സമകാലിക മലയാളം ഡെസ്ക്
രുചിയൂറും വിഭവങ്ങളുടെ ഒരു ഉത്സവം കൂടിയാണ് ക്രിസ്മസ്.
തിരുപ്പിറവിയോട് അനുബന്ധിച്ചുള്ള 'നോമ്പുവീടല്' ചടങ്ങ് ക്രിസമസിന്റെ രുചികളുടെ ആഘോഷം കൂടിയാണ്.
നോമ്പു വീടലിനും ക്രിസ്മസ് മധുരത്തിനും വീട്ടില് തന്നെ തയാറാക്കാവുന്ന ചില വിഭവങ്ങള് പരിചയപ്പെടാം.
വട്ടയപ്പം
ചേരുവകള്:
പച്ചരി-1 കിലോ തേങ്ങ-2 എണ്ണം, ശുദ്ധമായ കള്ള്-2 ഗ്ളാസ്, പഞ്ചസാര-1 കിലോ,കിസ്മിസ് -15 എണ്ണം, ഏലക്കായ-6 എണ്ണം,ഉപ്പ്-പാകത്തിന്
തയാറാക്കുന്ന വിധം
കുതിർത്ത് പൊടിച്ച പച്ചരി അരിച്ച് തരി മാറ്റിവെക്കുക. തേങ്ങ അരച്ചെടുക്കുക. മാറ്റിവെച്ച തരി കുറുക്കിയെടുത്ത് അതിലേക്ക് അരിപ്പൊടി, തേങ്ങ അരച്ചത്, കള്ള്, പഞ്ചസാര, ഉപ്പ് ചേർത്ത് ഇളക്കി പൊങ്ങാൻ വയ്ക്കുക.
പൊങ്ങിയാൽ ഏലക്കാപൊടി, കിസ്മിസ് കശുവണ്ടി ചേർത്ത് അപ്പ ചെമ്പിൽ വേവിക്കുക. അപ്പപ്പൊടിക്ക് പകരം റാഗിപ്പൊടി ഉപയോഗിച്ചും വട്ടയപ്പം ഉണ്ടാക്കാം.
പോത്ത് സ്റ്റ്യൂ
ചേരുവകള്:
പോത്തിറച്ചി-1 കിലോ, തേങ്ങാ പാല്-1 1/2കപ്പ്, വെളിച്ചെണ്ണ-150 ഗ്രാം, സവാള -3 എണ്ണം, ഇഞ്ചി -50 ഗ്രാം, വെളുത്തുള്ളി ചതച്ചത് -50 ഗ്രാം, പച്ചമുളക് നീളത്തില് അരിഞ്ഞെടുത്തത്-8 എണ്ണം, കുരുമുളക് പൊടിച്ചത്-1 ടീസ്പൂണ്, കറിവേപ്പില-2 കതിര്, ഗരം മസാല -1 ടീസ്പൂണ്, മല്ലിപ്പൊടി-2 ടീസ്പൂണ്, മഞ്ഞള് പൊടി-1/2 ടീസ്പൂണ്, പെരുംജീരകം -1 ടീസ്പൂണ്, ഉപ്പ് -ആവശ്യത്തിന്
തയാറാക്കുന്ന വിധം:
പോത്ത് കഴുകി വേവിച്ചു മാറ്റി വക്കുക. ഉരുളി ചെറുതായി ചൂടായതിനു ശേഷം മാത്രം വെളിച്ചെണ്ണ ഒഴിക്കുക. അതിലേക്ക് ഇഞ്ചി, പച്ചമുളക്, വെളുത്തുള്ളി ചതച്ചതും സവാളയും ചേര്ത്തു വഴറ്റി എടുത്തതിനു ശേഷം മല്ലിപ്പൊടിയും മഞ്ഞള്പ്പൊടിയും ചേര്ക്കാം.
ഇതിലേക്ക് വേവിച്ച പോത്തിറച്ചിയും തേങ്ങയുടെ രണ്ടാം പാലും ഒഴിച്ച് തിളപ്പിച്ചെടുക്കുക. ഗരംമസാലയും പെരുംജീരകവും കറിവേപ്പിലയും ആവശ്യത്തിനു ഉപ്പും ചേര്ത്ത് ഒന്നാം പാലിനൊപ്പം വീണ്ടും തിളപ്പിക്കുക.
