മുടി കഴുകിയ ഉടൻ ഈ തെറ്റുകൾ ആവർത്തിക്കരുത്

മുടി കഴുകുന്നത് പോലെ തന്നെ അതിന് ശേഷമുള്ള പരിചരണവും പ്രധാനമാണ്.

ഹെയർ വാഷിന് ശേഷം ചെയ്യുന്ന ചില ചെറിയ തെറ്റുകൾ പോലും മുടി കൊഴിയാനും പൊട്ടാനും കാരണമാകാം.

അതിനാൽ മുടി കഴുകിയ ഉടൻ ഒഴിവാക്കേണ്ട ചില കാര്യങ്ങൾ അറിയാം.

മുടി കഴുകിയ ശേഷം ടവൽ ഉപയോഗിച്ച് ശക്തമായി ഉരയ്ക്കുന്നത് മുടിയുടെ പുറംപാളി കേടുവരുത്തും. ഇത് മുടി പൊട്ടാനും ഫ്രിസിനസ് വർധിക്കാനും ഇടയാക്കും. പകരം മൃദുവായ മൈക്രോഫൈബർ ടവലോ കോട്ടൺ ടി-ഷർട്ടോ ഉപയോഗിച്ച് വെള്ളം പതുക്കെ ഒപ്പിയെടുക്കുക.

നനഞ്ഞിരിക്കുന്ന മുടി ചീപ്പ് ഉപയോഗിച്ച് ശക്തമായി ചീകുന്നത് മുടി പൊട്ടാൻ കാരണമാകും. മുടി അൽപം ഉണങ്ങിയ ശേഷം വീതിയിൽ പല്ലുകളുള്ള ചീപ്പ് ഉപയോഗിച്ച് അറ്റം മുതൽ പതുക്കെ ചീകുക.

വളരെ ചൂടുള്ള വായു നനഞ്ഞ മുടിയിൽ നേരിട്ട് അടിക്കുന്നത് മുടി വരണ്ടതും ദുർബലവുമാക്കും. ഡ്രയർ ഉപയോഗിക്കേണ്ടി വന്നാൽ 'കൂൾ' അല്ലെങ്കിൽ 'ലോ ഹീറ്റ്' മോഡ് തിരഞ്ഞെടുക്കുക.

മുടി നനഞ്ഞിരിക്കുമ്പോൾ പോണിടെയിലോ ബണ്ണായോ കെട്ടിവയ്ക്കുന്നത് മുടിയുടെ വേരുകളിൽ അനാവശ്യ സമ്മർദ്ദം സൃഷ്ടിക്കും. കൂടാതെ തലയോട്ടിയിൽ ഈർപ്പം നിലനിൽക്കുന്നതിനാൽ ചൊറിച്ചിലും താരനും ഉണ്ടാകാനുള്ള സാധ്യതയും കൂട്ടുന്നു.

നനഞ്ഞ മുടിയുമായി സൂര്യപ്രകാശത്തിൽ നേരിട്ട് ദീർഘനേരം നിൽക്കുന്നത് മുടിയുടെ ഈർപ്പം നഷ്ടപ്പെടുത്താം. പുറത്തുപോകേണ്ട സാഹചര്യമുണ്ടെങ്കിൽ മുടി നന്നായി ഉണങ്ങിയതിന് ശേഷം പോകുന്നതാണ് നല്ലത്.

സ്ട്രെയിറ്റ്നർ, കേളർ തുടങ്ങിയ ഉപകരണങ്ങൾ നനഞ്ഞ മുടിയിൽ ഉപയോഗിക്കുന്നത് മുടിക്ക് ഗുരുതരമായ കേടുപാടുകൾ ഉണ്ടാക്കാം. മുടി പൂർണമായും ഉണങ്ങിയ ശേഷമേ ഇവ ഉപയോഗിക്കാവൂ.

നനഞ്ഞ മുടിയുമായി ഉറങ്ങുന്നത് മുടി പൊട്ടുക, കെട്ടുപിണയുക, തലയോട്ടിയിൽ ഫംഗസ് വളരാനുള്ള സാധ്യത വർധിപ്പിക്കുക തുടങ്ങിയ പ്രശ്നങ്ങൾക്ക് കാരണമാകും. ഉറങ്ങുന്നതിന് മുമ്പ് മുടി നന്നായി ഉണങ്ങിയെന്ന് ഉറപ്പാക്കുക.

മുടി കഴുകിയ ഉടൻ സെറം, സ്പ്രേ, ജെൽ, ക്രീം എന്നിവ അമിതമായി ഉപയോഗിക്കുന്നത് മുടിക്ക് ഭാരം തോന്നാനും എണ്ണമയം കൂടാനും ഇടയാക്കാം. ആവശ്യത്തിന് മാത്രം ഉൽപ്പന്നങ്ങൾ ഉപയോഗിക്കുക.

എപ്പോഴും വേഗത്തിൽ ഉണക്കാൻ ശ്രമിക്കുന്നതിനുപകരം, കഴിയുന്നിടത്തോളം മുടി സ്വാഭാവികമായി ഉണങ്ങാൻ അനുവദിക്കുന്നത് മുടിയുടെ ആരോഗ്യത്തിന് കൂടുതൽ ഗുണം ചെയ്യും.