ഓഫീസിൽ ഇനി സാരി ‘ഫ്ലെക്സ്’; ജെൻ സിയുടെ പുതിയ ഫാഷൻ ട്രെൻഡ്!

പുതിയ തലമുറയുടെ ഫാഷൻ സങ്കൽപ്പങ്ങളിൽ സാരിക്ക് ഇന്ന് ഓഫീസിലും ഇടമുണ്ട്. ഒരുകാലത്ത് പതിവ് ജോലിദിനങ്ങളിൽ നിന്ന് അപ്രത്യക്ഷമായിരുന്ന സാരി, ജെൻ സി യുവതികളുടെ സ്റ്റൈലിംഗിലൂടെ വീണ്ടും വർക്ക്‌വെയറായി തിരിച്ചെത്തുകയാണ്.

പ്ലീറ്റുകളും സേഫ്റ്റി പിന്നുകളും മാത്രമല്ല, പുതിയ തലമുറ സാരിയോടൊപ്പം പരീക്ഷിക്കുന്നത് ഡ്രേപ്പിങ്ങിന്റെ പുതിയ രീതികളും വ്യത്യസ്ത തുണിത്തരങ്ങളും ബ്ലൗസുകളും ആക്‌സസറീസുമാണ്.

അവസരങ്ങൾക്ക് മാത്രം ധരിക്കുന്ന വസ്ത്രം എന്ന സങ്കൽപ്പത്തിൽ നിന്ന് മാറി, സാരി ദൈനംദിന വസ്ത്രധാരണത്തിന്റെ ഭാഗമാകുകയാണ്.

പ്രത്യേകിച്ച് കൈത്തറി സാരികളാണ് യുവതികൾക്കിടയിൽ ശ്രദ്ധ നേടുന്നത്. ബ്ലോക്ക് പ്രിന്റുകൾ, കലാംകാരി തുടങ്ങിയവയോടൊപ്പം കോട്ടൺ, ലിനൻ തുടങ്ങിയ ലഘുവായ തുണികളും ഓഫീസ് വസ്ത്രധാരണത്തിന് അനുയോജ്യമായി മാറുന്നു.

സാരിക്കൊപ്പം പരമ്പരാഗത ഫിറ്റഡ് ബ്ലൗസ് തന്നെ വേണമെന്ന നിർബന്ധവും പുതിയ തലമുറ ഉപേക്ഷിക്കുകയാണ്. ക്രോപ്പ് ടോപ്പുകൾ, ടാങ്ക് ടോപ്പുകൾ, ടി-ഷർട്ടുകൾ, ഷർട്ടുകൾ എന്നിവയ്ക്കൊപ്പം സാരി പരീക്ഷിക്കുന്നവരും ഏറെയാണ്.

ഡെനിം, ബെൽറ്റ്, ഷർട്ട്, സ്നീക്കേഴ്സ് തുടങ്ങിയവയുമായി സാരി കൂട്ടിച്ചേർക്കുന്നതും ജെൻ സിയുടെ പുതിയ ഫാഷൻ പരീക്ഷണങ്ങളുടെ ഭാഗമാണ്. അതോടെ സാരിയുടെ പരമ്പരാഗത രൂപത്തിന് കൂടുതൽ കാഷ്വൽ, സമകാലിക ഭാവം ലഭിക്കുന്നു.

സിനിമകളും വെബ് സീരീസുകളും ഈ മാറ്റത്തിന് പ്രചോദനമാകുന്നുണ്ട്. റോക്കി ഔർ റാണി കി പ്രേം കഹാനി (Rocky Aur Rani Kii Prem Kahaani)യിൽ ആലിയ ഭട്ടിന്റെ കഥാപാത്രം ഓഫീസിൽ ചിഫോൺ സാരിയണിഞ്ഞെത്തുന്ന രംഗങ്ങളും മേഡ് ഇൻ ഹെവൻ (Made in Heaven)ൽ ശോഭിത ധുലിപാലയുടെ എലഗന്റ് സാരി ലുക്കുകളും യുവതികളുടെ ഫാഷൻ സങ്കൽപ്പങ്ങളിൽ സ്വാധീനം ചെലുത്തിയിട്ടുണ്ട്.

പുതിയ തലമുറ സാരിയെ സ്വീകരിക്കുന്നത് ഫാഷൻ മാത്രമായി കാണേണ്ടതില്ലെന്നതാണ് മറ്റൊരു പ്രത്യേകത. സാരി എവിടെ നെയ്തു, ആരാണ് നിർമ്മിച്ചത്, അതിന്റെ പിന്നിലെ കഥ എന്താണ് തുടങ്ങിയ കാര്യങ്ങളിലും യുവ ഉപഭോക്താക്കൾക്ക് താൽപര്യമുണ്ട്.

സാരിയുടെ സ്വീകാര്യത ഇന്ത്യയ്ക്കപ്പുറത്തേക്കും വ്യാപിക്കുകയാണ്. ന്യൂയോർക്കിലെ ടൈംസ് സ്ക്വയറിൽ നടന്ന സാരി ​ഗോസ് ​ഗ്ലോബൽ (Saree Goes Global) പരിപാടിയിൽ ഇന്ത്യയ്ക്ക് പുറമെ ബംഗ്ലാദേശ്, യുകെ, വെസ്റ്റ് ഇൻഡീസ്, മലേഷ്യ, സിംഗപ്പൂർ, ശ്രീലങ്ക, അമേരിക്ക തുടങ്ങിയ രാജ്യങ്ങളിൽ നിന്നുള്ളവരും പങ്കെടുത്തു.

പരമ്പരാഗത വസ്ത്രത്തിൽ നിന്ന് ‘പവർ ഡ്രസ്സിങ്’ വരെ—സാരി വീണ്ടും ഒരു തലമുറയുടെ ഫാഷൻ പ്രസ്താവനയായി മാറുകയാണ്. സ്വന്തം വ്യക്തിത്വവും പാരമ്പര്യവും ഒരേസമയം പ്രകടിപ്പിക്കുന്ന ജെൻ സിയുടെ പുതിയ സ്റ്റൈൽ സ്റ്റേറ്റ്മെന്റാണ് സാരി.