പാക്കറ്റ് പാൽ തിളപ്പിക്കേണ്ടതുണ്ടോ?

ഒരു നേരമെങ്കിലും പാൽ കുടിക്കുന്നവരോ അല്ലെങ്കിൽ കുട്ടികളെ പാൽ കുടിപ്പിക്കുന്നവരോ ആകും നമ്മളിൽ ചിലരെങ്കിലും.

പാക്കറ്റ് പാലാണെങ്കിലും അല്ലെങ്കിലും ഉപയോഗിക്കും മുമ്പ് നന്നായി തിളപ്പിക്കുകയെന്നതാണ് നമ്മുടെ ശീലം.

എന്നാൽ എല്ലാ പാക്കറ്റ് പാലുകളും തിളപ്പിച്ച് കുടിക്കേണ്ടതില്ലെന്നാണ് ആരോഗ്യവിദഗ്ധർ പറയുന്നത്.

പാക്കറ്റ് പാലുകൾ നിശ്ചിത താപനിലയിൽ ചൂടാക്കിയ ശേഷം അണുവിമുക്തമാക്കിയാണ് വിൽക്കുന്നത്. ഇതിനെ പാസ്ചറൈസേഷന് എന്നാണ് പറയുന്നത്. പാസ്ചറൈസ്ഡ് പാലാണോ എന്നത് പാക്കറ്റിൽ രേഖപ്പെടുത്തിയിട്ടുണ്ടാകും. ഇത്തരത്തിലുള്ള പാക്കറ്റ് പാല്‍ തിളപ്പിക്കേണ്ടതില്ല.

പാസ്ചറൈസ് ചെയ്യുന്നതിലൂടെ പാലിലുണ്ടാകുന്ന ഇ.കോളി,കോക്‌സിയെല്ലെ,ലിസ്റ്റീരിയ,കാംപിലോബോക്റ്റർ തുടങ്ങിയ അപകടകാരികളായ ബാക്ടീരിയകളെയും വൈറസുകളെയും നശിപ്പിക്കപ്പെടും. കൂടാതെ പാൽ കേടുകൂടാതെയിരിക്കാനും ഇത് സഹായിക്കും.

പാൽ ചൂടോടെ കുടിക്കണം എന്ന് നിർബന്ധമുള്ളവരോ, കുട്ടികൾക്ക് കൊടുക്കുന്നവരോ പാൽ വെറുതെ ഒന്ന് ചൂടാക്കിയാൽ മതി, തിളപ്പിക്കേണ്ട ആവശ്യമില്ല.

പാസ്ചറൈസ് ചെയ്ത പാൽ 10 മിനിറ്റിൽ കൂടുതൽ തിളപ്പിക്കുമ്പോൾ അതിലടങ്ങിയിരിക്കുന്ന പല വിറ്റാമിനുകളുടെയും ധാതുക്കളുടെയും അളവ് കുറയും.

100 ഡിഗ്രി സെൽഷ്യസിന് മുകളിൽ പാക്കറ്റ് പാൽ തിളപ്പിക്കുമ്പോൾ വിറ്റമിൻ ബി1,ബി3,ബി6, ഫോളിക് ആസിഡ്,വിറ്റമിൻ ഡി, എന്നിവയുൾപ്പെടെ പല വിറ്റമിനുകളും നഷ്ടമാകുമെന്ന് ചില പഠങ്ങൾ പറയുന്നു.