ഈ പച്ചക്കറികളുടെ തൊലി കളയാറുണ്ടോ? ആരോ​ഗ്യത്തിന് വൻ നഷ്ടം

ആരോഗ്യസംരക്ഷണത്തിൽ പച്ചക്കറിക്ക് വളരെ പ്രധാനപ്പെട്ട സ്ഥാനമുണ്ട്.

ഒട്ടുമിക്ക പച്ചക്കറികളും തൊലി കളഞ്ഞ ശേഷമാണ് നമ്മൾ ഉപയോഗിക്കുന്നത്.

പച്ചക്കറികളുടെ തൊലിയിലും തൊലിയോട് ചേർന്ന ഭാഗങ്ങളിലുമാണ് അവയിലെ ഏറ്റവും പ്രധാനപ്പെട്ട പോഷകങ്ങളും നാരുകളും ആൻ്റിഓക്സിഡൻ്റുകളും അടങ്ങിയിട്ടുള്ളത്.

വൃത്തിയായി കഴുകിയ ശേഷം തൊലി കളയാതെ ഉപയോഗിക്കാവുന്ന പച്ചക്കറികൾ ഏതൊക്കെയാണെന്ന് നോക്കാം.

ഉരുളക്കിഴങ്ങ്

ഉരുളക്കിഴങ്ങിന്റെ തൊലി നാരുകൾ, വിറ്റാമിനുകൾ, ഇരുമ്പ്, പൊട്ടാസ്യം എന്നിവയുടെ മികച്ച ഉറവിടമാണ്. ഇവ ആരോ​ഗ്യത്തിന് വളരെ നല്ലതാണ്. അതിനാൽ ഉരുളക്കിഴങ്ങ് മണ്ണും അഴുക്കും നന്നായി നീക്കം ചെയ്ത ശേഷം ഉപയോഗിക്കാവുന്നതാണ്.

കാരറ്റ്

കാരറ്റിന്റെ തൊലി കളയുന്നതിലൂടെ, അതിലെ പോഷകങ്ങളുടെ ഒരു പ്രധാന ഭാഗം നഷ്ടപ്പെടുന്നുണ്ട്. കാരറ്റിന്റെ തൊലിയിൽ വിറ്റാമിൻ സി, ബി3, ആൻ്റിഓക്സിഡൻ്റുകൾ, ഡയറ്ററി നാരുകൾ അടങ്ങിയിട്ടുണ്ട്. ഇവ കണ്ണിന്റെ ആരോഗ്യത്തിനും ചർമ്മത്തിനും ഗുണകരമാണ്.

വെള്ളരി

വെള്ളരിയുടെ തൊലിയിൽ രക്തം കട്ടപിടിക്കുന്നതിനും എല്ലുകളുടെ ആരോഗ്യത്തിനും അത്യാവശ്യമായ വിറ്റാമിൻ കെ ധാരാളമുണ്ട്. കൂടാതെ, ചർമ്മം, മുടി, നഖം എന്നിവയുടെ ആരോഗ്യത്തെ പിന്തുണയ്ക്കുന്ന സിലിക്ക ഇതിലുണ്ട്.

വഴുതനങ്ങ

വഴുതനങ്ങയുടെ തൊലിയിൽ നാസുനിൻ എന്ന ആൻ്റിഓക്സിഡന്റ് അടങ്ങിയിട്ടുണ്ട്. ഇത് തലച്ചോറിലെ കോശങ്ങളെ ഓക്സിഡേറ്റീവ് സ്ട്രെസ്സിൽ നിന്ന് സംരക്ഷിക്കാൻ സഹായിക്കുന്നു. കൂടാതെ, നാരുകളും ധാരാളമുണ്ട്.

പോഷകങ്ങൾ ധാരാളമായി ലഭിക്കാൻ തൊലി കളയാതിരിക്കുന്നതാണ് നല്ലതെങ്കിലും, ചില സാഹചര്യങ്ങളിൽ തൊലി കളയേണ്ടതുണ്ട്. അതായത്, ചില വലിയ കാരറ്റുകൾ, വെള്ളരി എന്നിവയുടെ തൊലിക്ക് കട്ടിയോ കയ്പ്പോ ഉണ്ടെങ്കിൽ തൊലി കളയാം.