വെളുത്തുള്ളിയുടെ തൊലി കളയാൻ ഇത്രയ്ക്ക് ഈസിയായിരുന്നോ?

വെളുത്തുള്ളി നമ്മുടെ ഭക്ഷണത്തില്‍ പതിവായി ഉപയോഗിക്കുന്ന ഒന്നാണ്.

രുചിയ്ക്ക് പുറമേ നിരവധി ആരോഗ്യഗുണങ്ങളും ഇതിനുണ്ട്.

വിറ്റാമിനുകള്‍, ധാതുക്കള്‍, ആന്റിഓക്‌സിഡന്റുകള്‍ എന്നിവയുടെ മികച്ച സ്രോതസാണിത്.

വെളുത്തുള്ളി നല്ലതാണെങ്കിലും അത് തൊലി കളഞ്ഞ് എടുക്കുകയെന്നത് ഇത്തിരി പാടുള്ള കാര്യമാണ്.

എന്നാൽ ചില ട്രിക്കുകൾ പ്രയോഗിച്ചാൽ ഈസിയായി വെളുത്തുള്ളു തൊലി കളഞ്ഞ് വൃത്തിയാക്കാം.

രണ്ടു ചെറിയ പാത്രങ്ങള്‍ എടുത്ത് ഒന്നില്‍ വെളുത്തുള്ളി വച്ച് മറ്റേതിന്‍റെ അടിഭാഗം കൊണ്ട് നന്നായി അമര്‍ത്തുക. എന്നിട്ട് ഒരു 10 സെക്കന്‍ഡ് നേരത്തേക്ക് രണ്ടും കൂടി കൂട്ടിപ്പിടിച്ച് നന്നായി കുലുക്കുക. ഇങ്ങനെ ചെയ്യുമ്പോള്‍ ഒരുവിധം തൊലിയൊക്കെ പോയിക്കിട്ടും.

അല്ലികളാക്കിയ വെളുത്തുള്ളി കുറച്ച് ചൂടുവെള്ളത്തിലേക്ക് ഇടുക. പതിനഞ്ചു മിനിറ്റ് കഴിഞ്ഞ് വെള്ളം ഊറ്റിക്കളഞ്ഞു കൈകൊണ്ടു ഞരടിയാല്‍ ഇവയുടെ തൊലി എളുപ്പത്തില്‍ ഊര്‍ന്നുപോകുന്നത് കാണാം.

കുറച്ചു വെളുത്തുള്ളി എടുത്ത് മുകള്‍ഭാഗം മുറിച്ചു കളയുക. എന്നിട്ട് മൈക്രോവേവിനുള്ളിൽ 20-30 സെക്കന്‍ഡ് നേരം ചൂടാക്കുക. ഇത് പുറത്തെടുത്ത് തണുക്കാന്‍ വയ്ക്കുക. ഇങ്ങനെ ചെയ്യുമ്പോള്‍ പെട്ടെന്ന് തൊലി കളയാനാവും.

അല്ലികളാക്കിയ വെളുത്തുള്ളി എടുത്ത് ഒരു പ്ലാസ്റ്റിക് കവറില്‍ വച്ച്, അതിനു മുകളിലൂടെ ചപ്പാത്തിവടി അമര്‍ത്തി ഉരുട്ടുക. ഒരു നാലഞ്ചു തവണ ഉരുട്ടുമ്പോള്‍ത്തന്നെ ഇവയുടെ തൊലി അടര്‍ന്നു വരുന്നത് കാണാം.

വെളുത്തുള്ളി അല്ലിയുടെ പരന്ന ഭാഗത്ത്, കത്തിയുടെ പരന്ന ഭാഗം വച്ച് നന്നായി അമര്‍ത്തുക. ഇങ്ങനെ ചെയ്യുമ്പോള്‍ തൊലി എളുപ്പത്തില്‍ പൊട്ടി അടര്‍ന്നു പോകും.