ശമ്പളം കിട്ടിയാൽ അപ്പോൾ തന്നെ തീരുമോ? സാമ്പത്തിക ഭദ്രതയ്ക്ക് ഈ ശീലങ്ങൾ പിന്തുടരാം

എത്ര വരുമാനം ലഭിക്കുന്നു എന്നതുപോലെ തന്നെ പ്രധാനമാണ് എങ്ങനെ പണം കൈകാര്യം ചെയ്യുന്നു എന്നതും. കൃത്യമായ ബജറ്റിങ്, സ്ഥിരമായ സമ്പാദ്യം, നിക്ഷേപം, കടം നിയന്ത്രിക്കൽ എന്നിവയിലൂടെ സാമ്പത്തിക സുരക്ഷിതത്വം മെച്ചപ്പെടുത്താം.

മാസവരുമാനവും സ്ഥിരം ചെലവുകളും കണക്കാക്കി ഒരു പ്രതിമാസ ബജറ്റ് തയ്യാറാക്കുകയാണ് പണം കൈകാര്യം ചെയ്യുന്നതിലെ ആദ്യപടി. വാടക, ഭക്ഷണം, വൈദ്യുതി, യാത്ര, വായ്പ തിരിച്ചടവ് തുടങ്ങിയ അവശ്യച്ചെലവുകൾക്കൊപ്പം അനാവശ്യ ചെലവുകളും തിരിച്ചറിയണം.

ശമ്പളം ലഭിച്ച ശേഷം ബാക്കി വരുന്ന തുകയിൽ നിന്ന് സമ്പാദിക്കുന്നതിന് പകരം വരുമാനം ലഭിച്ച ഉടൻ ഒരു ഭാഗം മാറ്റിവെച്ച് ശേഷിക്കുന്ന തുക ചെലവാക്കുന്ന ശീലം സാമ്പത്തിക അച്ചടക്കം വളർത്തും. ഇതിലൂടെ അമിതമായി ചെലവഴിക്കുന്നതും ബജറ്റ് മറികടക്കുന്നതും ഒഴിവാക്കാം.

വീട് വാങ്ങൽ, ഉന്നത വിദ്യാഭ്യാസം, യാത്ര, വിരമിക്കൽ തുടങ്ങിയ ലക്ഷ്യങ്ങൾക്ക് വ്യക്തമായ സമയപരിധി നിശ്ചയിച്ച് പണം മാറ്റിവയ്ക്കുന്നത് സഹായകരമാണ്. ഹ്രസ്വകാല, ദീർഘകാല ലക്ഷ്യങ്ങൾ പ്രത്യേകം തയ്യാറാക്കി അതനുസരിച്ച് സമ്പാദ്യവും നിക്ഷേപവും ക്രമീകരിക്കാം.

സമ്പാദ്യവും നിക്ഷേപവും എത്രയും നേരത്തെ ആരംഭിക്കുന്നതാണ് ഗുണകരം. കൂടുതൽ കാലം പണം നിക്ഷേപിക്കപ്പെടുമ്പോൾ കോംപൗണ്ടിങ്ങിന്റെ പ്രയോജനം ലഭിക്കാൻ കൂടുതൽ സമയം ലഭിക്കും.

ക്രെഡിറ്റ് കാർഡുകളും വായ്പകളും സൗകര്യപ്രദമാണെങ്കിലും അമിതമായ കടബാധ്യത സാമ്പത്തിക സമ്മർദം വർധിപ്പിക്കും. ഉയർന്ന പലിശയുള്ള കടങ്ങൾ സമ്പാദ്യത്തെ ബാധിക്കുകയും ഒന്നിലധികം വായ്പകൾ തിരിച്ചടയ്ക്കുന്നത് മാസബജറ്റിനെ ബുദ്ധിമുട്ടിലാക്കുകയും ചെയ്യാം. അതിനാൽ ആവശ്യത്തിന് മാത്രം കടമെടുക്കുകയും തിരിച്ചടവ് ശേഷി കണക്കാക്കുകയും ചെയ്യുന്നത് പ്രധാനമാണ്.

ജോലി നഷ്ടപ്പെടൽ, അപ്രതീക്ഷിത ചികിത്സാച്ചെലവ്, വാഹനമോ വീട്ടുപകരണങ്ങളോ തകരുന്നത് തുടങ്ങിയ സാഹചര്യങ്ങൾ എപ്പോൾ വേണമെങ്കിലും ഉണ്ടാകാം. അതിനാൽ കുറഞ്ഞത് 3 മുതൽ 6 മാസത്തെ ജീവിതച്ചെലവിന് തുല്യമായ തുക അടിയന്തര ആവശ്യങ്ങൾക്കായി എളുപ്പത്തിൽ ലഭ്യമാകുന്ന രീതിയിൽ മാറ്റിവയ്ക്കുന്നത് സഹായകരമാണ്

അപ്രതീക്ഷിതമായ ആരോഗ്യപ്രശ്നങ്ങളോ അപകടങ്ങളോ വരുമ്പോൾ മുഴുവൻ സമ്പാദ്യവും ചെലവാകുന്നത് ഒഴിവാക്കാൻ ആവശ്യമായ ആരോഗ്യ, ലൈഫ് തുടങ്ങിയ ഇൻഷുറൻസ് പരിരക്ഷകൾ പരിഗണിക്കാം. സാമ്പത്തിക ആസൂത്രണത്തിന്റെ ഭാഗമായാണ് ഇൻഷുറൻസിനെ കാണേണ്ടത്.

പണം കൈകാര്യം ചെയ്യാൻ ഉപയോഗിക്കാവുന്ന ലളിതമായ ഒരു മാർഗമാണ് 50-30-20 നിയമം. നികുതി കഴിഞ്ഞുള്ള വരുമാനത്തിന്റെ ഏകദേശം 50% ആവശ്യങ്ങൾക്കും, 30% ആഗ്രഹങ്ങൾക്കും, 20% സമ്പാദ്യത്തിനും നിക്ഷേപത്തിനുമായി മാറ്റിവയ്ക്കുന്നതാണ് ഈ രീതി. വ്യക്തിയുടെ വരുമാനവും ജീവിതച്ചെലവും അനുസരിച്ച് ഈ അനുപാതം മാറ്റാവുന്നതാണ്.