പാത്രങ്ങളിലെ മഞ്ഞളിന്റെ കറ എളുപ്പം നീക്കാം

ഇന്ത്യൻ ഭക്ഷണത്തിലും അടുക്കളകളിലും മറ്റും ഒഴിച്ചുകൂടാൻ ആവാത്ത ഒരു ഐറ്റമാണ് മഞ്ഞൾ.

എന്നാൽ, പാത്രങ്ങളിൽ മഞ്ഞൾ ഉണ്ടാക്കുന്ന കറ അത്ര എളുപ്പം നീക്കാൻ കഴിയാത്തത് കൊണ്ട് തന്നെ വീട്ടമ്മമാർക്കു മഞ്ഞൾ ഒരേ സമയം മിത്രവും ശത്രുവുമാണ്.

പലപ്പോഴും, നന്നായി കഴുകിയതിനു ശേഷവും അവിടെത്തന്നെ അവശേഷിപ്പിക്കുന്ന മഞ്ഞൾക്കറ പാത്രത്തിന്റെ സ്വാഭാവിക നിറം നഷ്ടപ്പെടുത്തുന്നു. മാത്രമല്ല, ഈ കറ കൂടുതൽ നേരം പാത്രങ്ങളിൽ ഇരുന്നാൽ നീക്കം ചെയ്യാനും ബുദ്ധിമുട്ടാണ്.

അടുക്കളയിലെ ദൈനംദിന ചേരുവകൾ കൊണ്ട് മഞ്ഞളിൻെറ കറ എളുപ്പത്തിൽ നീക്കം ചെയ്യാനാകും. അത് എങ്ങനെയെന്ന് നോക്കാം.

ഗ്ലിസറിൻ

രണ്ട് കപ്പ് വെള്ളത്തിൽ കാൽ കപ്പ് ഗ്ലിസറിനും കാൽ കപ്പ് ലിക്വിഡ് സോപ്പും ചേർക്കുക. ഒരു തുണി ഉപയോഗിച്ച് ഈ മിശ്രിതം കറയുടെ മുകളിൽ പുരട്ടുക. 15 മിനിറ്റിന് ശേഷം ചെറുചൂടുവെള്ളത്തിൽ കഴുകിക്കളയുക

നാരങ്ങാനീര്

ചെറുചൂടുവെള്ളത്തിൽ നാരങ്ങാനീര് കലർത്തി, കറപിടിച്ച പാത്രങ്ങൾ ഈ ലായനിയിൽ രാത്രി മുഴുവൻ മുക്കിവയ്ക്കുക. അടുത്ത ദിവസം രാവിലെ പതിവുപോലെ വൃത്തിയാക്കുക.

ബേക്കിങ് സോഡ

വെള്ളവും ബേക്കിങ് സോഡയും ചേർത്ത് കട്ടിയുള്ള ഒരു പേസ്റ്റ് ഉണ്ടാക്കി കറകളിൽ പുരട്ടുക, 15 മിനിറ്റിനു ശേഷം വൃത്തിയാക്കുക.

ഹൈഡ്രജൻ പെറോക്സൈഡ്

മറ്റെല്ലാ വഴികളും പരാജയപ്പെട്ടാൽ ഈ ദ്രാവകം ഉപയോഗിക്കുക. കറകളിൽ കുറച്ച് തുള്ളി ഹൈഡ്രജൻ പെറോക്സൈഡ് ഒഴിച്ച് കുറച്ച് മിനിറ്റ് വെച്ചതിനു ശേഷം കഴുകിക്കളയുക.

സൂര്യപ്രകാശം

കറ നീക്കം ചെയ്യാനുള്ള ഏറ്റവും സ്വാഭാവികമായ രീതിയാണ് വെയിലത്തുണക്കുക എന്നത്. ഒരു ദിവസം മുഴുവൻ നിങ്ങളുടെ പാത്രങ്ങൾ വെയിലത്ത് വയ്ക്കുക. കറയുടെ നിറം മങ്ങുന്നതായി കാണാം.