ഹൃദയത്തെയും ചര്‍മത്തെയും കാക്കും ഡ്രൈ ഫ്രൂട്‌സ് മാജിക്

ദഹനം

പ്ലം, അത്തിപ്പഴം എന്നിവ ഉണങ്ങി കഴിക്കുന്നത് ദഹനം മെച്ചപ്പെടുത്താനും മലബന്ധം തടയാനും സഹായിക്കും. കൂടാതെ കുടലിന്റെ ആരോഗ്യത്തിനും ഇവ ബെസ്റ്റാണ്. സംതൃപ്തി പ്രോത്സഹിപ്പിക്കുന്നതിനാല്‍ ആരോഗ്യകരമായ ശരീരഭാരം നിലനിര്‍ത്താനും ഇത് സഹായിക്കും.

രോഗപ്രതിരോധ ശേഷി

ഡ്രൈ ഫ്രൂട്‌സില്‍ അടങ്ങിയിരിക്കുന്ന പൊട്ടാസ്യം, മഗ്നീഷ്യം. കാല്‍സ്യം, സിങ്ക് തുടങ്ങിയ ധാതുക്കള്‍ രോഗപ്രതിരോധ ശേഷി വര്‍ധിപ്പിക്കാന്‍ സഹായിക്കും. കൂടാതെ ഇവയില്‍ വിറ്റാനിന്‍ ഡി, എ, ബി6, കെ1, ഇ എന്നിവ അടങ്ങിയിട്ടുണ്ട്. ബദാമിന്‍ അടങ്ങിയിരിക്കുന്ന വിറ്റാമിന്‍ ഇ ഓക്‌സിഡേറ്റീവ് സ്‌ട്രെസില്‍ നിന്ന് ശരീരത്തെ സംരക്ഷിക്കും.

എല്ലുകളുടെ ആരോഗ്യം

ഡ്രൈ ഫ്രൂട്‌സില്‍ അടങ്ങിയിരിക്കുന്ന മഗ്നീഷ്യം, കാല്‍സ്യം, വിറ്റാമിന്‍ കെ എന്നിവ എല്ലുകളുടെ ബലം നല്‍കാന്‍ സഹായിക്കും. ഫിഗ്, ആപ്രികോട് എന്നിവ കാല്‍സ്യത്തിന്റെ മികച്ച ഉറവിടമാണ്.

ചര്‍മ സംരക്ഷണം

ചര്‍മത്തിന്റെ ആരോഗ്യം മെച്ചപ്പെടുത്തുന്നതിന് ഡ്രൈ ഫ്രൂട്‌സില്‍ അടങ്ങിയിരിക്കുന്ന വിറ്റാമിനുകളും ആന്റി-ഓക്‌സിഡന്റുകളും സഹായിക്കും. ഇത് ചര്‍മം പ്രായമാകുന്ന പ്രക്രിയ മന്ദഗതിയിലാക്കുകയും കേടുപാടുകള്‍ നീക്കം ചെയ്യാന്‍ സഹായിക്കുകയും ചെയ്യുന്നു.

ഹൃദയാരോഗ്യം

ഹൃദയാരോഗ്യം മെച്ചപ്പെടുത്തുന്ന ആരോഗ്യകരമായ കൊഴുപ്പുകളും ഒമേഗ-3 ഫാറ്റി ആസിഡുകളും ഡ്രൈ ഫ്രൂട്‌സില്‍ ധാരാളം അടങ്ങിയിട്ടുണ്ട്. ഇത് കൊളസ്‌ട്രോള്‍ നിയന്ത്രിക്കുകയും ഹൃദ്രോഗ സാധ്യത കുറയ്ക്കുകയും ചെയ്യുന്നു.

ഊര്‍ജനില

ഡ്രൈ ഫ്രൂട്‌സില്‍ അടങ്ങിയിരിക്കുന്ന പ്രകൃതിദത്ത പഞ്ചസാരയും കാര്‍ബോഹൈഡ്രേറ്റുകളും ഊര്‍ജനില മെച്ചപ്പെടുത്താന്‍ സഹായിക്കും. ഊര്‍ജം കിട്ടുന്നതിന് മികച്ച സ്‌നാക്‌സ് ആണ് ഡ്രൈ ഫ്രൂട്‌സ്.

പ്രമേഹം

ടൈപ്പ് 2 പ്രമേഹത്തെ നിയന്ത്രിക്കാനും ഡ്രൈ ഫ്രൂട്‌സില്‍ അടങ്ങിയ മാക്രോന്യൂട്രിയന്‍സിനും മൈക്രോ ന്യൂട്രിയന്‍സിനും കഴിയും. കൂടാതെ ഇവയില്‍ ധാരാളം നാരുകളും ധാതുക്കളും ആരോഗ്യകരമായ കൊഴുപ്പും അടങ്ങിയിട്ടുണ്ട്.