വഴുതനങ്ങ ഇഷ്ടമാണോ? അറിയാതെ പോകരുത് ഈ ​ഗുണങ്ങൾ

രുചികരമായ വഴുതനങ്ങ വിഭവങ്ങളുടെ ആരാധകർ നിരവധിയാണ്. എന്നാൽ വഴുതനങ്ങയുടെ ആരോ​ഗ്യ​ഗുണങ്ങളെ കുറിച്ച് പലർക്കും അത്ര പിടിയില്ല.

ഹൃദയാരോ​ഗ്യം

വഴുതനങ്ങയിൽ ധാരാളം ആന്റി-ഓക്സിഡന്റുകൾ അടങ്ങിയിട്ടുണ്ട്. ഇവ കൊളസ്ട്രോൾ, രക്തസമ്മർദം എന്നിവ നിയന്ത്രിച്ച് ഹൃദയത്തിന്റെ ആരോ​ഗ്യം മെച്ചപ്പെടുത്തുന്നു.

ദഹനം

നാരുകൾ ധാരാളം അടങ്ങിയ വഴുതനങ്ങ ദഹനം മെച്ചപ്പെടുത്താൻ സഹായിക്കുന്നു. കൂടാതെ കുടലിന്റെ ആരോ​ഗ്യത്തിനും മലബന്ധം തടയാനും വഴുതനങ്ങ ഡയറ്റില്‍ ഉള്‍പ്പെടുത്തുന്നത് നല്ലതാണ്.

പ്രമേഹം

പ്രമേഹ രോ​ഗികൾ വഴുതനങ്ങ പതിവായി ഡയറ്റിൽ ചേർക്കുന്നത് രക്തത്തിലെ പഞ്ചസാരയുടെ അളവു ക്രമീകരിച്ചു നിർത്താൻ സ​ഹായിക്കും.

എല്ലുകളുടെ ആരോ​ഗ്യം

ഫീനോളിക് സംയുക്തങ്ങളും കാൽസ്യവും മ​ഗ്നീഷവും അടങ്ങിയ വഴുതനങ്ങ എല്ലുകളുടെ ആരോഗ്യത്തിനും ഏറെ നല്ലതാണ്. ഇത് എല്ലുകളുടെ സാന്ദ്രത വർധിപ്പിക്കാൻ സഹായിക്കും.

കാൻസർ പ്രതിരോധിക്കും

രുചിയിൽ മാത്രമല്ല കാൻസറിനെ പ്രതിരോധിക്കാനും വഴുതനങ്ങ സഹായിക്കും. ഇവയുടെ ആന്റി-ഓക്സിഡന്റ് ​ഗുണങ്ങളും ഫീനോളിക് സംയുക്തങ്ങളും ദോഷകരമായ ഫ്രീ റാഡിക്കലുകളോട് പൊരുതി കാൻസറിനെ ചെറുക്കാൻ സഹായിക്കുന്നു.

തലച്ചോറിന്റെ ആരോ​ഗ്യം

തലച്ചോറിന്റെ പ്രവർത്തനങ്ങളെ ഉദ്ദീപിപ്പിക്കുന്ന ഭക്ഷണങ്ങളിൽ ഒന്നാണ് വഴുതനങ്ങ. ഇവയിൽ അടങ്ങിയിരിക്കുന്ന ഫൈറ്റോന്യൂട്രിയൻസ് ഓർമശക്തി വർധിപ്പിക്കാനും തലച്ചോറിന്റെ പ്രവർത്തനങ്ങളെ ത്വരിതപ്പെടുത്താനും സഹായിക്കും.

ചർമത്തിന്റെ ആരോ​ഗ്യം

വഴുതനങ്ങയിൽ അടങ്ങിയ ആന്റി-ഓക്സിഡന്റുകൾ ഓക്സിഡേറ്റീവ് തകരാറുകൾ പരിഹരിക്കുന്നു. ഇത് ത്വക്ക് പ്രായമാകുന്നതിൽ നിന്ന് തടയുകയും ചർമം യുവത്വമുള്ളതും തിളക്കമുള്ളതുമാക്കുകയും ചെയ്യുന്നു.

വിളര്‍ച്ച

ഇരുമ്പിന്‍റെ അംശം ധാരാളം ഉള്ളതു കൊണ്ട് തന്നെ വിളര്‍ച്ച ഒഴിവാക്കാന്‍ വഴുതനങ്ങ കഴിക്കുന്നത് നല്ലതാണ്, പ്രത്യേകിച്ച് ഗര്‍ഭിണികളില്‍.