ഇന്റർനെറ്റിൽ ചാറ്റ് ജിപിടി കാരിക്കേച്ചർ തരംഗം; എന്താണ് ഇതിലെ അപകടസാധ്യതകൾ?

ഒരാളുടെ രൂപം, ജോലി, ഹോബികൾ, ജീവിതശൈലി എന്നിവ സമന്വയിപ്പിച്ച് രസകരമായ കാർട്ടൂൺ രൂപങ്ങൾ നിർമിക്കുന്ന എഐ കാരിക്കേച്ചർ ട്രെൻഡ് ഇപ്പോൾ സോഷ്യൽ മീഡിയയിൽ വൈറലാണ്.

നിങ്ങളുടെ മുഖഭാവങ്ങളും വ്യക്തിഗത വിവരങ്ങളും വിശകലനം ചെയ്ത് ചാറ്റ് ജിപിടി (ChatGPT) നിങ്ങളെ ഒരു അതിശയോക്തി കലർന്ന കാർട്ടൂൺ കഥാപാത്രമാക്കി മാറ്റുന്ന രീതിയാണിത്.‌

"എന്നെക്കുറിച്ചുള്ള വിവരങ്ങൾ വെച്ച് എന്റെ ജോലിയും രൂപവും ഉൾപ്പെടുത്തി ഒരു കാരിക്കേച്ചർ നിർമിക്കുക" എന്ന നിർദ്ദേശം (Prompt) നൽകിയാണ് ഉപയോക്താക്കൾ ഇത് ചെയ്യുന്നത്.

ചാറ്റ് ജിപിടിയിലെ ഇമേജ് ജനറേഷൻ സാങ്കേതികവിദ്യ (DALL-E) ഉപയോഗിച്ചാണ് മിനിറ്റുകൾക്കുള്ളിൽ ഇത്തരം ചിത്രങ്ങൾ നിർമിക്കുന്നത്.

സ്വന്തം കാരിക്കേച്ചർ എങ്ങനെ നിർമിക്കാം?

അക്കൗണ്ട് ലോഗിൻ ചെയ്യുക.ചാറ്റ് ജിപിടിക്ക് നിങ്ങളുടെ മുൻകാല ചാറ്റുകളിൽ നിന്ന് വിവരങ്ങൾ ശേഖരിക്കാൻ അക്കൗണ്ട് അത്യാവശ്യമാണ്.

വ്യക്തമായ വെളിച്ചമുള്ള ഒരു ഫോട്ടോ നൽകുക.

നിങ്ങളുടെ ജോലി, ഹോബികൾ, ഇഷ്ടപ്പെട്ട സ്ഥലങ്ങൾ എന്നിവ വ്യക്തമായി പറയുക.

ലഭിക്കുന്ന ചിത്രം ഇഷ്ടപ്പെട്ടില്ലെങ്കിൽ വീണ്ടും നിർദേശങ്ങൾ നൽകി മാറ്റം വരുത്താം.

ചിത്രം തൃപ്തികരമാണെങ്കിൽ അത് ഡൗൺലോഡ് ചെയ്ത് സോഷ്യൽ മീഡിയയിൽ പങ്കുവെക്കാം.

വിദഗ്ധർ നൽകുന്ന മുന്നറിയിപ്പ്

ഈ ട്രെൻഡ് രസകരമാണെങ്കിലും ഇതിൽ വലിയ അപകടസാധ്യതകളുണ്ടെന്ന് സൈബർ വിദഗ്ധർ മുന്നറിയിപ്പ് നൽകുന്നു.

ഈ കാരിക്കേച്ചർ നിർമിക്കാനായി നിങ്ങളുടെ ഫോട്ടോ, ജോലി, കുടുംബം, ഹോബികൾ തുടങ്ങിയ സുപ്രധാന വിവരങ്ങളാണ് ചാറ്റ് ജിപിടിയുമായി പങ്കുവെക്കുന്നത്.

നിങ്ങളുടെ പേരും മുഖവും വ്യക്തിഗത വിവരങ്ങളും എഐ സിസ്റ്റം ഒന്നിച്ച് വിശകലനം ചെയ്യുന്നത് ഭാവിയിൽ പരസ്യങ്ങൾക്കോ മറ്റ് പ്രൊഫൈലിംഗ് ആവശ്യങ്ങൾക്കോ ഉപയോഗിക്കപ്പെട്ടേക്കാം.