വാഷിങ് മെഷീനിൽ വസ്ത്രങ്ങൾ കഴുകിയിട്ടും മണം പോകുന്നില്ലേ? കാരണം ഇതാകാം

വാഷിങ് മെഷീനിൽ വസ്ത്രങ്ങൾ കഴുകിയാൽ വൃത്തിയും നല്ല മണവുമുള്ള വസ്ത്രങ്ങൾ പുറത്തുവരുമെന്നാണ് പ്രതീക്ഷ. എന്നാൽ ചിലപ്പോൾ കഴുകിയെടുത്ത വസ്ത്രങ്ങളിൽ പോലും നനഞ്ഞതുപോലെയോ പഴകിയതുപോലെയോ ഒരു മണം ഉണ്ടാകാം. വീണ്ടും കഴുകിയിട്ടും മണം മാറുന്നില്ലെങ്കിൽ പ്രശ്നം വസ്ത്രങ്ങളിൽ മാത്രമാകണമെന്നില്ല. വാഷിങ് മെഷീനിലെ ചില ഭാഗങ്ങളിലെ അഴുക്കും ഈർപ്പവുമാകാം കാരണം.

ഡിറ്റർജന്റ്, ഫാബ്രിക് സോഫ്റ്റ്‌നർ, ശരീരത്തിലെ എണ്ണമയം, വസ്ത്രങ്ങളിൽ നിന്നുള്ള നാരുകൾ (ലിന്റ്) തുടങ്ങിയ അവശിഷ്ടങ്ങൾ വാഷിംഗ് മെഷീനിൽ അടിഞ്ഞുകൂടാം. ഈർപ്പം നിലനിൽക്കുന്ന ഭാഗങ്ങളിൽ പൂപ്പലും ദുർഗന്ധത്തിന് കാരണമാകുന്ന സൂക്ഷ്മജീവികളും വളരാനും സാധ്യതയുണ്ട്.

വാഷിങ് മെഷീൻ വൃത്തിയാക്കുമ്പോൾ പലരും ഡ്രം മാത്രം ശ്രദ്ധിക്കും. എന്നാൽ ഡിറ്റർജന്റ് ഇടുന്ന ഡ്രോയറിലും സോപ്പിന്റെയും ഫാബ്രിക് സോഫ്റ്റ്‌നറിന്റെയും അവശിഷ്ടങ്ങൾ അടിഞ്ഞുകൂടാം. കാലക്രമേണ ഇവിടം പൂപ്പലിനും ദുർഗന്ധത്തിനും കാരണമാകാം. ഡ്രോയർ ഇടയ്ക്കിടെ പുറത്തെടുത്ത് ചൂടുവെള്ളവും മൃദുവായ ക്ലീനറും ഉപയോഗിച്ച് വൃത്തിയാക്കുക.

ഫ്രണ്ട്-ലോഡ് വാഷിംഗ് മെഷീൻ ഉപയോഗിക്കുന്നവർ ശ്രദ്ധിക്കേണ്ട ഭാഗമാണ് വാതിലിന് ചുറ്റുമുള്ള റബർ സീൽ. ഇതിൻ്റെ മടക്കുകളിൽ വെള്ളവും ഡിറ്റർജൻ്റ് അവശിഷ്ടങ്ങളും ലിൻ്റും കുടുങ്ങിക്കിടക്കാം. ഈ ഭാഗം ഈർപ്പമുള്ളതായി തുടരുന്നത് ദുർഗന്ധത്തിനും പൂപ്പലിനും കാരണമാകും. വാഷിങ് കഴിഞ്ഞാൽ സീലിന്റെ മടക്കുകളിലെ വെള്ളവും അഴുക്കും തുടച്ചുനീക്കുക.

ആവശ്യത്തിലധികം ഡിറ്റർജന്റ് ഉപയോഗിക്കുന്നത് വസ്ത്രങ്ങൾ കൂടുതൽ വൃത്തിയാകുമെന്ന് ഉറപ്പില്ല. മറിച്ച് അധിക ഡിറ്റർജന്റ് പൂർണമായി കഴുകിപ്പോകാതെ മെഷീനിലും വസ്ത്രങ്ങളിലും അവശിഷ്ടമായി കിടക്കാം. ഇത് പിന്നീട് ദുർഗന്ധത്തിന് കാരണമാകാം.

വാഷിങ് സൈക്കിൾ തീർന്ന ഉടൻ വസ്ത്രങ്ങൾ പുറത്തെടുത്ത് ഉണക്കുന്നതാണ് നല്ലത്. നനഞ്ഞ വസ്ത്രങ്ങൾ അടച്ച മെഷീനിനുള്ളിൽ ഏറെ നേരം കിടന്നാൽ ഈർപ്പം കൂടുകയും ദുർഗന്ധം വസ്ത്രങ്ങളിലേക്ക് പകരുകയും ചെയ്യാം. പ്രത്യേകിച്ച് ചൂടും ഈർപ്പവും കൂടുതലുള്ള കാലാവസ്ഥയിൽ ഈ ശീലം കൂടുതൽ ശ്രദ്ധിക്കണം.

മെഷീനിലെ ഡ്രെയിൻ/പമ്പ് ഫിൽറ്ററിൽ ലിൻ്റ്, മുടി, ചെറിയ വസ്തുക്കൾ തുടങ്ങിയവ അടിഞ്ഞുകൂടാം. ഫിൽറ്റർ തടസ്സപ്പെട്ടാൽ വെള്ളം ശരിയായി പുറത്തുപോകാതിരിക്കുകയും മെഷീനിൽ ദുർഗന്ധം ഉണ്ടാകുകയും ചെയ്യാം. പല പുതിയ വാഷിങ് മെഷീനുകളിലും ടബ് ക്ലീൻ അല്ലെങ്കിൽ ഡ്രം ക്ലീൻ എന്ന പ്രത്യേക സൈക്കിൾ ഉണ്ട്. ഡിറ്റർജന്റ് അവശിഷ്ടങ്ങളും അഴുക്കും നീക്കം ചെയ്യാൻ ഇത് സഹായിക്കും.

വാഷിങ് കഴിഞ്ഞ ഉടൻ തന്നെ വസ്ത്രങ്ങൾക്ക് മണം അനുഭവപ്പെടുകയും മെഷീൻ തുറക്കുമ്പോഴും അതേ മണം ഉണ്ടാകുകയും ചെയ്യുന്നുവെങ്കിൽ ആദ്യം മെഷീൻ വൃത്തിയാക്കുന്നതിൽ ശ്രദ്ധിക്കുക.

എന്നാൽ മെഷീൻ വൃത്തിയാക്കിയ ശേഷവും ദുർഗന്ധം തുടരുകയോ വെള്ളം ശരിയായി പുറത്തുപോകാതിരിക്കുകയോ ചെയ്താൽ സാങ്കേതിക പരിശോധന ആവശ്യമായി വരാം.