കറിവേപ്പില മതി, വീട്ടമ്മമാരുടെ പ്രശ്നങ്ങൾക്കു പരിഹാരം

മലയാളികളുടെ അടുക്കളയിൽ ഒഴിവാക്കാനാകാത്ത സാന്നിധ്യമാണ് കറിവേപ്പില.

വീട് വൃത്തിയാക്കാനും പ്രാണികളെ തുരത്താനുമൊക്കെ ഈ കറിവേപ്പില ധാരാളം മതി.

ദുർഗന്ധം അകറ്റാം

ഒരുപിടി കറിവേപ്പില എടുത്ത് വെള്ളത്തിലിട്ട് നന്നായി തിളപ്പിക്കുക. ചൂടാറിയ ശേഷം ഇത് സിങ്ക് ഡ്രെയ്നിനുള്ളിലേക്ക് ഒഴിച്ചുകൊടുക്കാം. കറിവേപ്പിലയുടെ സ്വാഭാവിക സുഗന്ധം ദുർഗന്ധത്തെ അകറ്റി നിർത്തുകയും അടുക്കളയ്ക്ക് ഫ്രഷ് ഫീൽ നൽകുകയും ചെയ്യും.

എണ്ണമയമുള്ള സ്റ്റൗ വൃത്തിയാക്കാം

ഒരുപിടി കറിവേപ്പില എടുത്ത് അൽപം വെള്ളവും ചേർത്ത് അരച്ച് പേസ്റ്റ് രൂപത്തിലാക്കുക. ഈ പേസ്റ്റ് സ്റ്റൗവിൽ എണ്ണമയമുള്ള ഭാഗത്ത് തേച്ചുകൊടുക്കാം. അൽപം സമത്തിന് ശേഷം കാഠിന്യം കുറഞ്ഞ സ്ക്രബർ ഉപയോഗിച്ച് ഉരച്ചു കഴുകാവുന്നതാണ്. എണ്ണക്കറയും പാടുകളും അകന്ന് സ്റ്റൗ പുത്തൻ പോലെ തിളങ്ങും.

ഫ്രിഡ്ജിനുള്ളിലെ ദുർഗന്ധം ഇല്ലാതാക്കാം

ഒരു പാത്രത്തിൽ അൽപം കറിവേപ്പില എടുത്ത് ഫ്രിഡ്ജിനുള്ളിൽ ദുർഗന്ധം കൂടുതലുള്ള ഭാഗത്ത് വയ്ക്കുക. ഫ്രിഡ്ജിനുള്ളിലെ ദുർഗന്ധം വലിച്ചെടുക്കാൻ കറിവേപ്പിലയ്ക്ക് സാധിക്കും. ഫ്രിഡ്ജ് ഫ്രഷായി ഇരിക്കുകയും ചെയ്യും.

സ്റ്റീൽ പാത്രങ്ങൾ വെട്ടി തിളങ്ങാൻ

കുറച്ചു വെള്ളം എടുത്ത് അതിൽ കറിവേപ്പിലയിട്ട് കുതിർത്ത് ഈ വെള്ളം സ്പ്രേ ബോട്ടിലിലാക്കി സ്റ്റെയിൻലെസ് സ്റ്റീൽ പാത്രങ്ങളിലും ഉപകരണങ്ങളിലും സിങ്കിലും സ്പ്രേ ചെയ്തു കൊടുക്കാവുന്നതാണ്. ശേഷം സാധാരണ രീതിയിൽ കഴുകിയാൽ സ്റ്റീൽ പാത്രങ്ങൾ പുത്തനായി ഇരിക്കും.

ഉറുമ്പുകളെ അകറ്റാം

ഉണങ്ങിയ കറിവേപ്പില പൊടിച്ച് കിച്ചൻ കൗണ്ടറുകളിലും മധുരമുള്ള വസ്തുക്കൾ സൂക്ഷിക്കുന്നിടങ്ങളിലുമിട്ട് വിതറിയാൽ ഉറുമ്പുകളെ അകറ്റാം. കറിവേപ്പിലയുടെ ഗന്ധം അവയ്ക്ക് അരോചകമാണ്.