തേങ്ങ മാസങ്ങളോളം ഫ്രഷായി സൂക്ഷിക്കാൻ ഇങ്ങനെ ചെയ്തു നോക്കൂ

തേങ്ങ ചേര്‍ക്കാത്ത കറികള്‍ മലയാളികള്‍ക്ക് വിരളമാണ്. എന്നാല്‍ നാട്ടില്‍ നിന്ന് മാറി നില്‍ക്കുന്ന മലയാളികള്‍ക്ക് ദിവസവും നാളികേരം ചേര്‍ത്തുള്ള കറികള്‍ വീട്ടിലുണ്ടാക്കുക എന്നത് ശ്രമകരമാണ്.

നാളികേരം ഫ്രഷ് ആയി സൂക്ഷിക്കുന്നതാണ് എല്ലാവർക്കും പ്രധാന വെല്ലുവിളിയാകുന്നത്.

തേങ്ങ ചിരകിയതായാലും മുറിച്ച തേങ്ങയായാലും കേടുകൂടാതെ ദിവസങ്ങളോളം സൂക്ഷിക്കാന്‍ ചില മാര്‍ഗങ്ങളുണ്ട്.

ഫ്രീസറിൽ സൂക്ഷിക്കാം

ചിരകിയ തേങ്ങ ചെറിയ അളവിൽ വായു കടക്കാത്ത ഫ്രീസർ ബാഗുകളിലോ കണ്ടെയ്‌നറുകളിലോ ആക്കി ഫ്രീസറിൽ വെക്കുക. ഇങ്ങനെ ചെയ്താൽ ആറ് മാസം വരെ തേങ്ങ കേടാകാതെ ഇരിക്കും.

മുറിച്ച തേങ്ങ ഉപ്പ്/വിനാഗിരി ചേർത്ത് വയ്ക്കാം

തേങ്ങ പൊട്ടിച്ച ശേഷം ബാക്കി വരുന്ന മുറിയിൽ അൽപം ഉപ്പ് അല്ലെങ്കിൽ വിനാഗിരി പുരട്ടി ഫ്രിഡ്ജിൽ വെച്ചാൽ പെട്ടെന്ന് പൂപ്പൽ വരുന്നത് ഒഴിവാക്കാം. ഇത് തേങ്ങാമുറി കൂടുതൽ ദിവസം ഫ്രഷായി ഇരിക്കാൻ സഹായിക്കും.

എയർടൈറ്റ് കണ്ടെയ്‌നറിൽ വയ്ക്കാം

ചിരകിയ തേങ്ങ അധികം വെള്ളമില്ലാതെ ഒരു എയർടൈറ്റ് പാത്രത്തിൽ അടച്ച് ഫ്രിഡ്ജിൽ സൂക്ഷിക്കാം. ഈ രീതിയിൽ നാല് മുതൽ ഏഴ് ദിവസം വരെ തേങ്ങ കേടാകാതെയിരിക്കും.

ഉപ്പുവെള്ളത്തിൽ കമഴ്ത്തി വെക്കാം

തേങ്ങ ചിരട്ടയോട് കൂടിയ മുറി, ഉപ്പുവെള്ളത്തിൽ കമഴ്ത്തി വെക്കുന്നത് ദീർഘകാലം കേടുകൂടാതിരിക്കാൻ സഹായിക്കുന്ന ഒരു പരമ്പരാഗത രീതിയാണ്. എന്നാൽ, ഈ വെള്ളം ദിവസവും മാറ്റാൻ ശ്രദ്ധിക്കണം.

ചിരട്ടയിൽ നിന്ന് അടർത്തി സൂക്ഷിക്കാം

ചിരട്ടയിൽ നിന്ന് അടർത്തിയെടുത്ത തേങ്ങാ കഷണങ്ങൾ ചെറുതായി നുറുക്കി, വായു കടക്കാത്ത പാത്രത്തിൽ അടച്ച് ഫ്രിഡ്ജിൽ വെച്ചാൽ ഏകദേശം ഒരാഴ്ചയോളം ഫ്രഷായി ഉപയോഗിക്കാം.