സമകാലിക മലയാളം ഡെസ്ക്
അനുസരണയില്ലാതെ പലപ്പോഴും മതിലു ചാടികടക്കാറുള്ള കടലാസുപ്പൂക്കളുടെ ഭംഗി ഈ വേനൽക്കാലത്തും കണ്ണിന് കുളിർമ നൽകുന്നതാണ്. എന്നാൽ കാഴ്ചയിൽ മാത്രമല്ല, പല പ്രദേശങ്ങളിലും ബൊഗൈൻവില്ല പരമ്പരാഗത ഔഷധക്കൂട്ടാണ്.
കടലാസു പൂക്കൾ വെള്ളത്തിൽ തിളപ്പിച്ചുണ്ടാക്കുന്ന ബൊഗൈൻവില്ല ടീയ്ക്ക് ധാരാളം ആരോഗ്യഗുണങ്ങളുണ്ടെന്നാണ് വിദഗ്ധർ പറയുന്നത്.
മെക്സിക്കോ പോലുള്ള രാജ്യങ്ങളിൽ ചുമ, തൊണ്ടവേദന, ശ്വാസകോശ സംബന്ധമായ പ്രശ്നങ്ങൾ, ദഹന പ്രശ്നങ്ങൾ എന്നിവയ്ക്ക് ബൊഗൈൻവില്ല ടീ പരമ്പരാഗതമായി ഉപയോഗിച്ചിരുന്നു.
ഇവയ്ക്ക് ആന്റിഫംഗൽ, ആന്റിബാക്ടീരിയൽ, ആൻ്റിഡയബറ്റീസ് ഗുണങ്ങളുണ്ടെന്ന് ചില പഠനങ്ങൾ പറയുന്നു. സ്പെക്റ്റാബിലിസ് പോലുള്ള ചില ബൊഗൈൻവില്ല ഇനങ്ങൾക്ക് ആൻ്റിഡയബറ്റീസ് ഗുണങ്ങൾ ഉള്ളതായി റിപ്പോർട്ട് ചെയ്യപ്പെട്ടിട്ടുണ്ട്
ബൊഗൈൻവില്ലയിൽ ഫ്ലേവനോയ്ഡുകൾ, ടാന്നിനുകൾ തുടങ്ങിയ ശക്തമായ ആൻ്റിഓക്സിഡൻ്റുകൾ അടങ്ങിയിട്ടുണ്ട്. ശരീരത്തിലെ ഫ്രീ റാഡിക്കലുകളെ നശിപ്പിക്കാനും പ്രതിരോധശേഷി വർധിപ്പിക്കാനും സഹായിക്കും.
വയറിലെ അൾസർ, കുടൽ സംബന്ധമായ അസുഖങ്ങൾ ചികിത്സിക്കാൻ പരമ്പരാഗത വൈദ്യത്തിൽ ബൊഗൈൻവില്ല പൂക്കൾ ഉപയോഗിക്കുന്നു.
ബൊഗൈൻവില്ല പൊതുവെ വിഷരഹിതമായി കണക്കാക്കപ്പെടുന്നുണ്ടെങ്കിലും, ചിലരിൽ ചർമത്തിൽ പ്രകോപനമോ നേരിയ വയറുവേദനയോ അനുഭവപ്പെടാം.