മാറ്റങ്ങൾ ജീവിതത്തിന്റെ സ്വാഭാവികതയാണ്, വെല്ലുവിളികൾ ഭാവിയും: അമിതാഭ് ബച്ചൻ

മാറ്റങ്ങൾ ജീവിതത്തിന്റെ സ്വാഭാവികതയാണ്, വെല്ലുവിളികൾ ജീവിതത്തിന്റെ ഭാവിയും. അതിനാൽ മാറ്റങ്ങളെ വെല്ലുവിളിക്കുക, വെല്ലുവിളികളെ മാറ്റാൻ ശ്രമിക്കരുത്: അമിതാഭ് ബച്ചൻ

ജീവിതത്തിൽ ഒന്നും എന്നും ഒരേപോലെ തുടരില്ല. ജോലി, ബന്ധങ്ങൾ, സാഹചര്യങ്ങൾ, സാമ്പത്തിക സ്ഥിതി, നമ്മുടെ താൽപര്യങ്ങൾ എന്നിവയെല്ലാം കാലത്തിനനുസരിച്ച് മാറാം. മാറ്റത്തെ ഒഴിവാക്കാൻ ശ്രമിക്കുന്നതിനേക്കാൾ അത് മനസ്സിലാക്കി സ്വീകരിക്കുകയാണ് പ്രധാനം.

ജീവിതത്തിൽ മാറ്റങ്ങൾ സ്വാഭാവികമായി സംഭവിച്ചുകൊണ്ടിരിക്കും. എന്നാൽ ഓരോ മാറ്റവും പുതിയൊരു സാഹചര്യത്തെയാണ് മുന്നിലെത്തിക്കുന്നത്. അതിനോട് നമ്മൾ എങ്ങനെ പ്രതികരിക്കുന്നു എന്നതാണ് പ്രധാനം.

ഭാവി പ്രവചിക്കാൻ കഴിയില്ല. പക്ഷേ പുതിയ സാഹചര്യങ്ങളോടൊപ്പം പുതിയ പ്രശ്നങ്ങളും വെല്ലുവിളികളും വരും. അവയെ നേരിടാനുള്ള കഴിവാണ് നമ്മളെ മുന്നോട്ട് കൊണ്ടുപോകുന്നത്.

വർഷങ്ങളായി ഒരേ ജോലി ചെയ്തിരുന്ന ഒരാൾക്ക് പുതിയ ടെക്നോളജി വരുന്നതോടെ പഴയ രീതികൾ മാറ്റേണ്ടി വരുന്നു എന്ന് കരുതുക. മാറ്റത്തെ എതിർക്കുന്നതിന് പകരം പുതിയ രീതികൾ പഠിക്കുകയും കഴിവുകൾ മെച്ചപ്പെടുത്തുകയും ചെയ്താൽ ആ മാറ്റം തന്നെ പുതിയ അവസരമായി മാറും.

പരിചിതമായ കാര്യങ്ങൾ വിട്ട് പുതിയതിലേക്ക് പോകുമ്പോൾ ആശങ്ക ഉണ്ടാകാം. അതുകൊണ്ട് മാറ്റത്തെ സ്വീകരിക്കുന്നത് ഭയമില്ലാത്തവരാകുക എന്നല്ല. ഭയമുണ്ടെങ്കിലും മുന്നോട്ട് പോകാനുള്ള ധൈര്യം കണ്ടെത്തുക എന്നതാണ്.

ഇന്ത്യൻ സിനിമയിലെ ഏറ്റവും പ്രമുഖ നടന്മാരിൽ ഒരാളാണ് അമിതാഭ് ബച്ചൻ. 1969-ൽ 'സാത് ഹിന്ദുസ്ഥാനി'യിലൂടെ സിനിമയിൽ അരങ്ങേറ്റം കുറിച്ച അദ്ദേഹം സഞ്ജീർ, ദീവാർ, ഷോലെ, ഡോൺ, അഗ്നീപത് തുടങ്ങിയ ചിത്രങ്ങളിലൂടെ ജനപ്രീതി നേടി.

അഭിനയത്തിന് പുറമെ ടെലിവിഷൻ അവതാരകനായും ശ്രദ്ധേയനായി. ദീർഘകാലത്തെ കരിയറിൽ നിരവധി തലമുറകളിലെ പ്രേക്ഷകരുമായി ബന്ധം നിലനിർത്തിയ നടനാണ് അമിതാഭ് ബച്ചൻ.

1942 ഒക്ടോബർ 11ന് അലഹാബാദിൽ (ഇന്നത്തെ പ്രയാഗ്‌രാജ്) ജനിച്ച അമിതാഭ് ബച്ചൻ, പ്രശസ്ത ഹിന്ദി കവി ഹരിവംശ് റായ് ബച്ചന്റെയും തേജി ബച്ചന്റെയും മകനാണ്.

പദ്മശ്രീ, പദ്മഭൂഷൺ, പദ്മവിഭൂഷൺ തുടങ്ങിയ രാജ്യത്തെ ഉയർന്ന സിവിലിയൻ ബഹുമതികൾ നൽകി രാജ്യം ആ​ദരിച്ച നടനാണ് അമിതാഭ് ബച്ചൻ