ധൈര്യമുണ്ടോ ഈ പുസ്തകങ്ങൾ ഒറ്റക്ക് വായിച്ചു തീർക്കാൻ?

ഹൊറർ കഥകളെന്ന് കേൾക്കുമ്പോൾ പ്രേതങ്ങളും രാക്ഷസന്മാരും രക്തരൂക്ഷിതമായ കൊലപാതകങ്ങളുമൊക്കെയായിരിക്കും പലരുടെയും മനസ്സിലെത്തുക. എന്നാൽ ചില പുസ്തകങ്ങൾ ഭയപ്പെടുത്തുന്നത് അതുകൊണ്ട് മാത്രമല്ല. വായിച്ചുതീർന്ന ശേഷവും മനസ്സിൽ ചോദ്യങ്ങൾ ബാക്കിയാക്കുന്ന പ്രമേയങ്ങളും മനുഷ്യന്റെ ഇരുണ്ട വശങ്ങളിലേക്കുള്ള സഞ്ചാരവും ഹൊറർ നോവലുകളെ കൂടുതൽ അസ്വസ്ഥമാക്കുന്നതാക്കും.

ടെൻഡർ ഈസ് ദി ഫ്ലെഷ് - അഗസ്റ്റിന ബാസ്റ്ററിക്ക

മനുഷ്യന്റെ ഭക്ഷണശീലങ്ങളെയും ഉപഭോഗസംസ്കാരത്തെയും ഏറ്റവും അസ്വസ്ഥമാക്കുന്ന രീതിയിൽ ചോദ്യം ചെയ്യുന്ന ഡിസ്റ്റോപ്യൻ ഹൊറർ നോവലാണ് ടെൻഡർ ഈസ് ദി ഫ്ലെഷ്. ഒരു വൈറസ് ബാധയെ തുടർന്ന് മൃഗമാംസം മനുഷ്യന് അപകടകരമാകുന്നതോടെ മനുഷ്യരെ തന്നെ ഭക്ഷണത്തിനായി വളർത്തുകയും ഉപയോഗിക്കുകയും ചെയ്യുന്ന ഒരു സമൂഹമാണ് നോവലിന്റെ പശ്ചാത്തലം.

അസഹ്യമായ രംഗങ്ങൾ മാത്രമല്ല, മനുഷ്യർ ഭീകരമായ ഒരു സാഹചര്യത്തെ എങ്ങനെ സാധാരണ ജീവിതത്തിന്റെ ഭാഗമാക്കി മാറ്റുന്നു എന്നതാണ് പുസ്തകത്തിന്റെ ഭയപ്പെടുത്തുന്ന വശം. ഉപഭോഗത്തെക്കുറിച്ചുള്ള സാമൂഹിക വിമർശനവും ഇതിൽ ശക്തമാണ്.

ദി ട്രൂപ്പ് – നിക്ക് കട്ടർ

കാനേഡിയൻ തീരത്തുള്ള ഒറ്റപ്പെട്ട ദ്വീപിൽ ഒരു ബോയ് സ്കൗട്ട് സംഘവും അവരുടെ മുതിർന്ന നേതാവും കുടുങ്ങുന്നതാണ് ദി ട്രൂപ്പിന്റെ പശ്ചാത്തലം. അപ്രതീക്ഷിതമായി ദ്വീപിലെത്തുന്ന ഒരു രോഗബാധിതനായ വ്യക്തിയോടെയാണ് ഭീകര സംഭവങ്ങൾ ആരംഭിക്കുന്നത്. ശരീരത്തെ അസ്വസ്ഥമാക്കുന്ന വിവരണങ്ങളും അതിജീവനത്തിന്റെ ഭയവും ചേർന്നാണ് നോവൽ മുന്നോട്ടുപോകുന്നത്.

ദി ഡീപ് – നിക്ക് കട്ടർ

കടലിന്റെ ആഴങ്ങളിലേക്ക് ഇറങ്ങുന്ന ഭയമാണ് ദി ഡീപ് അവതരിപ്പിക്കുന്നത്. മരിയാന ട്രെഞ്ചിലെ ഒറ്റപ്പെട്ട അണ്ടർവാട്ടർ ലാബിലേക്ക് എത്തുന്ന നായകനെ ചുറ്റിപ്പറ്റിയാണ് കഥ. ഇരുട്ടും ഏകാന്തതയും നിസ്സഹായതയും ചേർന്ന് ഒരു ക്ലോസ്ട്രോഫോബിക്ക് അന്തരീക്ഷമാണ് പുസ്തകം സൃഷ്ടിക്കുന്നത്.

