ഈത്തപ്പഴമോ ശർക്കരയോ? ശരീരഭാരം കുറയ്ക്കാൻ മികച്ച മധുരം ഏതാണ്?

മധുരത്തോടുള്ള പ്രിയമാണ് അമിതഭാരം കുറയ്ക്കാൻ ആഗ്രഹിക്കുന്നവർക്ക് എപ്പോഴും വെല്ലുവിളിയാകുന്നത്

പഞ്ചസാര ഒഴിവാക്കി പ്രകൃതിദത്ത ബദലുകൾ തേടുന്നവർക്കിടയിൽ ഏറ്റവും ജനപ്രിയമായ രണ്ട് ഓപ്ഷനുകളാണ് ഈത്തപ്പഴവും ശർക്കരയും.

നമ്മുടെ അടുക്കളകളിലെ എപ്പോഴും ഉണ്ടാകുന്ന ഇവ രണ്ടിൽ ഏതാണ് ശരീരഭാരം കുറയ്ക്കാൻ കൂടുതൽ സഹായിക്കുന്നതെന്ന് നോക്കാം

പോഷക ഗുണങ്ങളിലെ വ്യത്യാസം

രുചിയുടെ കാര്യത്തിൽ രണ്ടും മുന്നിലാണെങ്കിലും പോഷകങ്ങളുടെ കാര്യത്തിൽ ഈത്തപ്പഴം അല്പം കൂടി മികച്ചു നിൽക്കുന്നു.

ഈത്തപ്പഴം

നാരുകൾ , അവശ്യ ധാതുക്കൾ, ആന്റിഓക്‌സിഡന്റുകൾ എന്നിവയാൽ സമ്പന്നമാണ് ഈത്തപ്പഴം. ഇതിലെ ഉയർന്ന നാരുകൾ ദഹനപ്രക്രിയ സാവധാനത്തിലാക്കാനും രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയാനും സഹായിക്കുന്നു.

ശർക്കര

കരിമ്പിൻ നീരോ ഈന്തപ്പന നീരോ കുറുക്കിയാണ് ശർക്കര നിർമ്മിക്കുന്നത്. പഞ്ചസാരയേക്കാൾ ഇതിൽ ഇരുമ്പ്, പൊട്ടാസ്യം, മഗ്നീഷ്യം എന്നിവ അടങ്ങിയിട്ടുണ്ടെങ്കിലും സംസ്കരണ സമയത്ത് ഇതിലെ നാരുകൾ ഭൂരിഭാഗവും നഷ്ടപ്പെടുന്നു.

വിശപ്പ് നിയന്ത്രിക്കുന്നതിൽ ആര് മുന്നിൽ?

ശരീരഭാരം കുറയ്ക്കാൻ ശ്രമിക്കുന്നവർ നേരിടുന്ന പ്രധാന പ്രശ്നം അമിതമായ വിശപ്പാണ്. ഇവിടെ ഈത്തപ്പഴത്തിനാണ് മുൻതൂക്കം.

ഈത്തപ്പഴം

ഇതിലെ ലയിക്കുന്ന നാരുകൾ വയർ നിറഞ്ഞതായി തോന്നാൻ സഹായിക്കുന്നു. ഇത് ഇടവേളകളിലുള്ള ലഘുഭക്ഷണം ഒഴിവാക്കാനും മൊത്തത്തിലുള്ള കലോറി ഉപഭോഗം കുറയ്ക്കാനും സഹായിക്കുമെന്ന് 'ന്യൂട്രീഷൻ ജേണലിൽ' പ്രസിദ്ധീകരിച്ച പഠനങ്ങൾ വ്യക്തമാക്കുന്നു.

ശർക്കര

നാരുകൾ കുറവായതിനാൽ ശർക്കര രക്തപ്രവാഹത്തിൽ വേഗത്തിൽ ലയിക്കുന്നു. ഇത് പെട്ടെന്ന് ഊർജ്ജം നൽകുമെങ്കിലും, അധികം വൈകാതെ തന്നെ വീണ്ടും മധുരം കഴിക്കാനുള്ള ആഗ്രഹം വർദ്ധിപ്പിച്ചേക്കാം.

പഞ്ചസാരയ്ക്ക് പകരം ഉപയോഗിക്കാവുന്ന മികച്ച പോഷകങ്ങൾ ഇവ രണ്ടിലുമുണ്ടെങ്കിലും അളവ് നിയന്ത്രിക്കേണ്ടത് അത്യാവശ്യമാണ്.

കലോറി കുറയ്ക്കാൻ ആഗ്രഹിക്കുന്നവർക്ക് വിശപ്പ് നിയന്ത്രിക്കാൻ സഹായിക്കുന്ന ഈത്തപ്പഴമാണ് കൂടുതൽ അനുയോജ്യം.

വിളർച്ചയുള്ളവർക്കും ഉടനടി ഊർജ്ജം വേണ്ടവർക്കും ശർക്കര ഗുണകരമാണ്.