ചായയും കാപ്പിയും പിന്നിലേക്ക്? ഇന്ത്യക്കാരുടെ പുതിയ ഇഷ്ടമായി മാച്ച; ഗൂഗിൾ സർച്ചിൽ 1300% കുതിപ്പ്

രാവിലെ ഒരു കപ്പ് ചായയോ കാപ്പിയോ കുടിച്ചുതുടങ്ങുന്ന ശീലം ഇന്ത്യക്കാർക്കിടയിൽ പതിറ്റാണ്ടുകളായുണ്ട്. എന്നാൽ ഇപ്പോൾ ഈ പതിവിലേക്ക് പുതിയൊരു അതിഥി കൂടി എത്തിയിരിക്കുകയാണ്—മാച്ച

കഴിഞ്ഞ ഒരു വർഷത്തിനിടെ “മാച്ച എങ്ങനെ ഉണ്ടാക്കാം” എന്ന തിരച്ചിൽ ഇന്ത്യയിൽ 1300 ശതമാനം വർധിച്ചതായാണ് റിപ്പോർട്ട്. ഒരുകാലത്ത് കഫേകളിലെ അപൂർവ പാനീയമായി മാത്രം കണ്ടിരുന്ന മാച്ച ഇപ്പോൾ വീട്ടിലെ പാനീയശീലങ്ങളിലേക്കും കടന്നുവരികയാണ്.

ജപ്പാനീസ് ചായ സംസ്കാരവുമായി അടുത്ത ബന്ധമുള്ള ഒരു പ്രത്യേകതരം ഗ്രീൻ ടീയാണ് മാച്ച. സാധാരണ ഗ്രീൻ ടീ ഇലകൾ വെള്ളത്തിൽ ഇട്ട് കുടിക്കുന്നതിന് പകരം, മാച്ചയിൽ ചായയിലകൾ പൊടിച്ചാണ് ഉപയോഗിക്കുന്നത്.

അതുകൊണ്ടുതന്നെ മാച്ച തയ്യാറാക്കുന്ന രീതിക്കും പ്രത്യേകതയുണ്ട്. പരമ്പരാഗതമായി പ്രത്യേക ചായവിസ്‌ക് ഉപയോഗിച്ച് പൊടി വെള്ളത്തിൽ നന്നായി കലർത്തിയാണ് ഇത് തയ്യാറാക്കുന്നത്.

മാച്ചയെക്കുറിച്ചുള്ള താൽപര്യം ഇന്ത്യയിൽ പെട്ടെന്ന് വർധിച്ചതിന് പല കാരണങ്ങളുണ്ട്. ആരോഗ്യകരമായ പാനീയങ്ങൾ പരീക്ഷിക്കാനുള്ള താൽപര്യം, കഫേ സംസ്കാരത്തിന്റെ വളർച്ച, സോഷ്യൽ മീഡിയയിലെ മാച്ച പാനീയങ്ങളുടെ ദൃശ്യഭംഗി എന്നിവയെല്ലാം ഇതിൽ പങ്കുവഹിക്കുന്നുണ്ട്.

മാച്ച കിറ്റ് സംബന്ധിച്ച തിരച്ചിൽ ഇരട്ടിയായപ്പോൾ, മാച്ച തയ്യാറാക്കാൻ ഉപയോഗിക്കുന്ന വിസ്‌കും ബൗളും സംബന്ധിച്ച തിരച്ചിലുകൾ 2026 ഓഗസ്റ്റിൽ വലിയ തോതിൽ ഉയർന്നു. മാച്ചയുടെ കാര്യത്തിൽ പരമ്പരാഗത തയ്യാറാക്കൽ രീതിയിൽ മാത്രം ആളുകൾ ഒതുങ്ങുന്നില്ല. വ്യത്യസ്ത രുചികളുമായി ചേർത്തുള്ള പരീക്ഷണങ്ങളും സജീവമാണ്.

മാങ്ങ മാച്ചയുടെ തിരച്ചിലിൽ 200 ശതമാനം വളർച്ചയും സ്ട്രോബെറി മാച്ചയിൽ 400 ശതമാനം വളർച്ചയും റിപ്പോർട്ട് ചെയ്യുന്നു. മൺസൂൺ കാലത്ത് ഡേർട്ടി മാച്ച, കോക്കനട്ട് മാച്ച തുടങ്ങിയ കോമ്പിനേഷനുകൾക്കും താൽപര്യം വർധിച്ചു.

മാച്ചയും കാപ്പിയും ഒരുപോലെയുള്ള പാനീയങ്ങളല്ല. രുചി, കഫീൻ അളവ്, തയ്യാറാക്കുന്ന രീതി എന്നിവയിൽ വ്യത്യാസമുണ്ട്. അതിനാൽ കാപ്പിക്ക് പകരം മാച്ച തിരഞ്ഞെടുക്കുന്നത് വ്യക്തിപരമായ ഇഷ്ടവും കഫീൻ ആവശ്യകതയും അനുസരിച്ചായിരിക്കണം.

മാച്ച നിറവും ആശയവും ഫാഷൻ, ബ്യൂട്ടി, റീട്ടെയിൽ ഉൽപ്പന്നങ്ങളിലേക്കും വ്യാപിക്കുന്നുണ്ട്. മാച്ച ഷൂസ്, മാച്ച എൻസൈം സ്ക്രബ്, മാച്ച മെഴുകുതിരികൾ, ഫേസ് വാഷ്, പെർഫ്യൂം തുടങ്ങിയവയുമായി ബന്ധപ്പെട്ട തിരച്ചിലുകളും ഓഗസ്റ്റിൽ ഉയർന്നതായി റിപ്പോർട്ട് പറയുന്നു.

ഒരു കപ്പ് മാച്ച തയ്യാറാക്കുന്നത് പോലും പലർക്കും ഒരു ചെറിയ ദൈനംദിന റിച്ച്വലായി മാറുകയാണ്. കഫേയിൽ ഓർഡർ ചെയ്യുന്ന ട്രെൻഡി ഡ്രിങ്കിൽ നിന്ന് വീട്ടിൽ സ്വന്തമായി തയ്യാറാക്കുന്ന പാനീയത്തിലേക്കുള്ള മാച്ചയുടെ യാത്രയാണ് ഇപ്പോൾ ശ്രദ്ധേയമാകുന്നത്.