ബൈക്ക് കഴുകുമ്പോൾ ഈ തെറ്റുകൾ ചെയ്യരുത്; വൃത്തിയാക്കാനിറങ്ങി പണി കിട്ടാതിരിക്കാൻ ശ്രദ്ധിക്കാം

ബൈക്ക് സ്വന്തമായുള്ളവർക്ക് അത് വൃത്തിയായി സൂക്ഷിക്കുന്നത് ഒരു ശീലമാണ്. പൊടിയും ചെളിയും കഴുകിക്കളഞ്ഞ് ബൈക്ക് തിളങ്ങുന്നത് കാണാനും എല്ലാവർക്കും ഇഷ്ടമാണ്. എന്നാൽ വൃത്തിയാക്കുന്നതിനിടെ അറിയാതെ ചെയ്യുന്ന ചില തെറ്റുകൾ ബൈക്കിന്റെ പെയിന്റിനെയും മറ്റ് ഭാഗങ്ങളെയും ബാധിച്ചേക്കാം.

ബൈക്ക് വൃത്തിയാക്കുന്നത് കൃത്യമായ രീതിയിൽ ചെയ്തില്ലെങ്കിൽ പെയിന്റിൽ പാടുകൾ ഉണ്ടാകാനും ചെയിനിന്റെ ആയുസ് കുറയാനും വാഹനത്തിന്റെ മൊത്തത്തിലുള്ള അവസ്ഥയെ ബാധിക്കാനും സാധ്യതയുണ്ടെന്ന് വാഹനപരിചരണ വിദഗ്ധർ ചൂണ്ടിക്കാട്ടുന്നു. ബൈക്ക് ക്ലീനിങ്ങിനിടെ ഒഴിവാക്കേണ്ട അഞ്ച് സാധാരണ തെറ്റുകൾ ഇതാ.

കടുത്ത വെയിലിൽ ബൈക്ക് കഴുകുന്നത് പലരും ചെയ്യുന്ന കാര്യമാണ്. എന്നാൽ വെള്ളവും സോപ്പും പെട്ടെന്ന് ഉണങ്ങുന്നതിനാൽ പെയിന്റിൽ വെള്ളത്തിന്റെ പാടുകളും സോപ്പ് അവശിഷ്ടങ്ങളും ഉണ്ടാകാം. ചില ഭാഗങ്ങൾ മറ്റുള്ളവയെക്കാൾ വേഗത്തിൽ ഉണങ്ങുന്നതിനാൽ ഒരേ രീതിയിൽ വൃത്തിയാകാതിരിക്കാനും സാധ്യതയുണ്ട്.

സാധ്യമെങ്കിൽ തണലുള്ള സ്ഥലത്ത് ബൈക്ക് കഴുകുക. കഴുകിയ ശേഷം വെള്ളം ബൈക്കിൽ കെട്ടിനിൽക്കാതെ മൈക്രോഫൈബർ തുണി ഉപയോഗിച്ച് തുടച്ചെടുക്കാം.

ബൈക്കിന്റെ പ്രധാനപ്പെട്ട ഭാഗങ്ങളിലൊന്നാണ് ചെയിൻ. എന്നാൽ ബോഡി മാത്രം വൃത്തിയാക്കി ചെയിൻ ശ്രദ്ധിക്കാതെ പോകുന്നവരുണ്ട്. അഴുക്ക് അടിഞ്ഞുകൂടിയ ചെയിൻ കൂടുതൽ തേയ്മാനത്തിനും തുരുമ്പിനും ശബ്ദത്തിനും കാരണമാകാം.

വീട്ടിൽ സാധാരണയായി ഉപയോഗിക്കുന്ന ഡിഷ് വാഷ് സോപ്പോ ശക്തമായ മറ്റ് ക്ലീനിങ് കെമിക്കലുകളോ ബൈക്കിൽ ഉപയോഗിക്കുന്നത് ഒഴിവാക്കുന്നതാണ് നല്ലത്. ഇത്തരം ഉൽപ്പന്നങ്ങൾ പെയിന്റിനെ ബാധിക്കാനും പ്ലാസ്റ്റിക് ഭാഗങ്ങൾ വരണ്ടുപോകാനും വാഹനത്തിന്റെ തിളക്കം കുറയാനും കാരണമാകാം.

ബൈക്ക് തുടയ്ക്കാൻ ഉപയോഗിക്കുന്ന തുണിയിൽ തന്നെ പൊടിയും ചെറിയ മണൽത്തരികളും കുടുങ്ങിയിട്ടുണ്ടെങ്കിൽ അത് പെയിന്റിൽ സൂക്ഷ്മമായ പോറലുകൾ ഉണ്ടാക്കാം. വൃത്തിയുള്ള മൈക്രോഫൈബർ തുണി ഉപയോഗിക്കുന്നതാണ് നല്ലത്. ക്ലീനിങ്ങിനും പോളിഷിങ്ങിനും കഴിയുമെങ്കിൽ വ്യത്യസ്ത തുണികൾ ഉപയോഗിക്കാം.

ചെയിൻ ക്ലീൻ ചെയ്യുമ്പോൾ പഴയ ഗ്രീസ്, അഴുക്ക് എന്നിവ നീക്കം ചെയ്യപ്പെടും. എന്നാൽ അതിന് ശേഷം ചെയിൻ ലൂബ്രിക്കേറ്റ് ചെയ്യുന്നത് മറന്നാൽ ഘർഷണം കൂടുകയും ചെയിനിന് വേഗത്തിൽ തേയ്മാനം സംഭവിക്കുകയും ചെയ്യാം.