ജ്യൂസ് വേണ്ട, കട്ടൻകാപ്പി ആവാം; ഫാറ്റി ലിവർ ചെറുക്കാൻ ഈ ഭക്ഷണങ്ങൾ

മദ്യപിക്കില്ലെങ്കില്‍ പോലും ഫാറ്റി ലിവര്‍ ഇന്ന് ചെറുപ്പക്കാരില്‍ ഉള്‍പ്പെടെ നിരവധി ആളുകളില്‍ സാധാരണമായി കഴിഞ്ഞു. ഇതിന് ഒരു പ്രധാന കാരണം ഭക്ഷണ രീതിയാണ്.

പഞ്ചസാരയും പ്രോസസ്ഡ് കൊഴുപ്പും ഫാസ്റ്റ് ഫുഡും അടങ്ങിയ മോഡേണ്‍ ഡയറ്റ് നമ്മുടെ കരളിനെ ഇരട്ടി സമ്മര്‍ദത്തിലാക്കുന്നു. ഇത് കരള്‍ രോഗങ്ങളിലേക്കും ഫാറ്റി ലിവര്‍ രോഗം വഷളാകാനും കാരണമാകും. കരളിനെ സംരക്ഷിക്കുന്ന ചില ഭക്ഷണങ്ങള്‍.

ഗ്രീന്‍ ടീ

ഗ്രീന്‍ ടീയില്‍ അടങ്ങിയ കാറ്റെച്ചിനുകള്‍ കരളിലെ വീക്കം കുറയ്ക്കാനും കൊഴുപ്പ് അടിഞ്ഞു കൂടുന്നത് ഒഴിവാക്കാനും സഹായിക്കും. കൂടാതെ ഇതില്‍ അടങ്ങിയ ആന്റി-ഓക്‌സിഡന്റുകള്‍ കരളിന്റെ ആരോഗ്യം മെച്ചപ്പെടുത്താനും സഹായിക്കും.

ബീറ്റ്‌റൂട്ട്

ഫാറ്റി ലിവര്‍ ഉള്ളവര്‍ക്ക് കഴിക്കാവുന്ന ഒരു മികച്ച പച്ചക്കറിയാണ് ബീറ്റ്റൂട്ട്. ഇതില്‍ അടങ്ങിയിരിക്കുന്ന ബീറ്റൈന്‍ കരളില്‍ നിന്ന് വിഷാംശത്തെ നീക്കം ചെയ്യാനും ഓക്‌സിഡേറ്റീവ് സമ്മര്‍ദം കുറയ്ക്കാനും സഹായിക്കും.

ബെറിപ്പഴങ്ങള്‍

ബ്ലൂബെറി, റാസ്‌ബെറി, സ്‌ട്രോബെറി പോലുള്ള ബെറിപ്പഴങ്ങളില്‍ അടങ്ങിയ ആന്റി-ഓക്‌സിഡന്റുകള്‍ കരളിന് ബെസ്റ്റാണ്. ഇത് കരളിന്റെ പ്രവര്‍ത്തനം മികച്ചതാക്കാന്‍ സഹായിക്കും.

ചിയ വിത്തുകള്‍

ചിയ വിത്തുകള്‍ വെള്ളത്തില്‍ കുതിര്‍ത്തു കഴിക്കുന്നത് രക്തത്തിലേക്ക് പഞ്ചസാരയുടെ ആഗിരണം കുറയ്ക്കും. മാത്രമല്ല, ഇതില്‍ അടങ്ങിയ ഒമേഗ-3യും നാരുകളും കരളിന്റെ ആരോഗ്യത്തെ മെച്ചപ്പെടുത്തും.

അവോക്കാഡോ

അവോക്കാഡോയില്‍ അടങ്ങിയ മോണോഅണ്‍സാച്ചുറേറ്റഡ് കൊഴുപ്പും ഗ്ലൂട്ടാതയോണും കരളിന്റെ പ്രവര്‍ത്തനത്തെ മികച്ചതാക്കും. ഇത് കരള്‍ വീക്കം കുറയ്ക്കാനും നല്ല കൊളസ്‌ട്രോള്‍ ഉല്‍പാദിപ്പിക്കാനും സഹായിക്കും.

കട്ടന്‍കാപ്പി

പാലോ പഞ്ചസാരയോ ചേര്‍ക്കാത്ത കാപ്പി കരളിന് നല്ലതാണെന്ന് നിരവധി പഠനങ്ങള്‍ തെളിയിക്കുന്നു. ഇത് ലിവര്‍ ഫൈബ്രോസിസ് അപകടസാധ്യത കുറയ്ക്കാനും എന്‍സൈമുകളുടെ അളവു കൂട്ടാനും സഹായിക്കും. കാപ്പിക്കുരുവിന്റെ ഗുണമേന്മയിയെയും ആശ്രയിച്ചാണ് ആരോഗ്യഗുണങ്ങള്‍.