ഗിബ്ലി മുതൽ ഗ്രോക്ക് വരെ: ജെൻ സീ ഹിറ്റാക്കിയ 2025ലെ AI ട്രെൻഡുകൾ

ഈ വർഷം ജെൻസി പിള്ളേരുടേയും ആർട്ടിഫിഷ്യൽസ് ഇന്റലിജെൻസിന്റെയും കാലമായിരുന്നു എന്ന് തന്നെ വേണം പറയാൻ.

ഈ രണ്ട് കോമ്പോയും സമൂഹത്തിൽ ഉണ്ടാക്കിയ ഓളം വേറെതന്നെയാണ്.

എന്തിനും ഏതിനും ആർട്ടിഫിഷ്യൽസ് ഇന്റലിജെന്സിനെ ഉപയോ​ഗിക്കുന്ന ജെൻസിപിള്ളേർ സോഷ്യൽമീഡിയയിൽ ഹിറ്റാക്കിയ ചില ടെക് ട്രെൻഡുകൾ നോക്കാം.

സ്റ്റുഡിയോ ഗിബ്ലി

ക്ലാസിക് ബോളിവുഡ് രംഗങ്ങള്‍ മുതല്‍ വൈറല്‍ മീമുകള്‍ വരെ ഗിബ്ലി അനിമേഷന്‍ മോഡിലൂടെ ഈ വർഷം ട്രെൻഡായി. ഈ ട്രെന്‍ഡിങ്ങിനു കാരണം ഓപ്പൺഎഐയുടെ ChatGPT-4o പുറത്തിറക്കിയ പുതിയ ഫീച്ചറാണ്. ഇത് ഉപയോഗിച്ച് ഉപയോക്താക്കൾക്ക് പുതിയ ചിത്രങ്ങൾ സൃഷ്ടിക്കാനും അവരുടെ ചിത്രങ്ങളെ ജാപ്പനീസ് അനിമേഷന്‍ സ്റ്റൈലിലേക്ക് മാറ്റാനും കഴിയുന്നു.

സാരി ട്രെൻഡ്

ചാറ്റ് ജിപിടിയിലെ ഗിബ്ലി സ്റ്റൈല്‍ ചിത്രങ്ങള്‍ വൈറലായി മാസങ്ങള്‍ക്ക് ശേഷം ട്രെൻഡായ എഐ ഫീച്ചറാണിത്. പെൺകുട്ടികൾ ഗൂഗിളിന്റെ നാനോ ബനാന ഇമേജ് ജനറേറ്റർ ടൂളിന്റെ സഹായത്തോടെ 90 കളില്‍ പ്രചാരത്തിലുണ്ടായിരുന്ന സാരി സ്റ്റൈലില്‍ അവരുടെ ചിത്രങ്ങൾ സൃഷ്ടിക്കുന്ന രീതിയാണിത്.

നാനോ ബനാന ട്രെൻഡ്

ഒരു ഫോട്ടോയും ചെറിയൊരു ടെക്സ്റ്റ് പ്രോംപ്റ്റും ഉപയോഗിച്ച് ഉപയോക്താക്കൾക്ക് ഹൈപ്പർ-റിയലിസ്റ്റിക് 3D രൂപങ്ങൾ നിർമ്മിക്കാൻ അവസരമൊരുക്കുന്നു എന്നതായിരുന്നു ഈ ട്രെൻഡിന്റെ പ്രത്യേകത. തങ്ങളുടെയോ, സെലിബ്രിറ്റികളുടെയോ, വളർത്തുമൃഗങ്ങളുടെയോ ചിത്രങ്ങൾ ഈ രൂപത്തിൽ നിർമിക്കാനാകും.

ടൈം ട്രാവൽ പോർട്രെയ്‌റ്റുകളും വൈകാരിക AI യും

AI യുടെ ഏറ്റവും ഹൃദയസ്പർശിയായ ട്രെൻഡായിരുന്നു ഇത്. ആളുകൾ അവരുടെ കുട്ടിക്കാലത്തോടൊപ്പം പ്രത്യക്ഷപ്പെടുന്ന ചിത്രങ്ങൾ സൃഷ്ടിക്കുക എന്നതായിരുന്നു ഈ ട്രെൻഡ്.

ഗ്രോക്ക് എഐ

ഇലോൺ മസ്‌കിന്റെ കമ്പനിയായ xAI വികസിപ്പിച്ചെടുത്ത ഒരു എഐ ചാറ്റ്ബോട്ടാണ് ഗ്രോക്ക്. ചാറ്റ്ജിപിടിയെയും ഗൂഗിൾ ജെമിനിയെയും പോലെ ടെക്സ്റ്റ് ജനറേറ്റ് ചെയ്യാനും നമ്മുടെ കമാൻഡിനനുസരിച്ച് ചിത്രങ്ങൾ നിർമിക്കാനും ഗ്രോക്കിന് കഴിയും. മീമുകള്‍ സൃഷ്ടിക്കാന്‍ ഒരു മിനിറ്റ് പോലും ആവശ്യമില്ലെന്നുള്ളതാണ് ഇതിന്റെ പ്രത്യേകത.