പല്ലുതേച്ചിട്ടും വായ്നാറ്റമുണ്ടോ? കാരണം ഇതാകാം, പരിഹാരവും അറിയാം

സംസാരിക്കുമ്പോൾ മറ്റുള്ളവർക്ക് ബുദ്ധിമുട്ടുണ്ടാക്കുമോ എന്ന ആശങ്ക പലരിലും സ‍ൃഷ്ടിക്കാൻ കാരണമാകാറുണ്ട് വായ്നാറ്റം അഥവാ ഹാലിറ്റോസിസ്. പലപ്പോഴും വായിലെ ബാക്ടീരിയ, പല്ലുകൾക്കിടയിൽ കുടുങ്ങുന്ന ഭക്ഷണാവശിഷ്ടങ്ങൾ, നാവിൽ അടിഞ്ഞുകൂടുന്ന പാളി, വായിലെ വരൾച്ച എന്നിവയാണ് ഇതിന് കാരണം.

വായ വരണ്ടിരിക്കുന്നത് വായ്നാറ്റത്തിനുള്ള പ്രധാന കാരണങ്ങളിലൊന്നാണ്. ഉമിനീർ വായിലെ ബാക്ടീരിയയെയും ഭക്ഷണാവശിഷ്ടങ്ങളെയും നീക്കം ചെയ്യുന്നതിൽ പ്രധാന പങ്കുവഹിക്കുന്നു. ആവശ്യത്തിന് വെള്ളം കുടിക്കുന്നത് വായ വരണ്ടുപോകുന്നത് തടയാനും വായ്നാറ്റം കുറയ്ക്കാനും സഹായിക്കും.

പാർസ്ലി വായ്നാറ്റം കുറയ്ക്കാനുള്ള പരമ്പരാഗത മാർഗങ്ങളിലൊന്നാണ്. ഇതിലെ ക്ലോറോഫിൽ അടക്കമുള്ള ഘടകങ്ങൾ ദുർഗന്ധത്തിന് കാരണമാകുന്ന ചില സൾഫർ സംയുക്തങ്ങളെ പ്രതിരോധിക്കാൻ സഹായിക്കാമെന്നാണ് പഠനങ്ങൾ സൂചിപ്പിക്കുന്നത്. എന്നാൽ ഇതുമായി ബന്ധപ്പെട്ട തെളിവുകൾ പരിമിതമാണെന്നതും ശ്രദ്ധിക്കണം.

പ്രോബയോട്ടിക് ബാക്ടീരിയ അടങ്ങിയ തൈര് വായിലെ ദുർഗന്ധം കുറയ്ക്കാൻ സഹായിക്കാമെന്നാണ് ചില ഗവേഷണങ്ങൾ സൂചിപ്പിക്കുന്നത്.

വെളുത്തുള്ളി, സവാള തുടങ്ങിയവ കഴിച്ചതിനു ശേഷം വായിൽ മണം തങ്ങുന്നത് സാധാരണമാണ്. വെളുത്തുള്ളി കഴിച്ചതിന് ശേഷം പാൽ കുടിക്കുന്നത് ഈ ഗന്ധം കുറയ്ക്കാൻ സഹായിക്കും.

ഭക്ഷണത്തിന് ശേഷം പെരുംജീരകം ചവയ്ക്കുന്ന ശീലം ഇന്ത്യയിൽ ഏറെക്കാലമായി നിലനിൽക്കുന്നതാണ്. പെരുംജീരകത്തിലെ സുഗന്ധമുള്ള എണ്ണകൾ വായിന് ഫ്രഷ് ഗന്ധം നൽകാൻ സഹായിക്കും. എന്നാൽ ഇത് വായ്നാറ്റത്തിന്റെ അടിസ്ഥാന കാരണം പരിഹരിക്കുന്നതിന് പകരമല്ല.

വിറ്റാമിൻ സി അടങ്ങിയ ഓറഞ്ച് ഉമിനീർ ഉൽപാദനം വർധിപ്പിക്കാൻ സഹായിച്ചേക്കാം. അതേസമയം, ​ഗ്രീൻ ആപ്പിൾ വെളുത്തുള്ളി കഴിച്ചതിന് ശേഷമുള്ള ദുർഗന്ധം കുറയ്ക്കാൻ സഹായിക്കും.

ഗ്രീൻ ടീയ്ക്ക് ബാക്ടീരിയ വിരുദ്ധവും ദുർഗന്ധം കുറയ്ക്കുന്നതുമായ ചില ഗുണങ്ങൾ ഉണ്ടെന്ന് ഗവേഷണങ്ങൾ സൂചിപ്പിക്കുന്നു. അതിനാൽ ഇടയ്ക്കിടെ ഗ്രീൻ ടീ കുടിക്കുന്നത് താൽക്കാലികമായി ശ്വാസത്തിന്റെ ഗന്ധം ഫ്രഷ് ആക്കാൻ സഹായിച്ചേക്കാം.

ഫ്ലൂറൈഡ് അടങ്ങിയ ടൂത്ത്‌പേസ്റ്റ് ഉപയോഗിച്ച് കുറഞ്ഞത് രണ്ട് മിനിറ്റ് വീതം ദിവസത്തിൽ രണ്ടുതവണ പല്ലുതേക്കുന്നത് വായ്നാറ്റം ഒഴിവാൻ സഹായിക്കും. പല്ലുകൾക്കിടയിൽ കുടുങ്ങിയ ഭക്ഷണാവശിഷ്ടങ്ങളും ബാക്ടീരിയയും നീക്കം ചെയ്യാൻ ദിവസത്തിൽ ഒരിക്കലെങ്കിലും ഫ്ലോസ് ചെയ്യുന്നതും പ്രധാനമാണ്.

പല്ലുകളിൽ മാത്രമല്ല, നാവിലും ബാക്ടീരിയ അടിഞ്ഞുകൂടാം. ഇത് വായ്നാറ്റത്തിന് കാരണമാകാം. അതിനാൽ ടൂത്ത് ബ്രഷോ ടംഗ് സ്ക്രാപ്പറോ ഉപയോഗിച്ച് ദിവസത്തിൽ ഒരുതവണയെങ്കിലും നാവ് വൃത്തിയാക്കുന്നത് ഗുണം ചെയ്യും.