ബിരിയാണി മാസ് ഡാ

എന്ത് ആഘോഷമാണെങ്കിലും ഇന്ത്യക്കാർക്ക് ബിരിയാണി ഒരു വികാരമാണെന്ന് തെളിയിച്ചിരിക്കുകയാണ് സ്വിഗ്ഗിയുടെ പത്താമത് വാർഷിക റിപ്പോർട്ട്.

2025ൽ സ്വി​ഗ്ഗി പ്ലാറ്റ്‌ഫോം വഴി 93 ദശലക്ഷം ബിരിയാണികളാണ് ഓർഡർ ചെയ്യപ്പെട്ടത്, 2024 ൽ ഇത് 83 ദശലക്ഷമായിരുന്നു.

ഇതിൽ ആളുകൾക്ക് പ്രിയവും ഏറ്റവും മുന്നിൽ നിൽക്കുന്ന ബിരിയാണിയും ചിക്കൻ ബിരിയാണി തന്നെയാണ്. 57.7 ദശലക്ഷം ഓർഡറുകളാണ് ലഭിച്ചത്.

പ്ലാറ്റ്ഫോമിൽ മിനിറ്റിൽ 194 ബിരിയാണി ഓർഡറുകൾ അഥവാ സെക്കൻഡിൽ 3.25 എന്ന കണക്കിലാണ് ആളുകൾ ഓർഡർ ചെയ്തിരിക്കുന്നത്.

എന്നാൽ ഇന്ത്യക്കാർക്ക് ബിരിയാണിയോടുള്ള പ്രിയം അതേ തോതിൽ തന്ന ബർ​ഗറുകളോടും പിസ്സകളോടും ഉണ്ട്

44.2 ദശലക്ഷം ഓർഡറുകളുമായി ബർ​ഗറും 40.1 ദശലക്ഷം ഓർഡറുകളുമായി പിസ്സയും ഇന്ത്യക്കാരുടെ ഇഷ്ട ഭക്ഷണങ്ങളുടെ പട്ടികയിൽ മുന്നിൽ തന്നെ ഉണ്ട്.

മധുരപലഹാരങ്ങളുടെ കാര്യത്തിൽ, 6.9 ദശലക്ഷം ഓർഡറുകളുമായി വൈറ്റ് ചോക്ലേറ്റ് കേക്കാണ് ഒന്നാം സ്ഥാനത്തെത്തിയിരിക്കുന്നത്. പിന്നാലെ 5.4 ദശലക്ഷം ഓർഡറുകളുമായി ചോക്ലേറ്റ് കേക്കും , 4.5 ദശലക്ഷം ഓർഡറുകളുമായി ഗുലാബ് ജാമുൻ എന്നിവയും ഉണ്ട്.

മെക്സിക്കൻ (16 ദശലക്ഷം ഓർഡറുകൾ), ടിബറ്റൻ (12 ദശലക്ഷം+ ഓർഡറുകൾ), കൊറിയൻ (4.7 ദശലക്ഷം ഓർഡറുകൾ) എന്നീ ആഗോള ഭക്ഷണവിഭവങ്ങളും ഓർഡറുകളിൽ മുന്നിലുണ്ട്. ഇതിൽ ഏറ്റവും കൂടുതൽ ആളുകൾ തിരഞ്ഞ ആഗോള ഭക്ഷണവിഭവം മാച്ചയായിരുന്നു.

11 ദശലക്ഷം ഓർഡറുകളുമായി ബ്രേക്ക്ഫാസ്റ്റ് ഇനത്തിൽ ഇഡ്‌ലിയും തൊട്ട് പിന്നാലെ 9.6 ദശലക്ഷം ഓർഡറുകളുമായി വെജ് ദോശയും ഉണ്ട്.

രാത്രി വൈകിയുള്ള സമയങ്ങളിൽ 2.3 ദശലക്ഷം ഓർഡറുകൾ നേടി ഏറ്റവും കൂടുതൽ ആളുകൾ ഓർഡർ ചെയ്ത ഭക്ഷണം ചിക്കൻ ബർഗറുകളാണ്.

രാത്രിയിൽ ബർ​ഗറിന് പുറമേ ചിക്കൻ ബിരിയാണി, വെജ് ബർഗറുകൾ, വെജ് പിസ്സകൾ എന്നിവയും മുൻനിരയിൽ ഇടം നേടിയിട്ടുണ്ട്.