ആവി പിടിക്കുമ്പോൾ ഈ അബദ്ധങ്ങൾ ഒഴിവാക്കണേ...

ജലദോഷവും തുമ്മലും മൂക്കടപ്പുമൊക്കെ വന്നാൽ നമ്മൾ ആദ്യം ചെയ്യുന്നതാണ് നന്നായി ഒന്ന് ആവി പിടിക്കുക എന്നത്.

പൂർണ രോ​ഗമുക്തി ലഭിച്ചില്ലെങ്കിലും ഭാ​ഗികാശ്വാസം കിട്ടാൻ ഇത് സഹായിക്കും.

എന്നാൽ പെട്ടെന്നുള്ള രോ​ഗമുക്തിക്ക് ഏന്തെങ്കിലും ബാമോ മരുന്നുകളോ ഒക്കെ വെള്ളത്തിൽ ഇടുന്നത് പോലുള്ള അബദ്ധങ്ങൾ ചെയ്യുന്നവരുമുണ്ട്.

ആവിപിടിക്കുമ്പോൾ ഒഴിവാക്കേണ്ട ഇത്തരത്തിലുള്ള ചില അബദ്ധങ്ങൾ പറഞ്ഞു തരാം.

പരമാവധി അഞ്ച് മുതൽ പത്ത് മിനിറ്റ് വരെയേ ആവി പിടിക്കാവൂ. അതിൽ കൂടുതൽ നേരം ആവി പിടിക്കരുത്. ദീർഘനേരം ആവി പിടിക്കുന്നതിലൂടെ മൂക്കിനുള്ളിലെ രോമകൂമങ്ങൾ നശിക്കാനിടയാകും. പൊടിയും ബാക്ടീരിയുമൊക്കെ ശ്വാസകോശത്തിലേക്ക് പോകാതിരിക്കാൻ സഹായിക്കുന്നതാണ് ഇവ.

ആവി പിടിക്കുമ്പോൾ കണ്ണുകൾ അടച്ചുപിടിക്കണം. അല്ലെങ്കിൽ കണ്ണിനു മുകളിൽ നനഞ്ഞ തുണികൊണ്ടു കെട്ടുകയോ അതുപോലുള്ള മറ്റു മാർഗങ്ങൾ സ്വീകരിക്കുകയോ ആവാം.

തലവേദനയ്ക്കും മറ്റും പുറത്തു പുരട്ടാനായി ഉപയോഗിക്കുന്ന ബാമുകൾ ആവി പിടിക്കാനുള്ള വെള്ളത്തിൽ കലർത്തി ഉപയോഗിക്കരുത്. ഇതിനു പകരം തുളസിയിലയോ യൂക്കാലിയോ ചുമക്കൂർക്കയിലയോ പനിക്കൂർക്കയിലയോ ഉപയോഗിക്കാം.

ആവി പിടിക്കാനുള്ള വെള്ളത്തിൽ ഉപ്പ് ചേർത്ത് ഉപയോഗിക്കുന്നത് കൊണ്ട് കാര്യമായ പ്രയോജനമില്ല.

ആവിപിടിക്കാനായി വേപ്പറൈസറുകൾ ഉപയോഗിക്കുമ്പോൾ ചില കാര്യങ്ങൾ ശ്രദ്ധിക്കണം. സ്വിച്ച് ഓഫ് ചെയ്തതിനു ശേഷം മാത്രമേ വെള്ളം നിറയ്ക്കുകയും ഒഴിവാക്കുകയും തുറക്കുകയും ചെയ്യാവൂ. യാതൊരു കാരണവശാലും ഉപ്പോ മറ്റു ബാമോ മറ്റ് മരുന്നുകളോ വെള്ളത്തിൽ ചേർക്കരുത്.

കുട്ടികളെ ഒരിക്കലും ഒറ്റയ്ക്ക് ആവി പിടിക്കാൻ അനുവദിക്കരുത്. പൊള്ളലേൽക്കാനുള്ള സാധ്യത വളരെ കൂടുതലാണ്.