്റിവയ്ക്കുന്നത് നല്ല ശീലമാണ്.

ലോക സിനിമയിലെ ഏറ്റവും പ്രശസ്തരായ ഹാസ്യനടന്മാരിലും സംവിധായകരിലും ഒരാളായിരുന്നു ചാർളി ചാപ്ലിൻ. 1889-ൽ ലണ്ടനിൽ ജനിച്ച അദ്ദേഹം നിശ്ശബ്ദ സിനിമയുടെ കാലഘട്ടത്തിൽ സിനിമയെ ജനകീയമാക്കി. തന്റെ ‘ദ ട്രാംപ്’ എന്ന കഥാപാത്രത്തിലൂടെയാണ് ലോകപ്രശസ്തനായത്.

ചാപ്ലിന്റെ സിനിമകൾ വെറും തമാശകളിൽ ഒതുങ്ങിയിരുന്നില്ല. ദാരിദ്ര്യം, ഏകാന്തത, സാമൂഹിക അസമത്വം, മനുഷ്യന്റെ അതിജീവനം തുടങ്ങിയ ഗൗരവമുള്ള വിഷയങ്ങളെ അദ്ദേഹം ഹാസ്യത്തിലൂടെ അവതരിപ്പിച്ചു. ദ കിഡ്, സിറ്റി ലൈറ്റ്സ്, മോഡേൺ ടൈംസ്, ദ ​ഗ്രേറ്റ് ഡിക്‌ടേറ്റർ തുടങ്ങിയവ അദ്ദേഹത്തിന്റെ ശ്രദ്ധേയമായ സിനിമകളാണ്.