ഫിഷ് കട്ട്ലറ്റ്
ചേരുവകള്:
സ്രാവ്/ഏട്ട മീന് -1/2 കിലോ, കോഴിമുട്ട-2 എണ്ണം, ചെറിയ ഉള്ളി-10 എണ്ണം, ഇഞ്ചി-25 ഗ്രാം, ഉരുളന്കിഴങ്ങ് -2 എണ്ണം, വേപ്പില-ആവശ്യത്തിന്.
തയാറാക്കുന്ന വിധം:
മീന്, ഉപ്പും മഞ്ഞള് പൊടിയുമിട്ട് വേവിച്ച് മുള്ളുമാറ്റി ഉടച്ചെടുക്കുക. അതിലേക്ക് ഇഞ്ചി, പച്ചമുളക്, വേപ്പില എന്നിവ ഇട്ട് മീനും ചേര്ത്ത് വഴറ്റിയെടുക്കുക.
ഉരുളന്കിഴങ്ങ് വേവിച്ചതു ഉടച്ച് മീനുമായി ചേര്ത്ത് കുഴക്കുക. ശേഷം നമുക്കിഷ്ടമുള്ള രൂപത്തില് പരത്തിയെടുക്കാം. ഇത് കോഴിമുട്ട അടിച്ചതില് മുക്കി റൊട്ടി പൊടിയില് പൊതിഞ്ഞ് വെളിച്ചെണ്ണയില് വറുത്ത് കോരുക.
ക്രീം ചീസ് കേക്ക്
ചേരുവകള്:
ബട്ടര് -200 ഗ്രാം, മൈദ-200 ഗ്രാം, ബേക്കിങ് പൗഡര്-ഒരു ടീസ്പൂണ്, ബേക്കിങ് സോഡ-അര ടീസ്പൂണ്, കാരമല്-20 ഗ്രാം, ഉപ്പ്-2 നുള്ള്, സോഫ്റ്റ് ചീസ് -200 ഗ്രാം, ക്രീം -ഒരു കപ്പ്, മില്ക്ക് മെയ്ഡ്-അര കപ്പ്,ജെലാറ്റിന് ഉരുക്കിയത് -2 ടീസ്പൂണ്
തയാറാക്കുന്ന വിധം:
മൈക്രോവേവ് ഓവന് 165 ഡിഗ്രി സെന്റി ഗ്രേഡില് സെറ്റു ചെയ്യുക. കേക്കുണ്ടാക്കാനായി പാന് എടുത്ത് ബട്ടര് പുരട്ടുക. ഒരു ബൗളില് മൈദ, ബേക്കിങ് പൗഡര്, ബേക്കിങ് സോഡ, കാരമല്, ഉപ്പ് എന്നിവ ചേര്ത്ത് നന്നായി മിക്സ് ചെയ്തെടുക്കുക. ഇത് പാനില് ഒഴിച്ച് മുക്കാല് മണിക്കൂറോളം ബേക്ക് ചെയ്യണം. മൈക്രോവേവില് നിന്നെടുത്ത് ചൂടാറും വരെ വെക്കുക.
സോഫ്റ്റ് ചീസും ,ക്രീമും മില്ക്ക് മെയ്ഡും ജെലാറ്റിന് ഉരുക്കിയതും കൂടി മിക്സിയില് മിക്സ് ചെയ്തെടുത്ത് ഫ്രിഡ്ജില്വെച്ച് സെറ്റ് ചെയ്തെടുക്കുക. ഇത് നേരത്തെ ബേക്ക് ചെയ്തെടുത്തതിനു മുകളില് ഒരു ലെയര് എന്ന പോലെ വച്ചതിനു ശേഷം വീണ്ടും മൈക്രോവേവില് 15 മിനിറ്റ് വച്ച് പുറത്തെടുക്കാം. ജാം ഫ്ളേവറോ, സ്ട്രോബറി സിറപ്പോ വച്ച് അലങ്കരിക്കാം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates