മഴക്കാലത്ത് വയറിന് പണി കിട്ടാതെ നോക്കാം; ഈ ഭക്ഷണങ്ങൾ ഒഴിവാക്കാം

മഴക്കാലത്ത് ഈർപ്പവും കാലാവസ്ഥാ വ്യതിയാനവും കാരണം ദഹനസംബന്ധമായ പ്രശ്നങ്ങൾ കൂടുതലായി കാണപ്പെടാറുണ്ട്.

ഈ സമയത്ത് ഭക്ഷണത്തിൽ ചെറിയ ശ്രദ്ധ പുലർത്തിയാൽ പല ആരോ​ഗ്യപ്രശ്നങ്ങളും ഒരു പരിധിവരെ ഒഴിവാക്കാം.

മഴക്കാലത്ത് പരമാവധി ഒഴിവാക്കേണ്ട ചില ഭക്ഷണങ്ങളെക്കുറിച്ച് അറിയാം.

തിളപ്പിച്ചാറ്റിയ വെള്ളം മാത്രം

മഴവെള്ളം കലർന്ന് ശുദ്ധജല സ്രോതസ്സുകൾ മലിനമാകാൻ ഈ സമയത്ത് വലിയ സാധ്യതയുണ്ട്. അതുകൊണ്ട് തന്നെ വെള്ളം നന്നായി തിളപ്പിച്ച് കുടിക്കുന്നത് വഴി ടൈഫോയ്ഡ്, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങളെ പൂർണമായി പ്രതിരോധിക്കാൻ സാധിക്കും.

വഴിയോര ഭക്ഷണങ്ങളും തണുത്ത വിഭവങ്ങളും ഒഴിവാക്കുക

വഴിയോരങ്ങളിലെ തുറന്നുവെച്ച ആഹാരങ്ങളും തണുത്ത വിഭവങ്ങളും പൂർണമായി ഒഴിവാക്കണം. ഈർപ്പമുള്ള അന്തരീക്ഷത്തിൽ ബാക്ടീരിയകളും ഫംഗസുകളും ഭക്ഷണത്തിൽ അതിവേഗം വളരും. പുറത്തുനിന്നുള്ള ജ്യൂസുകളും സാലഡുകളും ഈ സമയത്ത് ഭക്ഷ്യവിഷബാധയ്ക്കുള്ള സാധ്യത ഇരട്ടിയാക്കും.

പച്ചക്കറികളുടെ ശാസ്ത്രീയ ശുദ്ധീകരണം

പച്ചക്കറികളും പഴവർ​ഗങ്ങളും ഉപയോഗിക്കുന്നതിന് മുമ്പ് അതീവ ശ്രദ്ധയോടെ കഴുകി വൃത്തിയാക്കേണ്ടതുണ്ട്. പ്രത്യേകിച്ച് ഇലക്കറികളിൽ ഈ സമയത്ത് പുഴുക്കളും കണ്ണിൽ കാണാത്ത ചെറിയ പ്രാണികളും മുട്ടയിടാൻ സാധ്യത കൂടുതലാണ്.

എളുപ്പത്തിൽ ദഹിക്കുന്ന ആഹാരം

മഴക്കാലത്ത് നമ്മുടെ ശരീരത്തിന്റെ ദഹനശേഷി പൊതുവെ കുറവായിരിക്കും. അതുകൊണ്ട് തന്നെ കഞ്ഞി, സൂപ്പുകൾ, നന്നായി വെന്ത പച്ചക്കറികൾ എന്നിവ ഭക്ഷണക്രമത്തിൽ ഉൾപ്പെടുത്തുന്നത് വയറിനുണ്ടാകുന്ന അസ്വസ്ഥതകൾ ഒഴിവാക്കാൻ സഹായിക്കും.

കൊഴുപ്പും എണ്ണയും അടങ്ങിയ ഭക്ഷണങ്ങൾ

അമിതമായി വറുത്തതും പൊരിച്ചതുമായ കൊഴുപ്പ് കൂടിയ ഭക്ഷണങ്ങളോടുള്ള താല്പര്യം ഈ സമയത്ത് നിയന്ത്രിക്കേണ്ടതുണ്ട്. മഴ പെയ്യുമ്പോൾ ചൂടുള്ള പലഹാരങ്ങൾ കഴിക്കാൻ കൊതി തോന്നുമെങ്കിലും, ഇവ ദഹനക്കേടിനും വയറിളക്കത്തിനും കാരണമാകും.

കടൽ വിഭവങ്ങൾ

ധാരാളം മത്സ്യങ്ങളുടെയും കടൽ ജീവികളുടെയും പ്രജനനകാലമാണ് മൺസൂൺ. ഈർപ്പവും ഇവ കൈമാറ്റം ചെയ്യുന്ന രീതികളും കാരണം പെട്ടെന്ന് കേടാകാൻ സാധ്യത കൂടുതലായതിനാൽ മഴക്കാലത്ത് കടൽ വിഭവങ്ങൾ കഴിക്കുന്നത് അതീവ ജാഗ്രതയോടെ വേണം

ആഹാരം സൂക്ഷിക്കുന്ന രീതി

ബാക്കി വന്ന ആഹാരങ്ങൾ ദീർഘനേരം പുറത്തുവെച്ച് വീണ്ടും ചൂടാക്കി കഴിക്കരുത്. പാകം ചെയ്ത ആഹാരം ചൂടോടെ തന്നെ കഴിക്കാൻ ശ്രദ്ധിക്കുക. ഫ്രിഡ്ജിൽ വെക്കുന്ന ഭക്ഷണങ്ങൾ കൃത്യമായി അടച്ചുവെച്ചിട്ടുണ്ടെന്നും ചോർച്ചകൾ ഇല്ലെന്നും ഉറപ്പുവരുത്തണം.

വ്യക്തിശുചിത്വം

കുട്ടികൾക്കും മുതിർന്നവർക്കും അണുബാധകൾ ഏൽക്കാതിരിക്കാൻ പാത്രങ്ങൾ കഴുകുന്നതിലും കൈകൾ വൃത്തിയാക്കുന്നതിലും വ്യക്തിശുചിത്വം കർശനമായി പാലിക്കേണ്ടതുണ്ട്.