രാത്രിയിൽ സിങ്കിൽ പാത്രങ്ങൾ ഇട്ടിട്ട് കിടക്കാറുണ്ടോ? ഈ കാര്യങ്ങൾ ശ്രദ്ധിക്കണം

രാത്രി ഭക്ഷണം കഴിച്ചശേഷം അടുക്കള ഒന്ന് വൃത്തിയാക്കി ഉറങ്ങുക എന്നത് പലർക്കും വലിയ ജോലിയാണ്. എന്നാൽ സിങ്കിൽ നനഞ്ഞും ഭക്ഷണാവശിഷ്ടങ്ങളോടെയും മണിക്കൂറുകളോളം കിടക്കുന്ന ചില സാധനങ്ങൾ അടുക്കളയിലെ ശുചിത്വത്തെ ബാധിക്കാമെന്നാണ് വിദഗ്ധരുടെ മുന്നറിയിപ്പ്.

അടുക്കളയിലെ സിങ്ക് തന്നെ വീട്ടിലെ ബാക്ടീരിയ കൂടുതലായി കാണപ്പെടുന്ന ഇടങ്ങളിലൊന്നാണ്. ഭക്ഷണം കഴുകുന്നതും പച്ചക്കറികൾ വൃത്തിയാക്കുന്നതും മാംസം കൈകാര്യം ചെയ്യുന്നതുമെല്ലാം സിങ്കിലൂടെയാണ് നടക്കുന്നത്. അതിനാൽ രാത്രിയിൽ ചില സാധനങ്ങൾ അവിടെ ഉപേക്ഷിക്കുന്നത് ബാക്ടീരിയ വളരാനും ദുർഗന്ധമുണ്ടാകാനും കാരണമാകാം.

ഫ്രീസറിൽ നിന്ന് എടുത്ത മാംസമോ മറ്റ് ഭക്ഷണസാധനങ്ങളോ സിങ്കിൽ വച്ച് രാത്രിയിൽ ഉരുകാൻ വിടുന്ന ശീലം ഒഴിവാക്കുന്നതാണ് നല്ലത്. ഭക്ഷണം ഉരുകുമ്പോൾ അതിൽ നിന്നുള്ള ദ്രാവകം സിങ്കിലേക്ക് ഒഴുകുകയും അതുവഴി ബാക്ടീരിയ പടരുകയും ചെയ്യാം.

പാത്രം കഴുകിയ ശേഷം നനഞ്ഞ സ്പോഞ്ചും തുണിയും സിങ്കിൽ തന്നെ ഉപേക്ഷിക്കുന്നത് സാധാരണമാണ്. എന്നാൽ വെള്ളത്തിൽ കുതിർന്ന നിലയിൽ ഇവ കിടക്കുന്നത് ബാക്ടീരിയ വളരാൻ അനുകൂലമായ സാഹചര്യമൊരുക്കും. ദുർഗന്ധത്തിനും കാരണമാകാം.

'രാവിലെ കഴുകാം' എന്ന് കരുതി ഭക്ഷണാവശിഷ്ടങ്ങളുള്ള പാത്രങ്ങൾ രാത്രി മുഴുവൻ സിങ്കിൽ കിടത്തുന്നതും നല്ല ശീലമല്ല. ഭക്ഷണത്തിന്റെ അവശിഷ്ടങ്ങളും കെട്ടിക്കിടക്കുന്ന വെള്ളവും ചേർന്ന് ബാക്ടീരിയ വളരാനുള്ള സാഹചര്യമുണ്ടാക്കാം.

അധികസമയം വെള്ളത്തിൽ മുക്കിവയ്ക്കേണ്ട വലിയ പാത്രങ്ങളോ കാസറോൾ ഡിഷുകളോ മാത്രമാണ് ഇതിനൊരു പരിധിവരെ ഒഴിവാക്കാവുന്നത്. അത്തരം പാത്രങ്ങളിൽ ഡിഷ് സോപ്പ് ചേർത്ത വെള്ളം ഉപയോഗിക്കുകയും രാവിലെ ആദ്യം തന്നെ കഴുകുകയും വേണം.

പാത്രം കഴുകുമ്പോൾ സിങ്കിലെ സ്ട്രെയിനറിൽ അടിഞ്ഞുകൂടുന്ന ഭക്ഷണാവശിഷ്ടങ്ങൾ രാത്രിയിൽ തന്നെ നീക്കം ചെയ്യണം. രാവിലെ വരെ അവിടെ കിടന്നാൽ ഭക്ഷണാവശിഷ്ടങ്ങൾ പെട്ടെന്ന് അഴുകാനും ദുർഗന്ധമുണ്ടാകാനും സാധ്യതയുണ്ട്. ഉറങ്ങുന്നതിന് മുമ്പ് സ്ട്രെയിനർ കാലിയാക്കി നന്നായി കഴുകുന്നത് നല്ല ശീലമാണ്.

വുഡൻ സ്പൂൺ, കട്ടിങ് ബോർഡ് തുടങ്ങിയ മരത്തിൽ നിർമിച്ച സാധനങ്ങൾ വെള്ളത്തിൽ കുതിർത്ത് സിങ്കിൽ രാത്രി മുഴുവൻ ഇടരുത്. ഇത്തരത്തിലുള്ള സാധനങ്ങൾ കൂടുതൽ നേരം വെള്ളത്തിൽ കിടക്കുന്നത് വളയാനും പൊട്ടാനും സാധ്യത വർധിപ്പിക്കും. ഈർപ്പം ബാക്ടീരിയ വളർച്ചയ്ക്കും കാരണമാകാം.

കാസ്റ്റ് അയൺ പാത്രം സിങ്കിൽ വെള്ളത്തിൽ കിടന്നാൽ തുരുമ്പെടുക്കാനുള്ള സാധ്യതയുണ്ട്. പ്രത്യേകിച്ച് രാത്രി മുഴുവൻ വെള്ളം കെട്ടിക്കിടക്കുന്ന സാഹചര്യത്തിൽ പാത്രത്തിന് കേടുപാടുകൾ സംഭവിക്കാം. തുരുമ്പ് സിങ്കിലേക്കും പടരാൻ സാധ്യതയുണ്ട്.

കത്തി സിങ്കിൽ ഇട്ടിട്ട് രാവിലെ കഴുകാമെന്ന ശീലവും ഒഴിവാക്കണം. വെള്ളത്തിനടിയിൽ കിടക്കുന്ന മൂർച്ചയുള്ള കത്തി എടുക്കാൻ ശ്രമിക്കുമ്പോൾ പരിക്കേൽക്കാനുള്ള സാധ്യതയുണ്ട്. സിങ്കിൽ കിടക്കുന്ന മറ്റ് പാത്രങ്ങളുമായോ കഠിനമായ പ്രതലങ്ങളുമായോ നിരന്തരം ഇടിക്കുന്നത് കത്തിയുടെ മൂർച്ചയെ ബാധിക്കാം.