മിക്‌സിയുടെ ജാറിലെ മണമാണോ പ്രശ്‌നം ? ഇവ പരീക്ഷിക്കാം

എല്ലാ വീട്ടിലെയും അടുക്കളയില്‍, തിരക്കുള്ള 'ഒരാളു'ണ്ട് - മിക്സി എന്ന് വിളിക്കുന്ന മിക്സര്‍ ഗ്രൈന്‍ഡര്‍

ചമ്മന്തി അരയ്ക്കുന്നത് മുതൽ ഇഞ്ചി, വെളുത്തുള്ളി പേസ്റ്റാക്കാനും, മസാലകൾ പൊടിക്കാനും, ദോശമാവ് തയ്യാറാക്കാനുമെല്ലാം ആശാന്‍ വേണം.

എന്നാൽ ഇതൊക്കെ കഴിഞ്ഞ് ജാര്‍ നന്നായി കഴുകി വച്ചാലും ഒരു കാര്യവുമില്ല. പിന്നീട് ഉപയോഗിക്കാന്‍ വേണ്ടി എടുക്കുന്ന സമയത്ത് ഇതിന് ഒരു തരം ദുര്‍ഗന്ധം ഉണ്ടാകും.

ഭക്ഷണങ്ങളുടെ അവശിഷ്ടങ്ങൾ പറ്റിപ്പിടിച്ചിരിക്കുന്നതും ശരിയായ രീതിയിൽ ജാർ ഉണക്കാത്തതുമാണ് ഇതിനുള്ള പ്രധാന കാരണം.

ജാർ നന്നായി ഉണക്കി,ദുർ​ഗന്ധം മാറ്റാനുള്ള വഴികൾ പറഞ്ഞ് തരാം.

മിക്സി ജാറും ലിഡും കഴുകിയതിന് ശേഷം തുറന്നുവെച്ച് 10-15 മിനിറ്റ് നേരം നേരിട്ടുള്ള സൂര്യപ്രകാശത്തിൽ വെക്കുക. സൂര്യപ്രകാശം നന്നായി ഉണക്കാൻ സഹായിക്കുമെന്നുമാത്രമല്ല, ഇതിന് സ്വാഭാവികമായ ആൻറി ബാക്ടീരിയൽ ഗുണങ്ങളുമുണ്ട് ഇത് ദുർ​ഗന്ധം അകറ്റും.

ആഴ്ചയിലൊരിക്കൽ ഡീപ് ക്ലീൻ ചെയ്യുന്നത് മിക്സിയുടെ ജാറുകൾ പുതിയതും ശുചിത്വമുള്ളതുമായി നിലനിർത്താൻ സഹായിക്കും.അതിനായി 1 ടീസ്പൂൺ വെള്ള വിനാഗിരി അര ടീസ്പൂൺ ബേക്കിംഗ് സോഡയുമായി കലർത്തി ജാറിനുള്ളിൽ പുരട്ടി 10-15 മിനിറ്റ് വെക്കുക.പിന്നീട് ചൂടുവെള്ളത്തിൽ കഴുകി നന്നായി ഉണക്കുക.

ഉപയോഗിച്ച നാരങ്ങയുടെ തൊലി മിക്സിയിൽ ഇട്ട് ഓൺ ചെയ്ത് രണ്ട് റൗണ്ട് ചുറ്റിക്കണം. തൊലി ചേർക്കുമ്പോൾ കുറച്ച് നീരും വേണമെങ്കിൽ കൂടെ ചേർക്കാം. തുടർന്ന് ഒരു 15 മിനിറ്റ് കഴിഞ്ഞ് വെള്ളമൊഴിച്ച് കഴുകി എടുക്കാം. ദുർ​ഗന്ധം മാറികിട്ടും.

ബേക്കിങ് സോഡ എടുത്ത് കുറച്ച് വെള്ളം ചേർത്ത് നന്നായി മിക്സ് ചെയ്ത് വെക്കുക. ഈ മിശ്രിതം ജാറിൽ ഇട്ട് നന്നായി അടിച്ചെടുക്കണം. ഇത് കുറച്ച് നേരം ചെയ്താൽ തന്നെ മിക്സിയുടെ ജാറിൽ അടിഞ്ഞ് കൂടിയിരിക്കുന്ന അഴുക്കെല്ലാം തന്നെ പുറത്തേക്ക് പോയി ജാർ വൃത്തിയാകും.

വെള്ളവും വിനാഗിരിയും തുല്യമായ അളവിൽ എടുക്കണം. അതിന് ശേഷം ഇത് മിക്സിയുടെ ജാറിൽ ഒഴിച്ച് നന്നായി അടിച്ചെടുക്കുക. ഇത് ജാറിൽ നിന്നും അഴുക്കും കറയും നീക്കം ചെയ്യാൻ സഹായിക്കും.

മിക്സി ജാറും അതിന്റെ ലിഡും സൂക്ഷിക്കുന്നതിന് മുമ്പ് പൂർണ്ണമായും വായുവിൽ ഉണങ്ങാൻ എപ്പോഴും ശ്രദ്ധിക്കുക. ഇതുവഴി, ദുർഗന്ധവും ഒട്ടിപ്പിടിക്കുന്ന കറകളും എണ്ണമയമുള്ള അഴുക്കും ഇല്ലാതാക്കാം.