കം ക്ലോസർ – സാറ ഗ്രാൻ

ഒരു വ്യക്തിയുടെ ശരീരത്തിന്റെയും ചിന്തകളുടെയും നിയന്ത്രണം മറ്റൊരു ശക്തിക്ക് നഷ്ടപ്പെടുന്നതാണ് കം ക്ലോസറിന്റെ പ്രമേയം. വിജയകരമായ ആർക്കിടെക്ടായ അമാൻഡയുടെ ജീവിതത്തിലേക്ക് ദുരൂഹമായ അശരീരശക്തി കടന്നുവരുന്നതോടെയാണ് കഥ മാറുന്നത്. സ്വന്തം ശരീരത്തിന്റെയും മനസ്സിന്റെയും നിയന്ത്രണം നഷ്ടപ്പെടുന്ന ആശയമാണ് പുസ്തകത്തിലെ ഏറ്റവും അസ്വസ്ഥമാക്കുന്ന ഭാഗം.

ഡിവൊല്യൂഷൻ – മാക്സ് ബ്രൂക്സ്

ബി​ഗ് ഫൂട്ട് പോലുള്ള ഒരു ജീവിയെ ചുറ്റിപ്പറ്റിയുള്ള കഥയാണെങ്കിലും, ഡിവൊല്യൂഷന്റെ ഭയം അതിലുമപ്പുറത്തേക്ക് പോകുന്നു. ഒറ്റപ്പെട്ട പ്രദേശത്ത് കഴിയുന്ന ഒരു കൂട്ടം ആളുകൾ ഭീമാകാരമായ ഒരു ജീവിയുടെ ഇരകളാകുന്നതാണ് കഥയുടെ പശ്ചാത്തലം.'ആരോ പിന്തുടരുന്നു', 'നമ്മളാണ് ഇര' എന്ന തോന്നലാണ് പുസ്തകം സൃഷ്ടിക്കുന്നത്. അതിനാൽ ജീവിയുടെ രൂപത്തേക്കാൾ വേട്ടയാടലാണ് വായനക്കാരനെ അസ്വസ്ഥനാക്കുന്നത്.

ബേബി ടീത്ത് – സോജെ സ്റ്റേജ്

ഒരു കുട്ടിയെ ചുറ്റിപ്പറ്റിയുള്ള ഭയമാണ് ബേബി ടീത്തിന്റെ പ്രത്യേകത. ഏഴുവയസ്സുകാരിയായ ഹന്ന, അമ്മ സുസെറ്റിനോട് കാണിക്കുന്ന പെരുമാറ്റം ക്രമേണ കൂടുതൽ ഭീകരമാകുന്നു. അമാനുഷിക ശക്തികളെ ആശ്രയിക്കാതെ തന്നെ ഒരു കുടുംബത്തിനുള്ളിൽ ഭയം സൃഷ്ടിക്കുകയാണ് നോവൽ. സ്വന്തം കുഞ്ഞിനെക്കുറിച്ച് ഒരു അമ്മയ്ക്ക് ഭയം തോന്നുന്ന സാഹചര്യം കഥയെ അസ്വസ്ഥമാക്കുന്നു.

ഹൊറർസ്റ്റോർ – ഗ്രേഡി ഹെൻഡ്രിക്സ്

ഒരു ഫർണിച്ചർ സ്റ്റോറിനുള്ളിൽ നടക്കുന്ന ഹൊറർ കഥയാണ് ഹൊറർസ്റ്റോർ. രാത്രി സ്റ്റോറിൽ നടക്കുന്ന നശീകരണ പ്രവർത്തനങ്ങൾ കണ്ടെത്താനായി ജീവനക്കാർ രാത്രി മുഴുവൻ അവിടെ കഴിയുമ്പോഴാണ് കാര്യങ്ങൾ ഭീകരമാകുന്നത്. ഫർണിച്ചർ മാനുവലിൻ്റെ രൂപത്തിൽ ഡിസൈൻ ചെയ്തിരിക്കുന്ന ഹൊറർസ്റ്റോർ ക്യാപിറ്റലിസത്തെക്കുറിച്ചുള്ള സാമൂഹിക പരാമർശങ്ങളും ചേർന്ന കൃതിയാണ്.

അയാം തിങ്കിങ് ഓഫ് എൻഡിങ് ​ദിസ് – ഇയാൻ റീഡ്

കാമുകനോടൊപ്പം അവന്റെ മാതാപിതാക്കളെ കാണാൻ പോകുന്ന ഒരു യുവതിയുടെ യാത്രയിലാണ് അയാം തിങ്കിങ് ഓഫ് എൻഡിങ് ​ദിസ് തുടങ്ങുന്നത്. കഥ മുന്നോട്ടുപോകുന്തോറും യാഥാർഥ്യവും ഭ്രമവും തമ്മിലുള്ള അതിർത്തി മങ്ങുന്നു. ചുരുങ്ങിയതും വിചിത്രവുമായ ഈ നോവലിന്റെ ശക്തി അതിന്റെ വികൃതമായ അന്തരീക്ഷത്തിലാണ്.